Virtual International Authority File: Progètto internaçionâle

O l'é 'n progètto conzónto de vàrie bibliotêche naçionâli e o l'é òperòu da l'Online Computer Library Center (OCLC).

ZE	Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno

A discusción in sciô fæto d'avéi 'n'outoritæ internaçionâle comùn a l'é incomensâ a-a fìn di ànni '90. Dòppo o faliménto de 'na série de tentatîvi de creâ 'n sôlo eleménto digitâle comùn, a nêuva idêa a l'é stæta quélla de colegâ e despægie outoritæ internaçionâli za existénti. Fæto ch'o l'aviéiva portòu a tùtti i vantàggi de 'na gestión centralizâ, sénsa però domandâ 'n grànde investiménto de ténpo e de dinæ pi-â sò inplementaçión.

O concètto do VIAF o l'é stæto introdûto a-o World Library and Information Congress do 2003, òrganizòu da l'International Federation of Library Associations. O progètto o l'é stæto creòu da-a Bibliotêca do Congrèsso di Stâti Unîi (LC), da-a Bibliotêca naçionâle tedésca (DNB) e da l'OCLC a-i 6 de agósto do 2003. A Bibliotêca naçionâle de Frànsa (BnF) a l'é intrâ into progètto a-i 5 de òtôbre do 2007.

O progètto o l'é diventòu 'n servìçio de l'OCLC a-i 4 d'arvî do 2012.

L'òbietîvo o l'é quéllo de colegâ i vàrri contròlli de outoritæ naçionâli (cómme o German Name Authority File) a 'n sôlo contròllo de outoritæ virtoâle. Inte quésto eleménto virtoâle són coleghæ fra de lô e mæxime anotaçioìn de divèrse série de dæti. 'N eleménto VIAF o riçéive 'n çèrto nùmero de dæti stàndard, tra i quæ a gh'é de anotaçioìn "véddi" e "véddi ascì" che rimàndan a-i dæti òriginâli. I dæti són mìssi a dispoxiçión in sciâ Ræ pe efetoâ de riçèrche e pe-o sò scàngio e condivixón. L'agiornaménto recìproco di dæti o l'é fæto gràçie a-o protocòllo Open Archives Initiative Protocol for Metadata Harvesting (OAI-PMH).

I nùmeri identificatîvi di file VIAF vêgnan azónti a-e vôxe biogràfiche de Wiki ascì, atravèrso a sò incluxón inti eleménti Wikidæta.

A Christine L. Borgman a conscìdera i VIAF insémme a-i scistêmi ISNI e ORCID, descrivéndo tùtti tréi cómme di "sfòrsi vagaménte cordinæ pe standardizâ e fórme di nómmi". Pi-â Borgman són tréi scistêmi caraterizæ da-o fæto d'êse di tentatîvi pe risòlve o problêma da dizanbigoaçión do nómme de l'outô, ch'o l'é diventòu de lóngo ciù grànde co-a moltiplicaçión da quantitæ di dæti. Lê a l'à ànche notòu cómme o VIAF, a diferénsa di âtri doî scistêmi, o l'é goidòu da-e bibliotêche e no da-i sénci outoî ò creatoî.

L'algorìtmo de clustering do VIAF o l'é ezegoîo 'na vòtta ògni méize. Coscì cómme, co-o ténpo, vêgnan azónti ciù dæti da-e bibliotêche parteçipànti, i grùppi di contròlli de outoritæ pêuan fóndise ò separâse, portàndo a 'na çèrta variaçión inte l'identificatô VIAF pe çèrti contròlli de outoritæ.

Bibliotêche azónte pe prêuva

• (EN) Christine L. Borgman, Big Data, Little Data, No Data: Scholarship in the Networked World, MIT Press, 2015, ISBN 0-262-32787-2.

•   Wiki Commons a contêgne di files in sce Virtual International Authority File

• (EN) Scîto ofiçiâ, in sce viaf.org. URL consultòu o 6 novénbre 2021.
• (EN) VIAF, OCLC. URL consultòu o 6 novénbre 2021.