啤牌

正牌點數加埋三百六十四。將鬼牌當一點，加一張或者兩張入去，分別就等於三百六十五同三百六十六，即係新曆嘅兩個每年總日數。當中嘅十二張公仔牌，各對應一個故事角色或者歷史人物。

一副牌，唔計鬼牌（🃏），總共五十二隻。有四種花，葵扇（♠）、紅心（♥）、 梅花（♣）、階磚（♦）。每種花有十三隻牌，叫「一副」，寫上阿拉伯數字1到13，同英文字母ADJQK。有幾隻牌粵語有自己叫法：

• A叫「煙士」，簡稱「煙」，來自英文「Ace」。
• D叫「大弟di2」，簡稱「弟di4」，來自英文「Dee」。
• J叫「積zik1」，又寫成「人」、「戰士」，前者指張牌入面嘅人公仔；後者源自英文「Jack」。
• Q叫「囡neoi1」，又寫成「女」、「王后」，前者指張牌入面嘅女人公仔；後者源自英文「Queen」。
• K叫「傾king1」，又寫成「男」、「王」，前者指張牌入面嘅男人公仔；後者源自英文「King」。

一副牌52隻。一種花色13隻。

	煙	弟di4	3	4	5	6	7	8	9	10	積zik1	囡neoi1	傾king1
葵扇
紅心
梅花
階磚

好多啤牌玩法都有分點數大細。喺好多種玩法，數目最大嘅都係「煙」，跟住係「傾king1」，然後係「囡neoi1」，再落係「積zik1」、再跟住落係「10」、「9」、「8」……一路落，最細係「弟di4」（鋤大弟嘅規矩，「弟di4」變成最大，跟住先係「煙」、「傾king1」、「囡neoi1」、「積zik1」、「10」、「9」……，最細係「3」）。其它玩法重會有其它大細順序。

相同點數嘅牌有時會再按花來排。嶺南一帶通常嘅玩法係，葵扇（♠）係最大嘅花，跟住係紅心 （♥），再落係梅花（♣），最細嘅係階磚（♦）。唔同玩法入面，花色順序都唔同。

由於啤牌嘅玩法同組合變化多端，好多時成為賭錢嘅工具，不過亦都有純綷當遊戲娛樂噉大人細路都可以一齊玩、並唔涉及金錢嘅啤牌遊戲。

而玩啤牌嘅時候，一般來講通常都會係四個人以對疊嘅形式咁玩，每人派十三隻來排陣出牌鬥一番，睇吓邊個成為最後嘅大贏家。當然亦都有只係兩個人對疊嘅形式，又或者多過四個人一齊玩嘅啤牌遊戲，林林總總，各有各嘅刺激同趣味。

賭博性質嘅玩法

一般俾人用來賭嘅啤牌遊戲，比較流行嘅有：鋤大弟、鬼三二一、十三張、三公、廿一點、沙蟹（Show hand）、百家樂、德州啤等等。

純綷娛樂嘅玩法

而可以唔涉及金錢，純綷娛樂嘅啤牌玩法諸如：潛烏龜、Last 咭、冚棉胎、釣一對。呢啲都好啱唔鍾意賭博嘅大小朋友一齊玩，而過程重可以好緊張好刺激。

有獎遊戲節目

用啤牌做電視節目嘅有獎遊戲一路以來都有唔少，不過相信好多香港人重記得嘅啤牌有獎遊戲，莫過於曾經喺無綫電視嘅晚間綜合節目《歡樂今宵》入面搞過嘅「歡樂咭」；佢嘅玩法係預先喺一塊佈景板前面放咗十幾張排列成好似金字塔咁嘅、覆轉唔開牌嘅大張啤牌陣，當開咗最低嗰行嘅第一隻牌之後，就叫現場歡眾估下一隻牌大過定係細過之前嘅一隻牌（其實即係估大細），如果一路估到牌塔嘅最頂嗰一隻都估中埋嘅話，獎金自然係最豐富啦。當時呢個環節都吸引唔少觀眾特登睇埋先至上床瞓覺，甚至乎喺一啲公司嘅聯歡活動入面，都特登搞個「歡樂咭」來與眾同樂，將聯歡嘅氣氛帶入高潮，算係一個幾成功嘅電視有獎遊戲來。

組合嘅術語

其實喺玩啤牌來講，好多玩法裏面都有共通嘅組合術語，而通常呢啲組合都係由五隻牌組合而成，術語叫做「一手牌」，當然亦都有其它牌數所組成嘅組合；得意嘅係有啲術語只係直接由英文嘅發音直譯過來用。

以下就簡單噉介紹一吓呢啲關於啤牌遊戲嘅術語（詳細玩法請睇相關文章）：

• 單枝

呢個唔係組合，不過都係玩啤牌嘅術語之一，意思即係出一隻牌。呢個術語最常出現喺玩鋤大弟嘅時候，如果個出牌話事人出一隻牌做大家嘅指引牌，就可以話佢「走單枝」、「開單枝」、「行單枝」。

• 啤pe1

廣東話嘅「啤」可以解成一對、一孖，其實即係英文Pair音譯過來。出一對相同點數嘅牌可以叫做「起啤」、「開啤」，而報牌嘅時候，啤通常都會跟返個點數喺尾，例如，一對煙就叫「啤煙」，一對10就叫「啤10」，如此類推。要留意嘅係，一對相同花嘅牌並唔係啤。一啤「煙」嘅圖例：
  

• 三條saam1 tiu4*2

顧名思義，即係出三隻牌，重要係三隻相同點數嘅牌，而報牌叫法同啤一樣都係將個點數跟尾，例如：「三條傾」、「三條7」……如此類推。同啤一樣，三隻相同嘅花並唔係三條。三條嘅圖例：
   

• 四條sei3 tiu4*2

同三條類似，即係出四隻相同點數嘅牌，而報牌嘅叫法亦都係將個點數跟尾，例如：「四條積」、「四條6」……如此類推。同樣咁四隻同花嘅牌並唔係四條。圖例：
    
有時四條可以係一手牌噉出，只要是旦搭多一隻牌湊夠五隻出就得。佢嘅組合喺一般嘅玩法入面係大過俘虜或者以下嘅一手牌組合（關於其它一手牌嘅組合，請睇下面）。

• 滔啤tou1 pe1

係由英文嘅 Two pair 音譯出來，係一手五隻嘅啤牌組合，由一啤相同點數牌加另外一啤相同點數牌，再加一隻牌組合而成，而報牌係先將兩對牌嘅點數行先，以下圖為例，一對煙同埋一對傾叫「煙傾滔」。若果係一對9同一對10就叫「910滔」，如此類推。滔啤嘅圖例：
     
一般來講，滔啤算係一手牌入面最細牌面嘅組合（有啲玩法係唔可以出滔牌做一手牌）。

• 蛇，又叫順seon6*2（「順」有變調，讀「筍」）

「順」，即係順序，一手牌嘅組合，五隻牌嘅點數一定要連續順序咁落，但就可以唔同花。圖例：
     　　     
以上呢個由煙士開始嘅組合，俗語叫「大蛇」（又叫「大順」），即係蛇（又叫順）之中佢算最大，當然玩鋤大弟就要有葵扇2先叫做「大蛇」（又叫「大順」），至於「細蛇」（又叫「細順」）即係話由階磚2開始數五隻（玩鋤大D就以階磚3最細）。

• 花，又叫同花tung4 faa1

一手牌嘅組合，全部五隻牌都係同花，點數可以唔連續順序，例如：
     
花嘅組合一般來講係大過蛇或以下嘅組合。

• 葫蘆fu1 lou4*2

一手牌嘅組合，而五隻牌入面，有三隻要同點數再加兩隻同點數；報牌嘅時就會先報三隻嘅點數然後兩隻嘅點數，以下圖做例，三隻煙加兩隻弟就叫做「煙弟葫fu1」，其它如此類推。圖例：
     
葫蘆牌面嘅組合通常係大過花同蛇或以下嘅一手牌組合。

• 同花順tung4 faa1 seon6*2（「順」有變調，讀「筍」）

「同花順」，即係順序，係一手牌嘅組合，除咗五隻牌嘅點數要係連續順序之外，重要全部都係同一隻花，例如：
     
基本上喺大部份嘅啤牌玩法入面，同花順算係最大嘅牌面，就好似玩沙蟹咁，以上呢條由煙士開始嘅同花順（俗稱「大同花順」）已經係最大嘅牌面，可以壓倒晒其它一手牌嘅組合。

• 青龍

呢個係一副牌組合嘅術語，即係全部十三隻牌都係同一隻花，喺某啲啤牌遊戲入面係屬於最高嘅牌面之一。例子如圖：
             

啤牌重可以用來變魔術，而且呢門啤牌嘅戲法重係變魔術嘅基本功其中一種。

簡單嘅啤牌戲法，例如從一副洗過晒嘅啤牌入面唔開牌就搵得返四隻煙士出來，或者搵返之前觀眾所揀出來簽咗名嘅某一隻啤牌。呢啲都可以話係變啤牌嘅基本戲法。而好多資深嘅魔術師重可以將啤牌戲法表演到出神入化，例如可以當眾凌空派啤牌但係派到唔見晒啲牌；喺張牌上面用打窿機打個窿，跟住用手指可以令到個窿喺張啤牌上面移動到唔同嘅位置；又或者叫觀眾揀出一隻牌簽個名，然後插返入叠牌入面，跟住將叠牌向玻璃窗掟埋去，觀眾所揀嗰隻簽咗名嘅啤牌就咁黐咗喺玻璃窗嘅另一面。睇過嘅人會諗極都諗唔到點解，只有讚嘆呢啲魔術神奇。