Atimw

E tašitwâw awesîsac, nîštam atim cî awahkâniwîtce. Cî cištâpatisiw atim. Cî âpacihâkaniwiw e natawahot nešt e otâpet. Âskaw cî wîcewâkanitotawâkaniwiw. Âta mâk ekâ âpacihâkaniwiw an awahkân anohcîš ôte iyiniw-ascîhc, yâpic kanaweyimâkaniwiw e wîcewâkanitotawâkaniwit. Nešt mâk, âtayôhkâtâkaniwiw atim. E nâpewit atim, nâpeštim^w išinihkâtâkaniwiw. E iskwewit mâk, iskweštim^w neštamik^w nôšeštim^w išinihkâtâkaniwiw.

Aniyâ John Blackned (~1894-?), anite Wâskâhikanišihc kâ ohcît, cî cîhkâyeyihtâkosiw e kašcihot e âtayôhcet. Cî tipâcimew atimwa. Anite âtayôhkânihc, ihtâw iskwew e wîcit e peyakošišit. Otihtikow mâk atimwa nešt cihcipayihtâyiwa e pimâcihikot e natawahikot ohci. Ek^w wenâpemit aniyiwa atimwa - cek otawâšišîmiwac. Ek^w kâyotamikotwâw nâpewa e wî wîwiyitwâw. Ihtôtam an iskwew mwehc ekâ e onâpemimât aniyiwa atimwa wes namawîy nataweyihtam cecî cisceyihtâkwaniyic. Ek^w nepahât aniyiwa iskwewa e ispiš-ohteyihtahk an atim^w. Ek^w cehcipahtât ekâ cecî nipahikot aniyiwa nâpewa kâ peci-cîyoteyitwâw.