Gjenue

Gjenue e je logade tal mieç de Ligurie, dilunc di cirche 42 chilometris di cueste, ae estreme bande ocidentâl de Riviere di Jevât. Daûr dal puart e des frazions costieris, si cjatin i prins rilêfs dai Apenins. La citât e je dominade de 'Lanterne, un fari alt 117 metris, visibil a 30 chilometris, che al è il simbul de citât.

La storie di Gjenue e je, in dut câs, influençade dal mâr, di simpri pont di riferiment de metropoli. La citât e fo une des Republichis marinaris, insiemit a Vignesie, Pise e Amalfi.

Probabilmentri, il periodi plui florit pe citât al fo i vot secui di Republiche: Gjenue e jere la capitâl di un stât che al comprendeve scuasit dute la Ligurie, la Corsiche, il bas Piemont e la isule di Capraie.

Tal 1814, il teritori de Republiche al fo anetût al Ream di Sardegne, daspò des decisions dal Congrès di Viene.

Il XX secul, e in particolâr il periodi dal Fassisim, al viôt la creazion de Grande Gjenue: in altris peraulis, la union di plui di vincj comuns dal litorâl, come Nervi, Pegli, Sampierdarena, Voltri e altris, par creâ une uniche grande metropoli, dilunc di dute la Marine di Gjenue.

• Sît ufiziâl dal comun