Kaka Mallam Yale

An haifi Kaka Mallam Yale a watan Janairun shekarar alif 1953, a garin Yale da ke gundumar Konduga . A shekarar alif 1982, ya yi karatu a Jami’ar Maiduguri inda ya yi Diploma a fannin Gudanarwa (DPA). Ya yi karatun BSc a fannin kimiyyar siyasa a jami'ar Maiduguri a shekarar 1990.

Alhaji Kaka Mallam Yale ya yi aiki a matsayin ma’aikacin gwamnati a mukamai daban-daban, kuma a shekarar alif 1994, ne gwamnatin soja ta nada shi shugaban karamar hukumar Konduga . An zaɓe shi shugaban karamar hukumar Konduga daga shekarar alif 1999 zuwa 2002. A mataki na jiha ya rike mukamai a sassa daban-daban, ciki har da kasancewarsa shugaban gidan rediyon Borno kadai.

An zaɓe shi a majalisar wakilai ta kasa, mai wakiltar mazabar Konduga, Mafa da Dikwa a matsayin dan jam’iyyar United Nigeria Congress Party (UNCP) a shekarar alif 1998, amma kwacewar sojoji ya hana shi zama. A watan Satumbar shekarar 2005. ya zama Kwamishinan Ilimi na Jihar Borno.

 

An zaɓi Kaka Mallam Yale a matsayin dan majalisar dattawan Najeriya mai wakiltar mazaɓar Borno ta tsakiya a shekarar 2007, inda ya tsaya a jam'iyyar All Nigeria People's Party (ANPP). An nada shi a kwamitocin Sojoji, Harkokin Cikin Gida, Kuɗi, Kafa & Sabis na Jama'a da Ilimi A matsayinsa na Sanata, bai ƙaddamar da wani kudiri ba, amma a wasu lokuta yana ba da gudummawa ga muhawara.

Ba a ganinsa a matsayin babbar murya ga mazaɓar sa. 

A wata hira da aka yi da shi a watan Agustan shekarar 2008. ya kare jam’iyyar ANPP, amma ya ce abin takaici ne cewa ANPP ta shiga gwamnatin hadin kan kasa maimakon zama jam’iyyar adawa ta gaskiya. A cikin watan Disamba na shekarar 2008, ya soki Kamfanin Mai na Najeriya, yana mai cewa ba su da fasahar gano mai a cikin tafkin Chadi, kuma ya ba da shawarar a bai wa kamfanoni masu zaman kansu aikin.

Ana kallonsa a matsayin wanda zai maye gurbin gwamnan jihar Borno, Ali Modu Sheriff a zaben shekarar 2011. amma ya kasa cimma hakan.