劉辯: 漢朝皇帝

劉辯係東漢第二個得名做少帝嘅皇帝，喺佢之前嗰個叫北鄉侯劉懿，係東漢第七位皇帝。為咗區分，劉懿叫做東漢前少帝，而劉辯嗌做東漢後少帝dung1 hon3 hau6 siu3 dai3。注意，少帝呢個名唔係諡號，唔同於文帝、武帝之類嘅名，呢個名係話呢個皇帝係個細路或者早死。

劉辯係漢靈帝同何皇后生嘅皇子。189年5月，靈帝駕崩，劉辯喺15歲時繼位，成爲漢少帝。當時何太后同佢阿哥何進、太傅袁隗一齊輔政。

何進帶住嘅係班外戚，而同十常侍爲首嘅班宦官衝突好大，最後演變爲宮變。何進掌權之後誅殺咗宦官蹇碩，之後重諗住殺曬班宦官，但係佢嘅妹何太后唔準，因爲班宦官對佢有恩，喺佢毒殺王美人時，靈帝諗住廢佢后位，係班宦官勸住先保得。同時何太后亦聽埋啲宦官話，認爲佢阿哥噉殺法，係想操縱朝政。

何進召并州牧董卓入京，要佢幫手殺宦官。不過風聲走漏，宦官張讓喺何進入宮奏請太后時，伏兵宮中，殺咗何進。何進嘅手下吳匡、袁術知咗，想帶兵剷除宦官。

之後班宦官帶住皇帝出宮，而董卓入京之後控制咗朝廷。189年10月，佢就廢咗劉辯嘅帝位，貶佢做弘農王，而扶佢8歲嘅細佬陳留王劉協上位，成爲漢獻帝。劉辯在位得五個月嗟。

到190年，董卓驚地方軍閥攞幫弘農王復辟嘅名來討伐自己，派咗郎中令李儒搦毒酒整死劉辯，重毒殺埋何太后。劉辯終年15歲。之後中國入到軍閥割據嘅時代。

劉辯在位時，用過兩個年號：

• 光熹（189年）
• 昭寧（189年）

其中昭寧係喺九月時改元嘅，但係三日之後就畀董卓廢咗。

• 漢靈帝
• 漢獻帝
• 何進
• 董卓

• 紀傳體史書
  • 《後漢書》卷八《孝靈帝紀第八》、卷九《孝獻帝紀第九》、卷十下《皇后紀第十下》、卷六十九《竇何列傳第五十九》、卷七十二《董卓列傳第六十七》、卷七十八《宦者列傳第六十八》
  • 《三國志》卷一《魏書一·武帝紀第一》、卷六《魏書六·董二袁傅第六》、卷七《魏書七·呂布臧洪傳第七》
• 編年體史書
  • 《資治通鑒》卷五十九
  • 《後漢紀》嘅《後漢孝靈皇帝紀下卷第二十五》、《後漢孝獻皇帝紀卷第二十六》

引用