চুলাগিট্টি নৰসাম্মা (ইংৰাজী: Sulagitti Narasamma; ১৯২০ – ২৫ ডিচেম্বৰ ২০১৮) কৰ্ণাটক ৰাজ্যৰ টুমকুৰ জিলাৰ পাৱাগাডা চহৰৰ এগৰাকী ভাৰতীয় ধাই আছিল। তেওঁ কৰ্ণাটকৰ চিকিৎসা সেৱাৰ পৰা বঞ্চিত পিছপৰা অঞ্চলবোৰত কোনো চিকিৎসা সুবিধা নোহোৱাকৈ ৭০ বছৰ ধৰি সেৱা আগবঢ়াইছিল। তেওঁৰ জীৱনকালত ২০,০০০ৰো অধিক পৰম্পৰাগত প্ৰসৱ বিনামূলীয়াকৈ সম্পাদন কৰিছিল। সমাজলৈ তেওঁ আগবঢ়োৱা অৱদানৰ বাবে ২০১২ চনত ভাৰতৰ ৰাষ্ট্ৰীয় নাগৰিক বঁটা আৰু ২০১৮ চনত দেশৰ চতুৰ্থ সৰ্বোচ্চ অসামৰিক বঁটা পদ্মশ্ৰীৰে সন্মানিত কৰা হৈছিল।
চুলাগিট্টি নৰসাম্মা | |
---|---|
জন্ম | ১৯২০ পাৱাগাডা তালুক, টুমকুৰ জিলা, মহীশূৰ ৰাজ্য (বৰ্তমান কৰ্ণাটক, ভাৰত) |
মৃত্যু | ২৫ ডিচেম্বৰ ২০১৮ (বয়স ৯৭–৯৮) বেংগালুৰু, কৰ্ণাটক, ভাৰত |
ৰাষ্ট্ৰীয়তা | ভাৰতীয় |
পেচা | ধাই |
দাম্পত্যসঙ্গী | অঞ্জিনাপ্পা |
বঁটা, সন্মান, পুৰস্কাৰ আদি | পদ্মশ্ৰী, ২০১৮ |
১৯২০ চনত মহীশূৰ ৰাজ্যৰ টুমকুৰ জিলাৰ পাৱাগাডা গাঁৱৰ কৃষ্ণপুৰাত যাযাবৰ অঘৰী সংস্কৃতিত নৰসম্মাৰ জন্ম হৈছিল। তেওঁৰ মাতৃভাষা তেলেগু আছিল। তেওঁৰ কোনো আনুষ্ঠানিক শিক্ষা নাছিল আৰু নিৰক্ষৰ হৈ ডাঙৰ-দীঘল হৈছিল। তেওঁ ১২ বছৰ বয়সত তেওঁৰ স্বামী অঞ্জিনাপ্পাৰ সৈতে বিবাহপাশত আৱদ্ধ হৈছিল। তেওঁৰ ১২টা সন্তান আছিল। যদিও শিশু অৱস্থাত তাৰে চাৰিজনৰ মৃত্যু হৈছিল। ইয়াৰ লগতে তেওঁৰ ৩৬টা নাতি-নাতিনী আছিল। তেওঁ তেওঁৰ আইতাক মাৰিজেমাইমাৰ পৰা ধাই বিদ্যা শিকিছিল। তেওঁৰ আইতাক এগৰাকী বিশিষ্ট ধাই আছিল আৰু তেওঁ নৰসাম্মাৰ নিজৰ পাঁচটা কেঁচুৱা প্ৰসৱ কৰাত সহায় কৰিছিল। ১৯৪০ চনত ২০ বছৰ বয়সত নৰসাম্মাই তেওঁৰ প্ৰথমবাৰৰ বাবে ধাইৰ কাম আৰম্ভ কৰিছিল। তেওঁ তেওঁৰ খুড়ীয়েকৰ কেঁচুৱাটো প্ৰসৱ কৰাত সহায় কৰাৰ জৰিয়তে ধাই বিদ্যাৰ প্ৰয়োগৰ আৰম্ভণি কৰিছিল।
যেতিয়াই যাযাবৰ অঘৰী জনজাতি তেওঁৰ গাঁৱত উপস্থিত হয় নৰসাম্মাই তাইৰ ধাই বিদ্যাৰ দক্ষতা অনুশীলন কৰাৰ সুযোগ লাভ কৰিছিল। তেওঁ গৰ্ভৱতী মহিলাসকলৰ বাবে প্ৰাকৃতিক ঔষধ প্ৰস্তুত কৰাৰ কলাও শিকিছিল আৰু সোনকালেই কেঁচুৱাটোৰ স্বাস্থ্য আৰু স্থিতি পৰীক্ষা কৰিবলৈ সক্ষম হৈছিল। কোনো সঁজুলি ব্যৱহাৰ নকৰাকৈ গৰ্ভত থাকোঁতে তেওঁ ভ্ৰূণৰ স্পন্দন চিনাক্ত কৰিবলৈ সক্ষম হৈছিল বুলি জানিব পৰা গৈছে।
২০১৮ চনলৈ আৰু ৯৭ বছৰ বয়সত নৰসাম্মাই ১৫,০০০ তকৈও অধিক কেঁচুৱা প্ৰসৱ কৰাত সহায় কৰিছিল। তেওঁক 'কৃষ্ণপুৰাৰ ধাই' বুলি বৰ্ণনা কৰা হয়। লগতে তেওঁৰ নামৰ সৈতে 'চুলাগিট্টি' শব্দ জড়িত হৈ পৰে। কানাড়া ভাষাত 'চুলাগিট্টি' শব্দৰ অৰ্থ হৈছে 'ধাই'।
স্বাস্থ্যজনিত জটিলতাৰ বাবে নৰসাম্মাক ২০১৮ চনৰ নৱেম্বৰত সিদ্ধগংগা চিকিৎসালয় আৰু গৱেষণা কেন্দ্ৰত ভৰ্তি কৰোৱা হৈছিল আৰু পিছত ২৯ নৱেম্বৰ ২০১৮ ত বিজিএছ চিকিৎসালয়লৈ প্ৰেৰণ কৰা হৈছিল। ২০১৮ চনৰ ২৫ ডিচেম্বৰত কৰ্ণাটকৰ কেংগেৰীৰ বিজিএছ গ্লেনিগলছ গ্লোবেল হস্পিটেলত হাঁওফাঁওৰ দীৰ্ঘম্যাদী ৰোগত আক্ৰান্ত হৈ ৯৮ বছৰ বয়সত তেওঁৰ মৃত্যু হয়।
২০১৮ চনৰ ২৫ ডিচেম্বৰ তাৰিখে নৰসাম্মাৰ নশ্বৰদেহ জনসাধাৰণে শ্ৰদ্ধাঞ্জলি জনোৱাৰ বাবে টুমাকুৰুৰ গ্লাছ হাউচত ৰখা হৈছিল। কেইবাজনো মন্ত্ৰী, প্ৰাক্তন মন্ত্ৰী আৰু বিভিন্ন ক্ষেত্ৰৰ হাজাৰ বিখ্যাত লোকৰ উপৰিও হাজাৰ লোকেও বিদেহী আত্মালৈ শ্ৰদ্ধাঞ্জলি জ্ঞাপন কৰে। ২৬ ডিচেম্বৰ তাৰিখে নৰসাম্মাক টুমাকুৰু চহৰৰ উপকণ্ঠৰ গংগাচন্দ্ৰা গাঁৱত সম্পূৰ্ণ ৰাজ্যিক মৰ্যাদাৰে অন্ত্যেষ্টি ক্ৰিয়া সম্পন্ন কৰা হয়। লগতে এক একৰ ভূমিৰ আধা একৰ মাটি তেওঁৰ প্ৰতি উছৰ্গা কৰি এটা স্মাৰকৰ বাবে ৰাখি থোৱা হৈছিল।
নৰসাম্মাই তেওঁ সমাজলৈ আগবঢ়োৱা অৱদানৰ স্বীকৃতি স্বৰূপে বহুতো বঁটা আৰু সন্মান লাভ কৰিছিল ২০১২ চনত তেওঁ কৰ্ণাটক ৰাজ্য চৰকাৰৰ ডি দেৱৰাজ উৰ্ছ বঁটা লাভ কৰিছিল। ২০১৩ চনত তেওঁ কিট্টুৰ ৰাণী চেন্নাম্মা বঁটা লাভ কৰিছিল। ২০১৩ চনতে তেওঁ কৰ্ণাটক ৰাজ্যৰ দ্বিতীয় সৰ্বোচ্চ অসামৰিক সন্মান ৰাজ্যোৎসৱ বঁটা লাভ কৰিছিল। একেবছৰে তেওঁ ভাৰতৰ ৰাষ্ট্ৰীয় নাগৰিক বঁটা কৰে। চুলাগিট্টি নৰসাম্মায়ে ২০১৪ চনত টুমকুৰ বিশ্ববিদ্যালয়ৰ পৰা সন্মানীয় ডক্টৰেট ডিগ্ৰী লাভ কৰে। ২০১৮ চনত ভাৰত চৰকাৰে তেওঁক দেশৰ চতুৰ্থ সৰ্বোচ্চ অসামৰিক সন্মান পদ্মশ্ৰী প্ৰদান কৰে।
ৱিকিমিডিয়া কমন্সত চুলাগিট্টি নৰসাম্মা সম্পৰ্কীয় মিডিয়া ফাইল আছে। |
This article uses material from the Wikipedia অসমীয়া article চুলাগিট্টি নৰসাম্মা, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). আন একো উল্লেখ নাথাকিলে এই বিষয়বস্তু CC BY-SA 4.0 ৰ আওতাত উপলব্ধ। Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki অসমীয়া (DUHOCTRUNGQUOC.VN) is an independent company and has no affiliation with Wiki Foundation.