စဉ့်ကူးမြို့နယ် သည် မြန်မာနိုင်ငံ၊ မန္တလေးတိုင်းဒေသကြီး၊ သပိတ်ကျင်းခရိုင်တွင် ပါဝင်သည့် မြို့နယ်တစ်ခုဖြစ်သည်။ မြို့နယ်ရုံးစိုက်ရာမြို့မှာ စဉ့်ကူးမြို့ဖြစ်သည်။
စဉ့်ကူးမြို့နယ် | |
---|---|
မြို့နယ် | |
သပိတ်ကျင်းခရိုင်အတွင်းတည်နေရာ | |
သပိတ်ကျင်းခရိုင်အတွင်းတည်နေရာ | |
ကိုဩဒိနိတ်: 22°32′N 95°59′E / 22.533°N 95.983°E | |
နိုင်ငံ | မြန်မာ |
တိုင်းဒေသကြီး | မန္တလေး |
ခရိုင် | သပိတ်ကျင်းခရိုင် |
မြို့နယ်ရုံးစိုက်ရာမြို့ | စဉ့်ကူးမြို့ |
လူဦးရေ (၂၀၁၄) | |
• စုစုပေါင်း | ၁၅၇,၅၈၅ |
အချိန်ဇုန် | မြန်မာစံတော်ချိန် (UTC+6:30) |
စဉ့်ကူးမြို့နယ်သည် အနော်ရထာမင်းတည်ထောင်ခဲ့သော ကင်းမြို့ ၄၃မြို့အနက် တစ်မြို့အပါအဝင်ဖြစ်သည်။ မြန်မာသက္ကရာဇ်၄၂၂တွင် တည်ခဲ့သည်။ ယခင်မြို့အမည်မှာ ငစဉ့်ကူးမြို့ဖြစ်ပြီး စဉ့်ကူးမင်းလက်ထက်တွင် မြို့ရိုး၊ပြအိုး၊ကျုံး၊စံနန်းတို့ဖြင့် စနစ်တကျတည်ဆောက်ခဲ့သော ရှေးဟောင်းမြို့ဖြစ်သည်။ ပြည်ထဲရေးဝန်ကြီးဌာန၏ ၁၂.၁၂.၁၉၇၂ခုနှစ်တွင် ထုတ်ပြန်ချက်အရ စဉ့်ကူးမြို့ကို မြို့အဖြစ်လည်းကောင်း၊၂၈.၂.၁၉၇၃ခုနှစ်တွင် ရပ်ကွက်၊ကျေးရွာအုပ်စု၊ကျေးရွာများကို ဖွဲ့စည်းခဲ့သည်။ မြို့နယ်အထွေထွေအုပ်ချုပ်ရေးရုံးကို ၁၉၅၄ခုနှစ် မတ်လ၁၁ရက်ကပင် ဖွင့်လှစ်ခဲ့သည်။
မြောက်လတ္တီတွဒ် ၂၂ဒီဂရီ ၁၇မိနစ်နှင့် ၂၂ဒီဂရီ ၄၉မိနစ် အကြား၊ အရှေ့လောင်ဂျီတွဒ် ၉၅ဒီဂရီ ၅၄မိနစ်နှင့် ၉၆ဒီဂရီ ၂၀မိနစ်အကြားတွင် တည်ရှိသည်။ ၅၄၄.၀၃စတုရန်းမိုင် ကျယ်ဝန်းသည်။
စဉ့်ကူးမြို့နယ်၏ အရှေ့ဘက်တွင် ရှမ်းပြည်နယ်ရှိ နောင်ချိုမြို့နယ်၊တောင်ဘက်တွင် မတ္တရာမြို့နယ်၊အနောက်ဘက်တွင် ဧရာဝတီမြစ်ခြားကာ စစ်ကိုင်းတိုင်းရှိ ဝက်လက်မြို့နယ်နှင့် ရွှေဘိုမြို့နယ်နှင့် မြောက်ဘက်တွင် သပိတ်ကျင်းမြို့နယ်တို့ တည်ရှိသည်။
ပင်လယ်ရေမြေနှာပြင်အထက် ပျှမ်းမျှ ၂၇၀ပေအထက်တွင်တည်ရှိသည်။ အမြင့်ဆုံးတောင်မှာ ဗောင်းတော်ကျတောင်ဖြစ်ကာ ၃၅၃၁ပေမြင့်သည်။ မြို့နယ်၏အရှေ့ဘက်သည် ရှမ်းပြည်နယ်နှင့် ဆက်စပ်နေ၍ တောင်ကုန်းတောင်တန်း ထူထပ်သောဒေသဖြစ်ကာ အနောက်ဘက်သည် ဧရာဝတီမြစ်ဖြစ်၍ မြေပြန့်လွင်ပြင်ဒေသဖြစ်သည်။ မြို့နယ်အတွင်းတွင် ဧရာဝတီမြစ်၊ ချောင်းတာရှည်ချောင်း၊ ကျောက်အိုးချောင်း၊ မာလဲချောင်းတို့စီးဆင်းနေသည်။ ရေချိုအင်း ၃၈အင်းရှိသည်။
စဉ့်ကူးမြို့နယ်တွင်နေထိုင်ကြသော တိုင်းရင်းသားလူမျိုးစုများတွင် ဗမာလူမျိုးများ အများဆုံးနေထိုင်ကြသည်။ ထို့နောက် ရှမ်း၊ချင်း၊ကရင်၊ကချင်၊ရခိုင်၊မွန်နှင့် ကယားလူမျိုးများ အစဉ်လိုက်များပြားစွာနေကြသည်။ ကိုးကွယ်မှုအနေဖြင့် ဗုဒ္ဓဘာသာကို အများဆုံး ကိုးကွယ်ကာ အစ္စလာမ်နှင့် ခရစ်ယာန်ကိုးကွယ်သူဦးရေမှာ အစဉ်လိုက်များပြားသည်။
စဉ့်ကူးမြို့နယ်သည် မန္တလေးတိုင်းအတွင်းရှိ စီးပွားရေးဖွံ့ဖြိုးမှု နှေးကွေးသော မြို့နယ်ဖြစ်သည်။ မြို့နယ်နေလူထုသည် စိုက်ပျိုးရေးလုပ်ငန်းကို အဓိကလုပ်ကိုင်ကြသည်။ မြို့နယ်၏ အဓိကထွက်ကုန်မှာ စပါး၊ မြေပဲနှင့် ပဲမျိုးစုံဖြစ်ကာ မန္တလေးမြို့သို့ အများဆုံး တင်ပို့ရောင်းချသည်။ မန္တလေးနှင့် ရွှေဘိုမြို့တို့မှ စားသောက်ကုန်နှင့် လူသုံးကုန်ပစ္စည်းများကို အဓိကတင်သွင်းသည်။ ပုဂ္ဂလိကစက်ရုံ ၁၆ရုံ၊ အိမ်တွင်းစက်မှုလက်မှုလုပ်ငန်း ၅၁ခုရှိသည်။ မြို့နယ်အတွင်း ရွှေအနည်းငယ်တူးဖော်သည်။
စဉ့်ကူးမြို့နယ်အတွင်းတွင် ဧရာဝတီမြစ်ကြောင်းသွားလာရေးရှိသည်။ မန္တလေး၊ မိုးကုတ်နှင့် ရွှေဘိုမြို့များသို့ ကားလမ်းများရှိသည်။ ရွှေဘိုမြို့နယ်နှင့် စဉ့်ကူးမြို့နယ်ကို ဧရာဝတီတံတား (ရတနာသိင်္ဃ)နှင့် ဆက်သွယ်ထားသည်။
အထက်တန်းကျောင်း ၇ကျောင်းရှိသည်။
မူလတန်း၊မူလွန်၊အလယ်တန်း(ခွဲ) ၁၀၁ကျောင်းရှိသည်။
This article uses material from the Wikipedia မြန်မာဘာသာ article စဉ့်ကူးမြို့နယ်, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). အကြောင်းအရာများကို အခြားမှတ်ချက်မရှိပါက CC BY-SA 4.0 အောက်တွင် ရရှိနိုင်ပါသည်။ Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki မြန်မာဘာသာ (DUHOCTRUNGQUOC.VN) is an independent company and has no affiliation with Wiki Foundation.