兜蟲

兜蟲
唔同物種嘅兜蟲嘅標本
物種分類
界 動物界 Animalia 門 節肢動物門 Arthropoda 綱 昆蟲綱 Insecta 目 甲蟲目 Coleoptera 科 金甲蟲科 Scarabaeidae 亞科 兜蟲亞科 Dynastinae

兜蟲公出嗮名強壯：兜蟲有顯著嘅兩性異形；响外形上，兜蟲最易認嘅係多數物種啲公嘅頭前方都有若干隻好大嘅角，而啲兜蟲公會用佢哋嘅角互相角力，爭奪啲乸嘅芳心，打贏咗嘅就有得同啲乸交配；除此之外，有多個物種嘅兜蟲公仲異常咁強壯，當中大力士甲蟲（Dynastes hercules；個名嚟自羅馬神話入面嘅大力士）就好出名，據報勁到可以用角舉起比自己重成幾百倍嘅物件。

兜蟲受唔少人愛戴：佢哋相對乾淨、易打理、又對人類冇害，好易養；例如喺廿世紀至廿一世紀初嘅日本，啲人好興响夏天嗰陣捉兜蟲（尤其係獨角仙）公，攞佢哋嚟玩昆蟲相撲或者做寵物；而且兜蟲公嘅角仲會視乎物種而有好多唔同花款，有多個兜蟲物種嘅角都俾人覺得又大又靚，因而吸引咗唔少收藏家搜集同儲兜蟲標本。

 

體型

兜蟲係其中一種最大隻嘅甲蟲，有啲物種嘅成年兜蟲身長可以去到成 150 毫米咁大隻。同時，佢哋唔能夠咬或者用針拮人類，所以對人類完全冇害。多數物種嘅成年兜蟲公頭前方都會有一隻好大嘅角（可以長過佢嘅胸同腹），而且隻角好大力，多數都起碼可以舉起等同自己體重幾廿倍咁重嘅物體，有報告仲試過話，有隻兜蟲公成功噉舉起等同自己體重 850 倍咁重嘅物體。喺交配季節嗰陣，啲兜蟲公會用佢哋嘅角嚟玩相撲，嘗試用力量制服對手（但好少可會嘗試攞對手命），相撲打贏咗嘅公就會得到同啲乸交配嘅權利。對於啲兜蟲乸嚟講，一隻兜蟲公嘅角係健康同優良基因嘅象徵－一般嚟講，一隻兜蟲公細個嗰陣健康同營養愈好，佢大個咗之後隻角就會愈大。

身體結構

無論公乸，一隻成年嘅兜蟲同第啲甲蟲一樣，有一浸好厚又硬淨嘅外骨骼保護住，背脊有兩對翼，一對厚嘅翼加一對好似薄膜噉嘅翼，令到兜蟲曉飛（但因為佢哋大隻，所以多數飛行能力以昆蟲嚟講麻麻地）。有啲物種嘅兜蟲曉將佢哋嘅腹部同翼嘅表面摩擦，產生大嘅聲響，而有報告指兜蟲有陣時會用呢啲聲響嚇走獵食者。

兜蟲係一種行完全變態嘅昆蟲：由卵嗰度生咗出嚟之後係幼蟲，兜蟲幼蟲多數以腐爛嘅木頭為食糧，一路食一路生到愈嚟愈大條，幼蟲期喺某啲物種當中可以去到成幾年咁長；一隻兜蟲幼蟲生到咁上下大條，就會結蛹，蛹過咗一段時間就會變成成蟲；兜蟲嘅成蟲多數食樹汁、花蜜、同生果維生，而且可以生存相當耐嘅時間－兜蟲嘅龐大體型同力量幫佢哋抵抗獵食者，而且佢哋多數都係夜行嘅，能夠避開日頭打獵嘅獵食者，所以同第啲昆蟲比起上嚟，兜蟲好少天敵；一般嚟講，一隻健康冇病嘅成年兜蟲公可以生存到成兩至三年咁耐－以昆蟲嚟講算係相當長命嘅物種。成年嘅兜蟲公會用相撲嚟爭取同乸交配嘅權利，交配咗之後，啲兜蟲乸就會搵安全隱蔽嘅地方產卵。兜蟲乸一竇平均會生 50 粒卵左右（呢個數字視乎物種而定）。

兜蟲一樣好出名嘅嘢係，兜蟲公成日俾人攞嚟玩昆蟲相撲。兜蟲相對乾淨、易打理、又對人類冇害，所以以昆蟲嚟講好易養，有唔少人會養嚟做寵物。喺東亞洲嘅多個地方，尤其係日本，都有唔少人會養兜蟲公用嚟玩相撲（有陣時仲會賭錢），典型嘅做法係擺兩隻兜蟲公喺一個戰場上面，再擺隻兜蟲乸出嚟，或者播預先錄定嘅兜蟲乸叫聲－跟住兩隻兜蟲公就會自動自覺，為咗爭奪交配權而開始相撲。

 

Eupatorus gracilicornis

 

Pentodon idiota

 

Xylotrupes

 

Xylotrupes

 

獨角仙（Japanese rhino beetle）

• Agaocephalini
  • Aegopsis
  • Agaocephala
• Cyclocephalini
  • Ancognatha
  • Cyclocephala
  • Dyscinetus

• Dynastini
  • 獨角仙屬（Allomyrina）
  • 神馬大兜蟲屬（Augosoma）
  • 南洋大兜蟲屬（Chalcosoma）
  • 赫克力士大兜蟲屬（Dynastes）
  • 尤犀金龜屬（Eupatorus）
  • 豎角兜蟲屬（Golofa）
  • 象兜蟲屬（Megasoma）
  • 木犀金龜屬（Xylotrupes）
  • Hexodontini
  • Hexodon
  • Hyboschema
  • Oryctini
  • Coelosis
  • Enema
  • Heterogomphus
  • Megaceras
  • 蛀犀金龜屬（Oryctes）
  • 龍兜蟲屬（Strategus）
  • 恐龍兜蟲屬（Trichogomphus）

• Oryctoderini
  • 彩虹兜蟲屬（Chalcocrates）
  • Oryctoderus

• Pentodontini
  • Anoplognatho
  • Aphonus
  • Bothynus
  • Coscinocephalus
  • Euetheola
  • Gillaspytes
  • Orizabus
  • Oxygrylius
  • 禾犀金龜屬（Pentodon）
  • Pericoptus
  • Thronistes
  • 吸木蟲屬（Tomarus）

• Phileurini
  • Homophileurus
  • Phileurus

• 甲蟲
• 鍬甲蟲
• 昆蟲
• 香港昆蟲
• 日本昆蟲

• Endrödi S. 1985. The Dynastinae of the World. Dr. W. Junk Publishers
• Dechambre (R.-P.) & Lachaume (G.) The Beetles of the World, volume 27, The genus Oryctes (Dynastidae), Hillside Books, Canterbury

 

維基同享有多媒體嘅嘢：
Dynastinae

 

維基物種有資料講：Dynastinae

• Family SCARABAEIDAE.
• Subfamily Dynastinae.
• Voila French site on Dynastinae, illustrated.
• Japanese Beetle Brothers. TV Tropes.