«Кастусь Каліноўскі сярод паўстанцаў 1863 году» — карціна Пётры Сергіевіча, напісаная ў 1936 годзе.
Кастусь Каліноўскі сярод паўстанцаў 1863 году | |
Мастак | Пётра Сергіевіч |
---|---|
Год | 1936 |
Месцазнаходжаньне | Гарадзенскі гісторыка-археалягічны музэй |
Карціна паказвае сустрэчу Кастуся Каліноўскага, аднаго з кіраўнікоў нацыянальна-вызвольнага паўстаньня 1863—1864 гадоў, з паўстанцамі. Сустрэча праходзіць на лясным узьлеску. К. Каліноўскі стаіць у цэнтры, ля вогнішча, яго атачаюць верныя паплечнікі. Вакол К. Каліноўскага стаяць прадстаўнікі беларускай шляхты, былыя вайскоўцы, але большасьць тых, хто сабраўся на сустрэчу — сяляне і касінеры, узброеныя сякерамі і вэртыкальна насажанымі на шасты косамі.
Пётра Сергіевіч, чые сьветапогляды фармаваліся пад уплывам нацыянальна-вызвольнага руху Заходняй Беларусі, у 1930-х гадах стварае партрэт К. Каліноўскага, робіць некалькі эскізаў, а ў 1936 годзе — першы варыянт тэматычнай карціны «Кастусь Каліноўскі сярод паўстанцаў».
Слонімская мастачка Алена Бялецкая ў часы фашысцкай акупацыі ў 1943 годзе да 80-годзьдзя з пачатку паўстаньня напісала на заказ дырэктара Слонімскага музэю І. Стаброўскага партрэт К. Каліноўскага і зрабіла копію з карціны П. Сергіевіча «Кастусь Каліноўскі сярод паўстанцаў». Гэтая карціна заняла пачэснае месца ў адной з заляў музэю, але хутка абудзіла ў немцаў непрыемныя асацыяцыі і яны загадалі зьнішчыць яе, а мастачка была пасаджана ў турму. Партрэт Каліноўскага і іншыя карціны захаваў І. Стаброўскі, яны і па сёньняшні дзень знаходзяцца ў музэі г. Слоніму.
У 1948 годзе Пётра Сергіевіч стварае другі варыянт жывапіснай карціны «Кастусь Каліноўскі сярод паўстанцаў 1863 году», у 1965 — трэці, які знаходзіцца ў Мастацкім музэі Летувы.
Па сёньняшні дзень карціна Пётры Сергіевіча «Кастусь Каліноўскі сярод паўстанцаў 1863 году» зьяўляецца адной з самых яркіх мастацкіх работ, якая вобразна раскрыла веліч К. Каліноўскага і гістарычную значнасьць паўстаньня 1863 году.
This article uses material from the Wikipedia Беларуская (тарашкевіца) article Кастусь Каліноўскі сярод паўстанцаў 1863 году (карціна), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.