Preunmié Dgèrre Mondiale

La dgèrre am'nit l's Améthitchains en Ûrope, griyit des nouvieaux êtats en Ûrope et dans l'Êst du Mitan, et laîssit des problièmes tchi m'nîtent à la S'gonde Dgèrre Mondiale eune vîngtaine d'années pus tard.

Pus d'neu millions d'soudards mouothîtent dans l'clios d'batâle et acouo tchiques millions d'citouoyens.

 

Chein tch'êmoûtchit la dgèrre fut l'assâsinnâtion d'l'Archiduc Françouais Fèrdinand d'Autriche-Hongrie à Sarajévo par un nâtionnaliste Sèrbe lé 28 d'Juîn 1914.

L'Archiduc 'tait l'héthitchi au trône d'l'empithe dé l'Autriche-Hongrie tch'atchûsit la Sèrbie d'êt' enhèrmélée dans l'assâsinnâtion et fit un ultimatum à la Sèrbie lé 23 d'Juilet. La Sèrbie n'pouvait pon accepter touos les tèrmes dé l'ultimatum (v'là tchi 'tait sans doute d'libéthé d'même) et l'Autriche-Hongrie dêcliathit la dgèrre contré la Sèrbie l'28 d'Juilet. La Russie, alliée d'la Sèrbie, c'mandit eune mobilîsâtion militaithe.

L'Allemangne avait dêjà promîns d'souôt'nîn la politique d'l'Autriche-Hongrie et l'31 dé Juilet d'livrit un ultimatum à la Russie. Lé 1 d'Août, l'Allemangne dêcliathit la dgèrre contré la Russie. Les trais grands empithes du continnent 'taient achteu en êtat d'dgèrre.

L'Allemangne avait plianné la dêfaite d'la France atout eune attaque dé surprînse lé travèrs des êtats neûtres d'la Belgique et du Luxembourg. L'Allemangne otchupit l'Luxembourg lé 2 d'Août, et dêcliathit la dgèrre contré la France lé 3 d'Août. L'armée Allemande entrit la Belgique lé 4 d'Août, v'là tchi provotchit eune dêcliathâtion d'dgèrre du Rouoyaume Unni tchi 'tait oblyigi dé d'fendre la neûtralité d'Belgique par un accord.

 

Y a co' de quei à vei' ou à ouï' entou'
la Preunmié Dgèrre Mondiale
sus les Coumuns à Viquipédie

 

Ch't' articl'ye-chîn est eune choutchette - Ajouôtez et amendez!