Суда́к — драпежная рыба сямейства акунёвых.
Судак | |
Судак (Sander lucioperca) | |
Клясыфікацыя | |
---|---|
Царства | Жывёлы |
Атрад | Акунепадобныя |
Сямейства | Акунёвыя |
Бінамінальная намэнклятура | |
Sander lucioperca | |
Цела прадаўгаватае, сьціснутае з бакоў, пакрытае шчыльнай лускай. Завостраны лыч, на сківіцах і паднябенных касьцях іклы. Сьпіна зяленавата-шэрая, бруха белае, на баках 8—12 бура-чорных папярочных палос. У Беларусі водзіцца ў невялікай колькасьці ў буйных рэках і многіх чыстых азёрах. Даўжыня звычайна 50—80 см, вага 1—3 кг, у іншых краінах сустракаюцца асобнікі даўжэй за 1 м і цяжэй за 12 (да 20) кг. Мяса белае, нятлустае, далікатнае, бяз дробных костак, з высокімі смакавымі вартасьцямі. Утрымлівае 19% бялкоў, 1% тлушчу, добра засвойваецца. Штучна зарыбляюць прамысловыя вадаёмы. У рэстаранах сучаснай Беларусі — адна з найбольш папулярных рыб (пераважна завозіцца). Прадаецца ў сьвежым, марожаным выглядзе і ў кансэрвах.
Існуе велізарная колькасьць рэцэптаў прыгатаваньня, як гарачага, так і халоднага: смажаць (у тым ліку шашлыкі), вараць, запякаюць, тушаць у малацэ з цыбуляй, гатуюць пад маянэзам, у жэле, гатуюць галубцы і г. д. Асабліва смачныя заліўныя з судака. Вельмі складаная тэхналёгія судака «па-Радзівілаўску» (адна з самых складаных страваў літоўска-беларускай кухні). Чысьціць судака належыць асьцярожна, бо ў плаўніках і жаберных вечках маюцца вострыя калючкі.
У 2014 годзе Міністэрства прыродных рэсурсаў і аховы навакольнага асяродзьдзя Беларусі ўсталявала забарону на аматарскую лоўлю судака ў рыбалоўных угодзьдзях з 1 красавіка па 30 траўня ў сувязі зь веснавым нерастам. Таксама забаранілі аматарскае рыбалоўства ў месцах масавага нерасту судака. Сярод гэтых мясьцінаў былі: Мікашэвіцкі канал у Лунінецкім раёне на 2,5 км уверх ад яго ўпадзеньня ў Прыпяць, Аўгустоўскі канал у Гарадзенскім раёне ад шлюза каля ГЭС Нёмнава да ўпадзеньня ў Нёман, поплаўныя вадаёмы Нёмана, участак Дняпра ў Магілёўскім раёне і прылеглыя поплаўныя вадаёмы ад вадазбору Магілёўскага аўтамабільнага заводу да вусьця Дзебры.
This article uses material from the Wikipedia Беларуская (тарашкевіца) article Судак (рыба), which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). Зьмест даступны на ўмовах CC BY-SA 4.0, калі не пазначанае іншае. Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki Беларуская (тарашкевіца) (DUHOCTRUNGQUOC.VN) is an independent company and has no affiliation with Wiki Foundation.