သင်္ကြန်မိုးသည် ၁၉၈၄ ခုနှစ်က ရိုက်ကူးခဲ့သော မြန်မာရုပ်ရှင် ဇာတ်ကား တစ်ကား ဖြစ်ပြီး ၁၉၈၅ ခုနှစ် မြန်မာ့ ရုပ်ရှင် ထူးချွန်ဆုပေးပွဲတွင် ဇာတ်ကားဆု၊ ဒါရိုက်တာဆု နှင့် ဓာတ်ပုံဆု အကယ်ဒမီ ဆု ၃ ခု ရရှိခဲ့သော ဇာတ်ကား တစ်ကား ဖြစ်သည်။ မန္တလေး သင်္ကြန်ကို နောက်ခံထား၍ ရိုက်ကူးထားပြီး သင်္ကြန်မိုး ဇာတ်ကားမှ ရုပ်ရှင်ဇာတ်ဝင် တေးသီချင်းများမှာ နှစ် ၂၀ ကျော် ကြာသည့်တိုင်အောင် သင်္ကြန် သီချင်းများ အဖြစ် ပရိသတ်များ အကြားတွင် ရေပန်းစားလျက် ရှိသည်။ ဇာတ်လမ်း အမည်ဖြစ်သော သင်္ကြန်မိုး တေးသီချင်းကို တေးရေးဆရာ အဉ္စလီမောင်မောင် က ရေးဖွဲ့ ပေးခဲ့သည်။
သင်္ကြန်မိုး | |
---|---|
သင်္ကြန်မိုး ရုပ်ရှင်ပိုစတာ | |
အခြေခံအချက်အလက် | |
ဒါရိုက်တာ | မောင်တင်ဦး |
ထုတ်လုပ်သူ | ဇော်မြင့် |
ဇာတ်ညွှန်း | အောင်စိုးဦး |
အခြေခံထားသည်မှာ | ခင်မောင်အေး ရေးသည့် သင်္ကြန်မိုး |
သရုပ်ဆောင် | နေအောင် ခင်သန်းနု ဇော်ဝမ်း ဇင်ဝိုင်း မေသန်းနု |
ဂီတမှူး | ဇော်မျိုးထွဋ် မြို့မကိုပေါ အဉ္ဇလီမောင်မောင် |
ဓာတ်ပုံ | ချစ်မင်းလူ |
တည်းဖြတ် | မြင့်ခိုင် (မောင်သစ္စာ) |
ကြာမြင့်ချိန် | ၁၂၆ မိနစ် |
နိုင်ငံ | မြန်မာ |
ဘာသာစကား | ဗမာ |
အမျိုးအစားခွဲခြင်းနှင့် ဖြန့်ဖြူးခြင်း | |
ဖြန့်ချိသည့်နေ့ | ၁၉၈၅ |
ထုတ်ဝေသူ | သူရိယပညာ ရုပ်ရှင် |
ဂီတသမား တစ်ဦးဖြစ်သော စန္ဒရားငြိမ်းမောင်မှာ သူဌေးသမီး ခင်ခင်ထားနှင့် ချစ်ကြိုက်ခဲ့သည်။ ငြိမ်းမောင်မှ ခင်ခင်ထားအား ခိုးပြေးရန် ချိန်းဆိုထားသော နေ့တွင် အချိန်မီ ရောက်မလာနိုင်ခဲ့ဘဲ ခင်ခင်ထား၏ မိဘများမှ ပြန်လည် ခေါ်ယူသွားကာ မိဘချင်း သဘောတူထားသူနှင့် ပေးစားခဲ့သည်။ ငြိမ်းမောင်မှာ အိမ်ထောင်ကျ၍ သက်ထွေးဆိုသော သားတစ်ဦး မွေးဖွားခဲ့သည်။ ခင်ခင်ထားမှာလည်း နွယ်နွယ်ဆိုသော သမီးတစ်ဦး မွေးဖွားခဲ့သည်။
သင်္ကြန်ပွဲတော် နီးကပ်လာသော အခါ သက်ထွေးတို့၏ မိတ်ဆွေ ကိုလတ်သည် မန္တလေးသို့ ရောက်လာခဲ့သည်။ သင်္ကြန်ပွဲတော်တွင် အလှပြကားဖြင့် လှည့်လည် ဖျော်ဖြေရန် သီချင်းတိုက်နေစဉ် ကိုငြိမ်းမောင်မှ သက်ထွေးနှင့် အတူ တီးမှုတ်မည့် သူများမှာ ခင်ခင်ထား၏ သားသမီးများ ဖြစ်ကြောင်း သိရှိသွားသဖြင့် သက်ထွေးအား ဆက်မလုပ်ရန် တားမြစ်ခဲ့သည်။
သင်္ကြန် အတက်နေ့တွင်မှ သက်ထွေးက သူ၏ ဖခင် ကိုငြိမ်းမောင်၏ အရက်ကို ယူသောက်ရာမှ သားအဖချင်း စကားများကြသည်။ နောက်ဆုံးတွင် ကိုငြိမ်းမောင်မှ သက်ထွေးအား နောက်ဆုံးညတွင် ဖျော်ဖြေခွင့် ပေးလိုက်သည်။ ကိုလတ်မှ နွယ်နွယ်အား အတက်နေ့ညတွင် ဖွင့်ပြောမည်ဟု ပြောထားပြီး မဏ္ဍပ်သို့ အရောက်တွက် အထုပ် တစ်ထုပ် လက်ဆောင်ပေးခဲ့သည်။ အထုပ်ထဲတွင် သက်ထွေး၏ နွယ်နွယ်အား ချစ်ကြောင်း ရေးသားထားသော ဒိုင်ယာရီကို ထည့်သွင်း ပေးခဲ့သဖြင့် သက်ထွေးနှင့် နွယ်နွယ်တို့ အဆင်ပြေ သွားကြသည်။
သင်္ကြန်မိုး ရုပ်ရှင်ဇာတ်ကားသည် ၁၉၈၅ ခုနှစ် မြန်မာ့ရုပ်ရှင် ထူးချွန်ဆု ပေးပွဲတွင် အကောင်းဆုံး ဇာတ်ကားဆုကို လည်းကောင်း၊ အကောင်းဆုံး ဒါရိုက်တာဆုကို မောင်တင်ဦးမှ လည်းကောင်း၊ အကောင်းဆုံး ဓာတ်ပုံဆုကို ချစ်မင်းလူ မှလည်းကောင်း အသီးသီး ရရှိခဲ့သည်။
ဤဇာတ်ကားကို ရီမြင့်ရုပ်ရှင်ထုတ်လုပ်ရေးက ရိုက်ကူးခဲ့သော်လည်း ရုပ်ရှင်ထူးချွန်ဆုပေးပွဲတွင် ဇာတ်ကားဆု ရသော် သူရိယပညာရုပ်ရှင်က ရခဲ့သည်။ မန္တလေးရုပ်ရှင်ကုမ္ပဏီဒါရိုက်တာ အဖွဲ့ဝင် မိသားစုများမှ ဆင်းသက်လာသော ရီမြင့်ရုပ်ရှင်ထုတ်လုပ်ရေးသည် ထိုအချိန်က အစိုးရ၏ စီးပွားရေးမူအရ ပြည်ပကဖလင်ကို ဝယ်လို့မရသောကြောင့် ထုတ်ဝေခွင့်ရှိသော ရုပ်ရှင် ကုမ္ပဏီတွေနာမည်ယူကာ အစိုးရဆီမှ ဖလင်ဝယ် ရိုက်ကူးရခဲ့ခြင်းဖြစ်သည်။ ထို့ကြောင့် မင်းသား တက္ကသိုလ်မျိုးချစ်နဲ့ မင်းသမီး ခင်အုန်းမြင့်တို့ ပိုင်သော သူရိယပညာရုပ်ရှင်အမည်နှင့် ထုတ်ခဲ့ရသည်။ဒေါ်ခင်အုန်းမြင့်သည် ခင်သန်းနု၏ မိခင်နေရာမှ ဝင်ရောက်ရိုက်ကူးခဲ့သည်။
ရိုက်ကွင်းကို မန္တလေးဆိုင်းတန်းရပ်ရှိ ရီမြင့်ရုပ်ရှင် အဆောက်အအုံနှင့် ပွဲကုန်းရပ်ရှိ ဒေါက်တာသိန်းအောင်တိုက်တွင် ရိုက်ကူးခဲ့ကာ စန္ဒရားကိုငြိမ်းမောင်အိမ်အတွင်းခန်းကို ရန်ကုန်ရှိ စိန်မောင်စတူဒီယိုတွင် ရိုက်ကူးခဲ့သည်။
ဤကားကို ဝတ္ထု ခင်မောင်အေး (မန္တလေး)ဟု ဖော်ပြခဲ့သော်လည်း ဒါရိုက်တာမောင်တင်ဦး၏ ဇာတ်လမ်းသာ ဖြစ်မည်ဟု ဆိုကြသည်။ ခင်မောင်အေး (မန္တလေး)သည် ထိုစဉ်က သတင်းနှင့်စာနယ်ဇင်း ကော်ပိုရေးရှင်းတွင်ဦးဆောင်ညွှန်ကြားရေးမှူး တာဝန်ထမ်းဆောင်နေသော ဗိုလ်မှူးကြီးတယောက် ဖြစ်ကာ ဒေါ်အောင်ဆန်းစုကြည်၏ အစ်ကိုတဝမ်းကွဲ တော်သည်။ ထိုစဉ်က ဦးခင်မောင်အေး တန်ခိုးထွားနေချိန်ဖြစ်၍ ဝတ္ထုဇာတ်လမ်းတင်ရာမှာ ချောချောမွေ့မွေ့ ခွင့်ပြုချက်ရရန် ခင်မောင်အေး (မန္တလေး) ဝတ္ထုဟုဆိုကာ နာမည်တပ်ခဲ့ကြောင်း ပြောဆိုခဲ့ကြသည်။
ဤဇာတ်ကားကို စပြချိန်တွင် မျက်နှာသစ်သရုပ်ဆောင်များနှင့် ရိုက်ကူးထား၍ သိပ်မအောင်မြင်သော်လည်း နောက်ပိုင်းတွင် အင်မတန်အောင်မြင်ခဲ့သည်မှာ ယနေ့ထက်တိုင်ဖြစ်သည်။
ဇာတ်ကားထဲတွင် ပါဝင်သော အမျိုးသမီးများ၏ကျွန်တော် ဆိုသောစကားကို ဆင်ဆာဖြတ်ခံခဲ့ရသည်။
This article uses material from the Wikipedia မြန်မာဘာသာ article သင်္ကြန်မိုး, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). အကြောင်းအရာများကို အခြားမှတ်ချက်မရှိပါက CC BY-SA 4.0 အောက်တွင် ရရှိနိုင်ပါသည်။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မြန်မာဘာသာ (DUHOCTRUNGQUOC.VN) is an independent company and has no affiliation with Wiki Foundation.