雨林係指一個全年有高雨量嘅森林。定義上,雨林全年雨量最少要有1700到2000毫米。雨林多數係熱帶雨林,但亦都有溫帶雨林。雨林裏面嘅動植物有好多種。
最大嘅熱帶雨林響亞馬遜,連埋中美洲尼加拉瓜嘅森林。其次係喀麥隆到剛果一片非洲森林。之後係亞洲緬甸到巴布亞新畿內亞嘅森林。澳洲東北面都有雨林。而溫帶呢,主要係北美洲,英屬哥倫比亞省,東南阿拉斯加,美國本土西北,亞洲格魯吉亞,歐洲巴爾幹,紐西蘭同塔斯曼尼亞。
雨林係有自己嘅碳循環,整體來講,二氧化碳係排多過吸,不過對溫室效應影響輕微。之不過咁,雨林係響世界碳循環裏面係一個好穩定嘅池;當有人清走個雨林,就會放好多二氧化碳出來。雨林另一個作用係整涼透過佢嘅空氣。所以,雨林對全球氣候係好有影響。
雨林係地球三分二動植物品種嘅屋企。估計係有數以萬萬種計嘅植物,昆蟲,微生物都未畀人發現。而且,好多藥物都係響熱帶雨林搵出來。
雖然雨林有咁多植物,其實佢嘅泥土唔係咁肥沃。原因係細菌好快將啲嘢分解,無乜腐植質留響度。所以響呢啲地方,鐵同鋁嘅氧化物就集中響泥裏面,泥變到鮮紅色,甚至搞到變成礦。響一啲後生地層,好似火山爆發殘留,就會肥沃好多。植物嘅養份,就係由死咗嘅巨樹,經細菌同白蟻分解後,再回流畀其他樹木。
雨林地下好少會有草,矮樹之類,原因係太少太陽光落到地。所以人或者動物可以響雨林度走。如果樹冠整爛咗,好快就有藤,樹叢,矮樹生出來。
This article uses material from the Wikipedia 粵語 article 雨林, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.