12 Songs Av Neil Diamond: Studioalbum av Neil Diamond

12 Songs er det 26. studioalbumet til Neil Diamond, gjeve ut i 2005. Det var produsert av Rick Rubin og vert stundom feilaktig omtalt som det første Diamond-albumet sidan Bang Records-tida der Diamond speler gitar.

Meldingar
Karakter
Kjelde	Karakter
Allmusic
Rolling Stone

Arbeidstittelen for albumet var berre Neil Diamond.

Arbeidet med albumet byrja etter Diamond var ferdig med turneen etter Three Chord Opera i 2002. Han reiste til hytta si i Colorado og var tidvis innesnødd der, slik at han fekk tid til å skrive nye songar. Ikkje lenge etter møtte Diamond Rick Rubin. Rubin var interessert i å arbeide med Diamond og dei to kom saman fleire gonger før dei gjekk i studio.

Rubin ønskte å nytte albuma Diamond laga for Bang og tidleg Uni som eit springbrett og oppfordra Diamond til å skrive songar det neste året. Då dei hadde mange nok songar, kalla Rubin inn somme av dei same musikarane han hadde nytta for Johnny Cash sine American Recordings, mellom anna Tom Petty-musikarane Mike Campbell og Benmont Tench, og oppfordra Diamond til å sjølv spele gitar i studio. Innspelingane vart dei aller siste for organisten Billy Preston, som døydde i juni 2006.

Det endelege resultatet, 12 Songs, vart eit av dei mest suksessrike og kritikarroste studioalbuma til Diamond på mange år og debuterte på fjerdeplassen på Billboard 200 i USA. Rubin påverka Diamond utover albumet og på den påfølgjande turneen nytta Diamond eit tettare og enklare arrangement på dei klassiske songane sine og spelte sjølv meir gitar på scenen enn han hadde gjort sidan 1970-åra.

Alle songar er skrivne av Neil Diamond.

• Neil Diamond - gitar, vokal.
• David Campbell - blåse- og strykearrangement.
• Mike Campbell - gitar
• Lenny Castro - perkusjon
• Smokey Hormel - gitar
• Larry Knechtel - piano
• Roger Joseph Manning jr. - piano
• Pat McLaughlin - gitar
• Jonny Polonsky - kontrabass, gitar
• Billy Preston -Hammond B3
• Jason Sinay - gitar
• Benmont Tench - orgel, piano
• Patrick Warren -Chamberlin

I november 2005 vart det kjend at Sony BMG distribuerte album med Extended Copy Protection eller XCP-vern, noko som installerte programvare på Microsoft Windows-maskinar plata vart starta på. Dette hindra plata frå å kunne kopierast og gjorde maskina utsett for farlege virusåtak gjennom den utrygge programvaren som vart installert. Rubin har sagt at han og Diamond var ukjend med dette og begge vart rasande.

I desember 2005 gav Sony BMG ut plata på ny utan dette kopivernet.