Ավելի Ուժեղ

Ավելի ուժեղ անգլ.՝ Stronger
Երկիր	ԱՄՆ
Ժանր	կենսագրական ֆիլմ և դրամա
Թվական	սեպտեմբերի 22, 2017, դեկտեմբերի 1, 2017 և ապրիլի 19, 2018
Լեզու	անգլերեն
Ռեժիսոր	Դևիդ Գորդոն Գրին
Պրոդյուսեր	Ջեյք Ջիլենհոլ
Սցենարի հեղինակ	Ջոն Պոլոնո
Դերակատարներ	Ջեյք Ջիլենհոլ
Օպերատոր	Սին Բոբիտ
Երաժշտություն	Մայքլ Բրուք
Մոնտաժ	Դիլան Թիչենոր
Պատմվածքի վայր	Բոստոն
Տևողություն	119 րոպե
Պաշտոնական կայքէջ
Stronger (film) Վիքիպահեստում

Ֆիլմի համաշխարհային պրեմիերան տեղի է ունեցել Տորոնտոյի կինոփառատոնում 2017 թվականի սեպտեմբերի 8-ին, իսկ ԱՄՆ կինոթատրոններում այն սկսել է ցուցադրվել 2017 թվականի սեպտեմբերի 22-ից։

Ջեֆ Բաումանը (Ջեյք Ջիլենհոլ) Բոստոնի բնակիչ է, լավ, բայց ոչ հաջողակ մարդ, որն աշխատում է Costco-ում և ապրում երկու ննջասենյակ ունեցող ոչ մեծ բնակարանում իր ալկոհոլամոլ մոր՝ Փեթիի (Միրանդա Ռիչարդսոն) հետ։ Մի անգամ տեղի բարում Ջեֆը հանդիպում է իր նախկին ընկերուհուն՝ Էրինին (Տատյանա Մասլանի), որին գրավում էր Ջեֆի բարությունն ու հմայքը, սակայն նա մշտապես հիասթափվում էր նրա մոտ ինքնավստահության պակասից։ Իմանալով, որ Էրինը պատրաստվում է մասնակցել Բոստոնի մարաթոնին, որպեսզի փող հավաքի այն հիվանդանոցի համար, որտեղ ինքն աշխատում է, Ջեֆը բարի հաճախորդներին խնդրում է գումար նվիրաբերել, ապա խոստանում է, որ վերջնագծի մոտ կսպասի Էրինին մեծ ցուցանակով։

Մարաթոնի օրը Ջեֆը կարողանում է եզրագծին հասնել Էրինից շուտ։ Երբ աղջիկը մոտենում է մրցատարածության վերջին, ռումբ է պայթում հենց այն տեղում, որտեղ կանգնած էր Ջեֆը։ Նրան հասցնում են հիվանդանոց, որտեղ կտրում են երկու ոտքերը ծնկից վերև։ Երբ Ջեֆը գիտակցության է գալիս, ասում է եղբորը, որ տեսել է ահաբեկչի պայթյունից առաջ։ Փեթին կանչում է Հետաքննությունների դաշնային բյուրոյի աշխատակիցներին, և Ջեֆը նկարագրում է Թամերլան Ցարնաևին։ Մի քանի օր անց տեղական իշխանությունները ձերբակալում են Թամերլանի եղբորը՝ Ջոխար Ցարնաևին, և Ջեֆն իրեն զգում է որպես հերոս։

Ջեֆն ամեն կերպ փորձում է հարմարվել իր նոր կարգավիճակին, ինչպես նաև իր վաստակած փառքին։ Փեթին մի քանի հարցազրույց է տալիս և մշտապես որդուն շրջապատում թղթակիցներով վերականգնողական բուժումների ժամանակ։ «Բոստոն Բրյուինզը» Ջեֆին ու նրա ընտանիքին հրավիրում է Սթենլիի գավաթի խաղարկության եզրափակչին, որտեղ նրան խնդրում են ծածանել դրոշը խաղերի բացման արարողության ժամանակ։ Ամբոխի ցրնծությունը Ջեֆի մոտ առաջացնում է ցավ պատճառով հիշողություններ, և նա խուճապի մեջ է ընկնում վերելակում։ Էրինը հանգստացնում է նրան և պնդում, որ նա զրուցի իր ընտանիքի հետ իր հոգեվիճակի փխրունության ու այն մասին, թե ինչպես է իր վրա ազդում նոր ձեռք բերած փառքը։ Ավելի ուշ՝ նույն գիշերը, նրանք զբաղվում են սիրով առաջին անգամ պայթյունից հեո։

Փեթին կազմակերպում է, որ որդին հարցազրույց տա Օփրա Ուինֆրիին, սակայն չի ասում նրան այդ մասին։ Դա Էրինին ստիպում է Փեթիին ասել, որ զանգվածային լրատվամիջոցների մշտական ուշադրությունն ուժեղացնում է Ջեֆի հետտրավմատիկ խանգարումը։ Փեթիի ու Էրինի վեճից հետո Ջեֆն ի վերջո խոստովանում է, որ ինքն այլևս չի ուզում հարցազրույց տալ։ Մայրն ասում է, թե ինքը միայն ուզում է, որ աշխարհը տեսնի, թե ինչքան բացառիկ է իր որդին։ Շուտով Ջեֆի մոտ վերսկսվում են նրա վատ սովորությունները, այդ թվում ալարկոտությունն ու խմելու հակումը։ Նա սկսում է բաց թողնել բուժման կուսերը գիշերային երկարատև գինարբուքների պատճառով։ Փեթին նույնպես գրեթե միշտ գտնվում է ալկոհոլի ազդեցության տակ։ Մի անգամ Էրինը, որը տեղափոխվել էր Ջեֆի մոտ, Փեթին գտնում է բազմոցին քնած, իսկ Ջեֆին՝ լոգարանում ընկած անգիտակից վիճակում։ Նա Փեթիին մեղադրում է եսասիրության ու անուշադրության համար, ապա Ջեֆին առաջարկում տեղափոխվել իր մոտ ու հրաժարվել մորից։ Էրինը հեռանում է միայնակ՝ թողնելով Ջեֆին ու Փեթիին։

Նույն գիշերը Ջեֆը գնում է բար՝ խմելու իր եղբայրների հետ։ Բարի երկու հաճախորդներ սկսում են նրան հարցեր տալ ահաբեկչությա վերաբերյալ՝ ակնարկելով, որ դա եղել է կառավարության դավադրությունը, որպեսզի պատերազմ սկսվի Իրանի հետ, և Ջեֆին վճարել են, որ նա իրեն ձևացնի որպես զոհ, և արդյունքում տեղի է ունենում կռիվ։ Նույն գիշերը՝ ավելի ուշ, Էրինը զանգում է նրան ու ասում, որ հղի է։ Ջեֆը խուճապի է մատնվում ու ասում, որ ինքը պատրաստ չէ հայր դառնալ, և Էրինը նրան կշտամբում է այն բանի համար, որ նա մշտապես փախչում է իր խնդիրներից։ Էրինը նրան մենակ է թողնում մեքենայում՝ չհանելով հաշմանդամի սայլակը մեքենայից և մտնում է տուն ու հավաքում իրերը։ Ջեֆը սողում է դեպի դռները և զգում հետտրավմատիկ սթրեսի բռնկում իր ողջ ուժով։

Ջեֆի հանդիպում է Կառլոս Արեդոնոյի (Կառլոս Սանս) հետ, որը նրան օգնել էր պայթունից անմիջապես հետո՝ փրկելով նրա կյանքը։ Կառլոսը նրան պատմում է ծովային հետևակում ծառայած իր որդու մասին, որը զոհվել է Իրաքում։ Ինքնասպանության փորձից հետո Կառլոսն ստիպված է եղել իր որդու թաղմանը մասնակցել պատգարակի վրա։ Նրա կրտսեր որդին, չկարողանալով համակերպվել ավագ եղբոր մահվան ու հոր մշտական սթրեսի հետ, ինքնասպանություն է գործել։ Կառլոսը խոստովանում է, որ Ջեֆին փրկելն իրեն օգնել է հաշտություն կնքել իր որդիների մահվան ու այն մեղքի հետ, որ ինքը դրել էր իր վրա։ Ջեֆն սկսում է հասկանալ, որ ապրելու իր ցանկությունը մխիթարում է մարդկանց։ Նա դադարեցնում է խմելն ու սկսում լրջորեն վերաբերվել իր բուժմանը։ Նա հաղորդագրություն է ուղարկում Էրինին, ներողություն խնդրում իրար արածի համար և խոստանում լիովին պատասխանատվություն կրել իր արարքների համար։ Մի քանի օր անց նա ու Կառլոսը կատարում են առաջին նետումը «Բոստոն Ռեդ Սոքսի» խաղում։ Խաղից հետո տասնյակ մարդիկ շրջապատում են Ջեֆին ու պատմում, թե ինչքան ուժեղ է ազդել նա իրենց կյանքի վրա։

• Ջեյք Ջիլենհոլ – Ջեֆ Բաուման
• Տատյանա Մասլանի – Էրին Հյորլի, Ջեֆի ընկերուհին
• Միրանդա Ռիչարդսոն – Փեթի Բաուման, Ջեֆի մայրը
• Ռիչարդ Լեյն կրտսեր – Սալլի
• Քլենսի Բրաուն – Ջեֆ Բաուման ավագ, Ջեֆի հայրը
• Ֆրենկի Շոու – Գեյլ Հյորլի, Էրինի քույրը
• Ջիմի Լեբլան – Լարի
• Կառլոս Սանս – Կառլոս Արեդոնդո
• Փեթի Օ'Նիլ – Ջեն

2014 թվականի հուլիսի 14-ին հայտնի է դարձել, որ Lionsgate ընկերությունը մշակում է ֆիլմ՝ հիմնված Ջեֆ Բաումանի «Ավելի ուժեղ» կենսագրական գրքի վրա, որը գրում է Ջոն Պոլոնոն։ 2015 թվականի հուլիսի 17-ին պայմանագիր է կնքվել ռեժիսոր Դևիդ Գորդոն Գրինի հետ։ Հուլիսի 29-ին հայտարարվել է, որ Ջեյք Ջիլենհոլը կմարմնավորի Բաումանին, իսկ հոկտեմբերի 7-ին նախագծին է միացել Տատյանա Մասլանին՝ կատարելու Ջեֆի ընկերուհու՝ Էրին Հյորլիի դերը։ 2016 թվականի փետրվարի 2-ին Bold Films ընկերությունը պայմանագիր է կնքել ֆիլմի արտադրության ու ֆինանսավորման վերաբերյալ։ Ապրիլի 5-ին ֆիլմին են միացել Միրանդա Ռիչարդսոնն ու Քլենսի Բրաունը։ Նույն ամսում դերասանական անձնակազմին է միացել Ֆրենկի Շոուն։

Նկարահանումներ

Ֆիլմի նկարահանումներն սկսել են Բոստոնում 2016 թվականի ապրիլի 4-ին։

ԱՄՆ-ում և Կանադայում ֆիլմի շահույթը կազմել է 4,2 մլն դոլար, իսկ մյուս երկրներում՝ 3,5 մլն դոլար։ Ֆիլմի բյուջեն կազմել էր 30 մլն դոլար։

«Ավելի ուժեղ» ֆիլմը թողարկվել է Lionsgate և Roadside Attractions ստուդիաների կողմից 2017 թվականի սեպտեմբերի 22-ին։ Ֆիլմն իր նորամուտը կատարել է 574 կինոթատրոններում և հավաքել 1,6 մլն դոլար առաջին ուիքենդում՝ զբաղեցնելով 8-րդ տեղն ըստ դրամարկղային շահույթի։ Երկրորդ ուիքենդում, չնայած այն հանգամանքին, որ ֆիլմն արդեն ցուցադրվել է 645 կինթատրոններում, այն զբաղեցրել է 13-րդ տեղը, իսկ շահույթը նվազել է 42 %-ով՝ կազմելով 923 412 դոլար։

Քննադատների արձագանքներ

Rotten Tomatoes կայքում ֆիլմն ունի 92 % վարկանիշ 166 գրախոսությունների հիման վրա, որոնց միջին գնահատականը կազմել է 7,5 հնարավոր 10-ից։ Կայքի գրախոսությունում ասվում է. «Ֆիլմն ունի լավ ընտրված դերասանական կազմ, որպեսզի առաջարկի զգացմունքային տեսանկյունից ձգող պատմություն՝ հիմնված իրական դեպքերի վրա, որը գերազանցում է ոգեշնչող դրամատիկական կլիշեները»։ Metacritic կայքում ֆիլմն ստացել է 100 հնարավորից 76 միավոր 41 քննադատների գրախոսությունների հիման վրա, ինչը համապատասխանում է «հիմնականում բարենպաստ արձագանքներ» կարգավիճակին։ CinemaScore-ի կողմից հարցված լսարանը ֆիլմին տվել է A- գնահատական A+-ից մինչև F սանդղակում։