Քաջարանի Պղինձ-Մոլիբդենային Հանքավայր

Մոնցոնիտների և պորֆիրիտների միջև տեղադրված է կոնտակտային եղջրաքարերի լայն գոտին։ Հանքավայրի հիմնական հանքավերահսկող ստրուկտուրան Դեբաքլուի խզվածքն է։ Այն արտահայտված է հզոր (100 մ) բեկորատված զոնայով և ձգվում է մոնցոնիտների ու պորֆիրանման գրանիտների կոնտակտով։ Հանքայնացումը տեղաբաշխված է մոնցոնիտներում։ Հանքավայրի երկրաբանակն կառուցվածքում առկա են և կարևոր նշանակություն ունեն նաև գրանոդիորիտ–պորֆիրային, դիորիտ–պորֆիրային դայքաները, կերսանտիտները, օդինիտները և սպեսարտիտները։ Հանքայնացումն արտահայտված է երեք մորֆոլոգիական տիպերով՝ շտոկվերկային, երակային և ցանային։ Հանքավայրում սահմանված է 10 միներալային ասոցիացիա, որոնցից արդյունավետ են քվարցմոլիբդենայինը, քվարցմոլիբդեն–խալկոպիրիտայինը և քվաբցխալկոպիրիտայինը։ Հիմնական հանքային միներալներն են՝ մոլիբդենիտը, խալկոպիրիտը, մագնետիտը և պիրիտը։ Հանքավայրում պարզորոշ դրսևորված է օքսիդացման զոնան, որը ներկայացված է լիմոնիտով, գյոթիտով, մալաքիտով, ազուրիտով, կուպրիտով և բնածին պղնձով, իսկ մոլիբդենի միներալներից՝ պովելլիտով և ֆեռոմոլիբդիտով։ Հանքավայրից ստանում են մոլիբդենի և պղնձի հարստանյութ։ Հանքանյութերում հանդիպում են նաև հազվագյուտ, ցրված և ազնիվ տարրեր՝ ռենիում, սելեն, տելուր, բիսմուտ, ոսկի, արծաթ։ Քաջարանի պղնձամոլիբդենային հանքավայրը դասվում է միջին խորություններում ձևավորված բարձր–միջին ջերմաստիճանային հիդրոթերմալ տիպին։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից։

Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայաստանի բնաշխարհ հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։