張永豪(Gary),香港電視製作人,曾經喺亞洲電視做助理編導,曾經北上發展,之後轉去無綫電視做助理編導,2008年升為導演。
張永豪被指經常性對非一線演員同埋其他幕後工作人員施襲同粗口對待,有報道話無綫好多人都敢怒不敢言,皆因佢老婆係無綫高層曾勵珍嘅親戚。俾佢鬧過嘅藝人包括佘詩曼、周家怡、鄭欣宜、陳茵媺、魏焌皓、劉蔚萱、趙國東、彭國樑等。其中魏焌皓甚至試過喺記者面前被張永豪用劇本棒打,仲恐嚇佢唔好報寸,祝佢生仔無屎忽。不過,當佢面對一啲資深藝人嘅時候,就會即刻變臉。
其中佘詩曼啱啱出道嗰陣參演《生命有Take 2》,有一場戲通告突然改早,結果佘詩曼遲咗18分鐘,結果張永豪就追著佢嚟鬧,鬧佢「淨係識帶塊嘢返工」,事後佘詩曼向高層表明以後拍劇唔想再見到佢,多年後記者再問及事件,佘詩曼仍然話「對於一個素質咁差嘅人,我唔想作任何評價。」。
而去到2012年9月,劇集《心路GPS》拍攝期間,張永豪因為不滿劉蔚萱嘅的表現,而對佢施虐,明知佢怕田雞都要用有田雞味嘅膠袋笠佢頭,而且仲要撼佢個頭埋牆,又大叫佢八婆。事件經過因為有人拍低段片放上網而被廣泛報導,結果無綫電視高層介入事件,但張永豪得到高層保護,反而係劉蔚萱被高層質疑係咪放料人,而曾勵珍亦公開表明要追究放片嘅人,又話事件只係導演教戲。多名藝人包括杜汶澤、蔡少芬、蒙嘉慧、黃秋生、黃日華等都批評張永豪。蒙嘉慧直指人要控制情緒,大家都有尊嚴。黃秋生亦表明唔認同所謂「教戲」嘅辯解,反問拍火燒戲係咪搵把火燒個演員。最後,張永豪受到無綫嘅警告信,並且喺查小欣主持嘅電視節目入面向劉蔚萱道歉。
This article uses material from the Wikipedia 粵語 article 張永豪, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.