黑死病

同樣嘅疾病多次侵襲歐洲，直到1700年代為止，期間造成嘅死亡情形同嚴重程度各唔相同。比較遲嘅幾次大流行包括1629年到1631年嘅意大利瘟疫、1665年到1666年嘅倫敦大瘟疫、1679年嘅維也納大瘟疫、1720年到1722年嘅馬賽大瘟疫，同埋1771年嘅莫斯科瘟疫。關於呢啲疾病嘅異同重有爭議，但係佢嘅致命型態似乎喺18世紀喺歐洲消失。

黑死病對歐洲人口造成咗嚴重影響，改變咗歐洲嘅社會結構，動搖嗰時支配歐洲嘅羅馬天主教會嘅地位，並因此令一啲少數族群被人迫害，例如猶太人、穆斯林、外國人、乞兒同埋痲瘋病患。生唔生存到嘅唔確定性，令人產生咗「活在當下」嘅一種情緒，好似薄伽丘喺《十日談》（The Decameron）入邊寫嘅噉樣。

14世紀發生喺歐洲嘅事件，啱開始嗰時被嗰時嘅作家叫做「Great Mortality」，瘟疫爆發之後，又有咗「黑死病」呢個名。一般認為呢個名係由其中一個顯著嘅症狀而來嘅，叫做「acral necrosis」，患者嘅皮膚會因為皮下出血而變黑。而黑色實際上亦都象徵憂鬱、哀傷同埋驚。

歷史紀錄對於黑死病嘅特徵紀錄入邊，有啲關於淋巴腺腫嘅描述，同19世紀發生喺亞洲嘅淋巴腺鼠疫好似，呢個令科學家同歷史學家推測從14世紀開始嘅黑死病，同鼠疫一樣，都係由一種叫做鼠疫桿菌（Yersinia pestis）嘅細菌所造成嘅。呢啲細菌寄生喺跳蚤身上，並藉由黑鼠（Rattus rattus）呢啲動物嚟傳播。之不過由於第啲疾病亦都有可能產生淋巴腺腫，因此亦都有人提出第啲唔同嘅觀點。

• 鼠疫
• 沙士病毒
• 武漢肺炎