2023-2024 Guere Di Gaza

La k' Israyel vina bombårder et evayi li Binde di Gaza, po-z î språtchî les bateus do Hamasse et des ôtès soces di rezistance årmêye.

Ele fijha dipus d' 30.000 moirts, aprume des cmeres et des efants des Gazawîs. Et distrure des tribolinnes di bastimints. Et mete ces djins la dins l' pômagne.

L' abrocaedje et les bombårdumints del Binde di Gaza fourît decidés pa on govienmint d' crijhe d' Israyel po s' rivindjî d' ene atake terorisse do Hamasse disconte des civils israyelîs å cmince do moes d' octôbe 2023. Fåt dire ki les Gazawîs estént resserés dins ene «prijhon a l' air libe» dispu 2006. Et atakés tos les ans pa des bombårdumints adierciveus po touwer les rezistants palestinîs. Zels saetchént a tinzayeure des roketes so les viyaedjes israyelîs did l' ôte costé do meur di schåyaedje (basti dins les anêyes 2000).

Avou ça ki l' govienmint d' foite droete d' Israyel, emantchî e 2022, aveut touwé bråmint des rezistants Palestinîs e l' Cisdjordaneye tot åd dilong di l' anêye 2023.

Fé l' guere arindjive bén eto Bindjamin Netaniahou, k' esteut porshuvou ezès tribunås, et ki dveut dmorer prumî minisse po n' nén dveur passer divant les noerès cotes.

Israyel fourit sotnou pås Estats Unis ki lzî evoyît bråmint des cwår.

Les palestinîs estént sotnous pa les Houtîs do Yemen k' ataként les bateas des sotneus d' Israyel dins l' Rodje Mer ey e l' Gofe d' Aden. Eto på Hezbollah do Liban. Mins Israyel, les Estats Unis et l' Grande Burtaegne ratakît les Houtîs e Yemen minme, et les touwer ås drômes des tchîfs do Hezbollah e Liban et pår e l' Irak.

Li Catår et l' Edjipe sayît d' arindjî les bidons.

El Nonne-Afrike ameta Israyel divant l' Coû eternåcionåle di djustice po peupe-sipata.

Lucyin Mahin, Li Rantoele 109, p. 4.

 

I gn a so les cmons Wiki des imådjes ou fitchîs son a vey avou cisse guere la .