曱甴: 昆蟲

曱甴/甴曱
物種分類
界 動物界 門 節肢動物門 綱 昆蟲綱 亞綱 有翅亞綱 下綱 新翅下綱 Superorder: Dictyoptera（英文：Dictyoptera） 目 蜚蠊目
Families
Blaberidae Blattellidae Blattidae Cryptocercidae Polyphagidae Nocticolidae

有啲參考書，如《商務新字典》、《朗文中文新詞典》，將兩個字反寫做「甴曱」。但係明初古籍《篇海類編》早有記載：曱，音押；甴，音扎。「曱甴」同現今粵音gaat6 zaat6較為接近，反寫反而讀音相去甚遠。

喺粵語區，最出名係美洲曱甴，大概長30毫米；其餘有德國曱甴，大概15毫米長；亞洲曱甴（asahinai），大概15毫米長；重有blatta orient，大概25毫米長。熱帶曱甴大得多，係滅絕咗嘅曱甴嘅近親，好似石炭紀嘅 archimylacris 同二疊紀嘅 apthoroblattina 咁大。

一般認為曱甴係害蟲。雖然世界上已知有4400種（或500個目）曱甴，只有幾種（少過1%）係住喺市區，大部份曱甴其實係唔少得嘅益蟲，食熱帶雨林死植物，加速生態循環，同時俾其他生物食。

成日見嘅曱甴屬於蜚蠊目（學名：Blattodea，亦作 Blattaria），係昆蟲綱有翅亞綱新翅下綱之下，亦包埋白蟻。而當中4400種曱甴，大概佔整個目三分之二。

• 國語叫「蟑螂」
• 贛語叫「甴巴子」
• 客家話叫「黃賊」
• 西南官話叫「偷油婆」或「灶螞子」

俗語

• 「小強」：香港，以至其他華語地方，俗語上叫曱甴做「小強」。個名來自1993年香港電影《唐伯虎點秋香》，周星馳飾演嘅唐伯虎臨急要搵樣寵物，就將啱啱俾人踩死嘅曱甴叫做「小強」，攞去呃阿秋香博同情。由於電影非常受歡迎，從此香港，以至台灣同中國嘅人，都經常將曱甴叫做「小強」。後來2000年嘅電視劇《男親女愛》，黃子華飾演嘅主角余樂天，更加養咗隻曱甴做寵物，個名直頭就叫「小強」，後來更加為小強搵咗個女朋友「小玲」。由於小強經常喺劇集出場，令到香港人叫曱甴做「小強」呢個講法，變得加倍流行。

• 水曱甴