Rwanda

Sitindêye : 26 338 kilometes cwårés.

Mwaisse veye : Kigali.

Lingaedjes :

• colniå : francès, mins l' inglès s' a spårdou dispu l' redjime Kagamé.
• kiniarwanda : seu lingaedje do payis

 

Vijhnaedje

Les vijhéns sont l' Bouroundi (a Nonne), li Tanzaneye (å Levant), l' Ouganda (å Bijhe) eyet l' Congo-Kinchassa (å Coûtchant). Li mitan nonnrece del frontire, c' est l' Laetche Kivou.

Monzevås

C' est l' payis ås meye tienes.

Les raeces

Li payis est peuplé di troes raeces di djins ki n' si marièt waire inte di zels. Do vî tins, tchaeke raece aveut on metou role dins l' etcherpetaedje del societé.

• les Toutsis : grands noers nîlotikes tinént les vatches et esse les tchîfs politikes.
• les Houtous : pitits noers bantous estént les coûtiveus del tere.
• ls Twas, ene ôte pitite sôre di djins estént marixhås et macreas.

Istwere del peuplåcion

Po comincî la pus d’ meye ans, tot l’ payis steut covrou pa ene foirt espesse foistreye. Les prumîs omes k' î dmorént, c’ ît des ptits omes, les Twa ki viként del tchesse eyet do codaedje des fruts et des raecenes, pask’ i n’ avént nén l’ idêye ni les ostis po dirôder eyet coûtiver.

Adonpwis, cwand l’ dezert do Sara s’ a stindou e tchessant les bantous coûtiveus ki î stént, il ont dvou ndaler vir ôte pårt po trover des plaeces po fé des tchamps. I nd a k' ont-st arivé insi so les tienes do Rwanda et s’ mete a dirôder tot leu pus foirt sins s’ ocuper des Twa k’ ont stî må pris ey i nd a waire k’ ont sorviké.

Après les «bantous» - roci lomés Houtou – des djins d’ Etiopeye ont stî oblidjîs d’ baguer aveu leus vatches, tchessis yeusses eto pa l’ avance do dezert. Eyet, i gn a aviè meye ans did ci, sacwant d’ ces djins la, e passant pa l’ Ouganda, s’ ont aresté el long d’ l’ Akaguera (eyou k’ c’ est asteure el Park di l’ Akaguera). Gn a des ôtes k' ont co stî ene miete pus lon, divant d’ arester a l’ Ouwess di l’ Ouroundi, el payis vijhén. Ces djins la, c' est les Toutsi, des moenneus d' tropeas.

Les Houtou ont tant et si bén dirôdé k’ i gn a ostant dire pupont d’ bwès do tot. A leu-n arivêye, les Toutsi n’ ont pont fwait d’ brut ey il ont dmoré l’ long d’ l’ Akaguera disk’ å Bouguessera, eyou i gn a pont d’ bounès teres po coûtiver. Do côp, ça n’ djinnéve nén les Houtou. Mais les Toutsi ont radmint veu k’ les Houtou n’ s’ etindént nén eshonne: i gn aveut on moncea d’ pitits rweyåmes ki s’ djalozént onk l’ ôte eyet todi e trén di s’ bate. Les Toutsi avént adopté l’ lingaedje (kiniarwanda) eyet l’ vicaedje des Houtous. I n’ ont pont yeu d’ må po s’ arindjî e dvinant ptit-z a ptit les mwaisses po k’ i gn euxhe pupont d’ djalots.

Colnijhaedje

 Loukîz a : Rwanda-Ouroundi#Divant 1922

Colnijhî aprume des Almands, i fourit dné e mambornance al Beldjike al Påye di Versaye (1919). Ele li wårda disk' å dislaxhaedje e 1961.

Politike di l' ONU

 Loukîz a : Rwanda-Ouroundi#Passaedje å sistinme politike coûtchantrece

A l’ ONU, après l’ guere di 40, li môde esteut d' astaler li democraceye totavå. Adon, po fé plaijhi a l’ ONU, li Beldjike, k' esteut mambor, diveut mete fén å « systinme feyodå » des « Teritweres dizo mambornance do Rwanda-Ouroundi ».

Prumirès anêyes di dislaxhance

Les Houtous ont yeu l' moennance do payis dispoy 1959 disk’ e 1994.

Peupe-sipata di 1994

 Loukîz a : Peupe-sipata do Rwanda di 1994

L' avion do prezidint Djuvnå Habiarimana est saetchî djus pa on tir di canon sconte-avion.

Sol pî sol tchamp, des milices houtowes kiminçnut a macsåder les Toutsis et les cis des Houtous ki fjhént avou zels.

S" eshuva li peupe-sipata el pus crouwel ki l’ Afrike åye conoxhou e XXinme sieke : 800.000 moirts a 1.000.000 d’ moirts do moes d' avri å moes d' djun.

Li grosse mitan do roman e walon «Li batreye des cwate vints» si passe e Rwanda, djusse après l' peupe-sipata di 1994.

Modêye brouyon del "Batreye des cwate vints" (so l' Aberteke)