Pelikani Kaçurrel

Ka një sqep shumë të madh të pajisur me xhep lëkure në nofullën e poshtme, me të cilën kapin peshk. Në ndryshim nga disa shpende të tjerë fluturojnë në tufa të organizuara, ku pjesa më e madhe është e sinkronizuar.Të rriturit kanë pendë të përdredhura në fund të kokës dhe zverk si dhe karakterizohet nga ngjyrë e bardhë e trupit si dhe ngjyra e gushës e verdhë. Në periudhën e riprodhimit, gusha e tyre merr ngjyrë portokalli të ndezur. Të vegjlit dallohen për ngjyrën gri në kafe.

Ushqehet me peshq të ndryshëm dhe preferon si habitat këneta, liqene, rezervuare dhe liqene gjysëm të kripur ose laguna.

Folezon në ishuj kallamishtesh dhe në platforma të ndërtuara në dedikim të tyre. Lëshon 1-5 vezë. Periudha e riprodhimit është në fillim të muajit shkurt ndërsa dimëron në Mesdhe.

Në Shqipëri mbart statusin i rrezikuar në mënyrë kritike për zhdukje

Laguna e Karavastasë është vendi i vetëm ku folezon në Shqipëri , ndërsa është dimëronjës përgjatë disa zonave të bregut Adriatik, disa liqeneve si dhe në lagunën e Nartës dhe Karavastasë. Liqenin e madh te Prespes e përdor si zonë për ushqim.

Kërcënohet vazhdimisht nga tharja dhe shkatërrimi i kënetave, prishja e foleve dhe dëmtimi i vezëve nga kafshët e tjera, shqetësimi gjatë periudhës së riprodhimit, elektroshoku dhe përplasja me shtyllat elektrike.