西地那非

輝瑞研發呢種新藥，原本係打算開發用嚟改善病人心絞痛嘅問題。利用藥物協助產生一氧化氮促進血管平滑肌放鬆，達到改善心臟血流嘅作用。但係當年喺針對心絞痛嘅患者進行臨床試驗嘅時候發現，西地那非對改善心絞痛嘅效果並唔理想，而打算放棄西地那非嘅開發計畫，準備喺試驗者手中收返呢啲藥。但係研究員發現，呢啲接受臨床試驗嘅患者喺試驗完之後返到醫院，反而希望能夠得到試驗藥品，尤其是男性患者。追查之下，發現咗一種藥對病者嘅性生活有改善，因為心血管疾病患者通常亦會有末梢血管嘅問題，造成血液循環不良而引起勃起功能障礙，但喺服用之後，卻重新令到條㞗勃起。

西地那非係一種第五型磷酸二酯酶抑制劑，作用於5型磷酸二酯酶（PDE5）。磷酸二酯酶係NO-cGMP通路嘅負調節因子，佢通過催化cGMP嘅分解而調低一氧化氮嘅作用，一般認為體內嘅一氧化氮係一個調節血管平滑肌擴張嘅因子，因而磷酸二酯酶作用嘅結果係促進血管平滑肌嘅收縮。

西地那非可以高選擇性噉抑制人體內PDE5活性，PDE5喺陰莖海綿體內表達水平極高，而喺人體其他組織同器官中就表達較低。服用西地那非之後，陰莖海綿體血管平滑肌喺藥物嘅作用下舒張，血液流量增加，海綿體充血，陰莖勃起，從而產生對陰莖勃起功能障礙嘅治療作用。

陽萎患者喺口服之後平均作用時間為27分鐘（臨床數據分佈喺12-70分鐘之間）。

面紅、頭痛、頭暈係西地那非最常見嘅副作用。