La Vichipedie e je une enciclopedie libare, basade su Internet che e dopre il software wiki.
Il contignût al è zontât di utents volontariis e il progjet al è sponsorizât de fondazion Wikimedia. E à edizions in plui di 200 lenghis di dut il mont e inclût sei argoments classics par une enciclopedie, sei elements che a son plui leâts a lunaris, sei argoments di atualitât. Il so fin al è di creâ e distribuî une enciclopedie libare in plui lenghis che si pues; il sît de Vichipedie al è un dai plui visitâts te rêt Internet, cun cirche 60 milions di contats ogni dì.
Dut il contignût de Vichipedie al è dât fûr cule licence GNU Free Documentation License (GFDL), che e lasse la pussibilitât di tornâlu a distribuî, creâ progjets derivâts e ancje doprâlu par ûs comerciâl, a pat di segnalâ i siei autôrs e garantî che il gnûf contignût al sei ancjemò disponibil sot de stsse GFDL.
La Vichipedie e dopre il software libar Mediawiki suntun cluster di servidôrs logâts in Floride e in trê altris puescj ator pal mont: 202 machinis in Floride, 3 dongje Parîs, 11 a Amsterdam e 23 tes instalazions coreanis di Yahoo!. MediaWiki e je la fase III dal program. Al inizi, la Vichipedie e doprave UseModWiki creât di Clifford Adams (fase I). Tai prins timps pai leams si scugnive doprâ la convenzion CamelCase; po chest probleme al è stât risolt e al è stât pussibil doprâ lis doplis parentesis. Intal Zenâr dal 2002 si è passâts a un motôr wiki in PHP suntune base di dâts MySQL; chest program, fase II, al è stât scrit apueste pe Vichipedie di Magnus Manske. Plui tart a son stâts implementâts un grum di mioraments par stâ daûr ae difusion e al ûs simpri plui grant dal progjet. Finalmentri, il software al fo tornât a scrivi di Lee Daniel Crocker. Instalade tal Lui dal 2002, cheste fase III dal program e je stade clamade MediaWiki. E je dade fûr sot de licence GNU GPL e al ven doprât di ducj i progjets de fondazion Wikimedia.
La edizion furlane di Wikipedia, clamade Vichipedie par adatâsi ae lenghe e ae grafie furlane, e je nassude ai 25 di Zenâr dal 2005 e ai 14 di Lui dal 2006 a sin rivâts a vê 1000 vôs; ai 22 di Avrîl 2007, cu la vôs Laurenzi si à rivât a cuote 2000 vôs, cuntun increment notevul. Al moment il numar di vôs inte Vichipedie al è di 4 028.
This article uses material from the Wikipedia Furlan article Vichipedie, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Il contignût al è disponibil sot de licence CC BY-SA 4.0 se nol è specificât in altre maniere Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Furlan (DUHOCTRUNGQUOC.VN) is an independent company and has no affiliation with Wiki Foundation.