Victoria-Oos: Streek in die Nkonkobe Plaaslike Munisipaliteit in die Oos-Kaap

Dit lê tussen die Katrivier, ('n sytak van die Groot-Visrivier), in die weste, die Tyhumerivier ('n tak van die Keiskammarivier) in die ooste en die Amatholeberge in die noorde. Die gebied beslaan 319 km² en het ± 6 000 inwoners. Alice, Hogsback, Universiteit van Fort Hare en Lovedale Kollege is die enigste bevolkingskonsentrasies. Boerdery en toerisme is die vernaamste inkomstebronne. Die R345-pad loop van noord na suid en die R63-pad van wes na oos deur die gebied.

Ná die Sewende Grensoorlog (1847) het die goewerneur, sir Harry Smith, die vorige neutrale gebied tussen die Groot-Visrivier en die Keiskammarivier tot 'n provinsie van die Kaapkolonie verklaar met die naam Victoria-Oos. Die destydse grense was die Katrivier, die Groot-Visrivier, die Keiskammariver, die Amatolaberge, die see en die noordelike deel is begrens deur die Swart-Keirivier en die Klipplaatrivier. Fort Peddie, Fort Beaufort en Fort Willshire was binne die gebied geleë.