反義詞

一種語言入面嘅所有詞彙唔一定都有對應嘅反義詞，例如助詞、量詞、數詞、嘆詞、擬聲詞等一般都冇相反詞。重有一啲因為冇反義或者反義比較模糊而又冇相應嘅反義詞嘅詞彙。但係大部分語言嘅反義詞屬於形容詞、名詞同動詞嘅詞彙，而且反義詞同同義詞普遍存在喺所有嘅人類嘅語言入面。

一般嚟講，某詞對應嘅反義詞未必只有一個，而會包含所有反義詞嘅同義詞在內。例如「少」、「幼」、「年輕」都可以算係「老」嘅反義詞，因為佢哋都係同義詞。

之不過，因為好多詞彙喺唔同場合都可以有唔同嘅定義，所以可能有一個詞對應多數完全唔同嘅反義詞嘅情況出現。例如上面「少」作為「老」嘅反義詞，係因為「少」字有「年少」嘅意思，而如果「少」解讀為「少數」噉解，佢嘅反義詞就會係「多」而唔係「老」。因此有啲特定嘅詞可以有幾個完全唔同定義嘅反義詞，例如「白」嘅反義詞喺唔同場合分別可能係「黑」（例如白色同黑色）「紅」（例如白事同紅事，或白軍同紅軍）「文」（例如白話同文言）等唔同意義嘅詞匯。

分級反義詞（graded antonym）呢個語言學概念，通常淨係適用於形容詞。如果話 A 同 B 係分級反義詞，意思係話兩隻字形容緊某個連續變數嘅兩極，例如

• 溫度係個連續變數，熱同凍呢兩隻字形容緊溫度嘅兩極，所以係分級反義詞；
• 又例如重量係個連續變數，輕同重呢兩隻字形容緊重量嘅兩極，所以係分級反義詞；
• 又例如長度係個連續變數，長同短呢兩隻字形容緊長度嘅兩極，所以係分級反義詞。

• 同義詞
• 2#成對嘅概念