沙蟬

沙蟬
一隻公嘅十七年週期蟬 （Magicicada cassini） 十七年週期蟬嘅求偶之歌
物種分類
界 動物界 Animalia 門 節足動物門 Arthropoda 綱 昆蟲綱 Insecta 目 半翅目 Hemiptera 亞目 (Subordo): 頸喙亞目 Auchenorrhyncha 科 蟬超科 Cicadoidea

蟬嘅特徵好易認：

• 外表上，一隻典型嘅蟬有五隻眼，當中兩隻大複眼位於頭嘅兩邊，淨低三隻細眼喺頭中間（望落似得兩隻眼）；觸鬚短，兩隻前翼好似薄膜噉，身體色水多數暗淡，呈啡或者綠噉嘅色（起到保護色嘅作用）；
• 喺行為上，蟬成蟲多數喺日頭出沒，會住喺樹上面靠食樹汁維生，而佢哋最出名嘅行為特徵係多數物種嘅蟬公都好嘈－喺多數嘅蟬物種當中，啲公會快速噉振動佢哋個腹發出好響嘅聲，蟬乸鍾意叫聲又大又好聽嘅公，會揀呢啲公嚟交配；啲乸交配完之後，興將啲蛋生喺樹皮嘅罅隙當中；等到蟬蛋孵咗之後，隻若蟲會跌落地捐入泥土裏面，若蟲期維持幾耐就視物種而定－週期蟬一世蟬大多數時間都係以地底若蟲嘅形式生存，要等成 13 至 17 年先會變做成蟲，但又有好多蟬物種係年年都化成蟲一次嘅。

蟬叫聲好嘈，人好易就留意到佢哋，所以佢哋成日出現喺人嘅意識入面：早喺公元前嗰陣，蟬嘅形象經已有出現喺文化產物裏面，例子有古希臘詩人荷馬嘅《伊利亞德》（公元前 8 世紀）或者商朝（公元前 16 世紀至 11 世紀左右）嘅一啲藝術品；喺世界好多地方，蟬公都出嗮名會喺夏天嗰陣大聲叫求偶，令到喺好多地區嘅文化入面，蟬叫聲成為咗「夏天到」嘅象徵－例如係粵文化噉，粵文化不嬲有「夏天係荔枝最靚嘅季節，所以夏天要食荔枝」嘅習俗，而廣東話入面就有句嘢叫沙蟬叫，荔枝熟，意思係「蟬叫就即係夏至到咗，所以一聽到蟬叫就差唔多係時候食荔枝」噉解。

 

高砂熊蟬嘅叫聲

高砂熊蟬係台灣最常見嘅蟬。呢啲叫聲係喺台北錄返嚟嘅。

---

日本川崎嘅蟬叫

日本川崎市一角嘅日本暮蟬叫聲；喺 2011 年 7 月 17 日錄嘅。

---

希臘伊薩基島嘅蟬叫

希臘一角樹上嘅蟬叫；喺 2008 年 7 月錄嘅。

---

一隻單獨蟬叫

德州某個地方，某一個天熱嘅下晝嘅蟬叫；喺 2012 年 6 月錄嘅

---

播呢啲檔案有問題？睇吓媒體幫手。

蟬係種好出名嘅昆蟲，喺多隻主要語言入面都有通俗名：

• 歐洲語言：
  • 蟬喺廿一世紀初嘅英文入面係叫 cicada（大致對應粵拼：si6 kaa1 daa4）嘅，對應（例如）法文 cigale、德文 Zikade 同西班牙文 cigarra；英文字 cicada 最早嚟自拉丁文，意思據講大致上係「住喺樹上面嘅蟋蟀」噉解。
  • 希臘文：喺希臘文入面，蟬係俾人叫做 τεττιξ（羅馬字：tettix）或者 τζίτζικας（羅馬字：tzitzikas）嘅，兩隻都係擬聲詞。
• 漢語：蟬呢隻漢字係最常俾唐人攞嚟代表呢種昆蟲嘅，呢隻字喺多個漢語入面有「極大嘅聲」等嘅意涵；唔同嘅漢語又對蟬有各自嘅叫法，好似係江西話就興用借落子呢三隻漢字嚟代表蟬，而古代漢人又有用蜩、蜺、䗁、蝒、螓、蠽、五色、日暮、丕蜩、茅蜩、秋蜩、蚱蟬、寒蜩、寒螿、蜋蜩、蜻蜻、蜓蛛、螗蜩、蟪蛄、螗蛦、馬蜩同螇螰等嘅字眼嚟稱呼蟬呢種蟲。
  • 廣東話：喺廣東話入面，蟬又有個舊名叫沙蟬，亦有粵人將蟬稱為蠀蟟（粵拼：zi1 liu5）－呢隻詞用漢字又可以寫做知了，係隻擬聲詞，取自蟬嘅叫聲由廣東話聽落有少少似係「知了，知了」噉嘅聲。
• 日文：日本人興嗌蟬做セミ（日羅：semi；和製漢字：蝉）。

... 等等。

 

體型

沙蟬通常都唔係好大隻，啲成蟲成個身嘅長度多數都係喺 2 至 5 厘米（0.79 至 1.97 英寸）之間，但係都有啲物種會大過呢個尺寸：出咗名全世界最大隻嘅帝王蟬（英文：Empress cicada）（Megapomponia imperatoria），成隻張開嗮啲翼嘅話就有成 20 厘米（7.9 英寸）咁長，而淨係體長就大約 7 厘米（2.8 英寸）；棲息喺南亞嗰頭嘅一種大型蟬婆羅洲巨蟬（Tacua speciosa）張開嗮啲翼都有成 18 厘米（7.1 英寸），而淨係體長就大約係 4 至 5 厘米（1.6 至 2.0 英寸）。

 

身體結構

蟬嘅身體由好硬淨嘅外骨骼包住，同其他昆蟲一樣，佢哋嘅身體分做頭、胸、同埋腹三橛，而胸有得再細分做前胸、中胸、同埋後胸。蟬嗰三橛胸各有一對腳，所以總共有 3 對－即係 6 隻－腳，蟬嘅腿相當粗壯，有啲仲會有刺，等隻蟬可以用嚟掘泥；蟬嘅腹呈長錐噉嘅形，總共有 10 截，而第 9 截腹係尾節，蟬公嘅第 1 同第 2 截腹有可以用嚟叫嘅發音器，第 10 截腹形成咗肛門，蟬乸嘅第 10 截腹會形成產卵管，而且比較漲。有一啲分佈喺沙漠地區嘅蟬物種嘅背板（tergum）有特殊構造，識得喺隻蟲體溫熱得滯嗰陣會排啲多餘水份出嚟，進而達到冷卻同散熱嘅效果－原理同人類流汗類似。

同好多昆蟲一樣，蟬有兩對翼，蟬啲翼多數係透明或者半透明嘅，少數啲翼完全唔透明嘅物種嘅翼面好多時色水都好鮮明，而且多數分佈喺熱帶地區。無論啲翼係唔係透明都好，蟬啲翼上面會有好明顯、黑色一條條嘅翼脈。

一般嚟講，蟬嘅頭又闊又短，有明顯凸咗出嚟嘅額唇基（clypeus），觸鬚短而且呈鬚狀。蟬嘅口器又細又長，入面有食管同口水管，尖尖地噉，屬於拮吸式－蟬會食樹汁，並且用佢哋呢個尖尖地嘅口拮穿樹皮嚟吸入面啲汁液。望上少少，蟬有 5 隻眼，包括 2 隻複眼同 3 隻單眼，複眼唔大，喺頭嘅兩側而且分得好開，呢啲眼令到蟬有良好嘅視力。

一隻蟬一世蟲嘅歷程如下：

1. 蟬啲蛋通常都係好似米噉嘅形狀嘅。啲蟬乸會將啲蛋生喺樹皮下嘅竇入面，等啲蛋受到保護，而且噉做啲蟬仔生咗出嚟之後就即刻有得食樹汁。如果隻蟬乸喺樹枝入面生蛋嘅話，可能會搞到條樹枝死亡。
2. 蟬仔－呢個階段嘅蟬叫若蟲（或者叫粵拼：nim1）－就噉望落似白蟻，當佢哋由蛋嗰度孵咗出嚟之後，會以樹汁做食糧，一路食一路生。等到佢哋準備好，就會由個竇爬出去外面，並且跌落去地面嗰度。佢哋跟住會捐落去地底。
3. 隻蟬若蟲會靠食樹根嚟維生，一路掘一路慢慢噉食吓食吓愈食愈上，並且可以喺地底住一段好長嘅時間－視乎物種，隻蟬仔會留喺地底 2 至 17 年不等。由隻蟬仔出世到呢個階段，隻蟬都唔會結蛹－蟬係一種唔完全變態嘅昆蟲。
4. 喺嗰段漫長嘅地底生活之後，隻蟬若蟲會由地底嗰度捐返出嚟。隻蟬若蟲會爬上去最近嗰樖樹上面，跟手開始將佢哋個若蟲外骨骼甩出嚟，呢個過程通常要成兩個鐘頭。等到佢哋由塊舊皮嗰度出咗嚟之後，佢哋嘅翼會開始注滿液體並且漲大，而且佢哋嘅成年外骨骼會變硬－隻蟬就準備好做一隻成蟲。
5. 成蟲嘅蟬最緊要嘅職責就係揾伴侶。啲公嘅會趴喺樹上面叫，吸引啲乸過嚟，而啲乸就睇啲公邊隻叫得最好聽最大聲嚟揀伴侶。揀好伴侶就會交配，交配咗嘅乸就會大肚生蛋－跟住蟬嘅生命循環又會延續落去。

叫聲

 

同一般以摩擦方式嚟發聲嘅昆蟲（好似係蟋蟀）唔同，蟬公喺腹部第 1 至 2 截嘅兩側有發音器，主要包括咗背瓣、腹瓣、鼓膜、發音肌（鼓膜肌）、腱盤、腱突起、腹面調節肌、鏡膜、褶膜（摺膜）、第三氣門、同共鳴室（氣室）等嘅結構，而蟬乸因為身上冇呢啲結構所以唔識叫。

為咗要叫，啲蟬公好多時會趴喺樹幹上面，向前或者左右扭佢哋嘅腹嚟到調節佢哋所發出嚟嘅聲，並且透過鬥睇邊個嘅叫聲大聲啲好聽啲嚟到吸引啲乸飛過嚟同佢哋交配，而且每個物種嘅蟬都有佢哋獨特嘅旋律。蟬嘅呢種叫聲成日俾人話佢哋好似係「唱緊情歌」噉。

蟬同質數

蟬個個物種都有某啲特定嘅週期，而且同質數有微妙嘅關係。好似係好出名嘅周期蟬（magicicada）噉，佢哋原產美國嘅東部地區，呢啲蟬嘅若蟲會匿喺地底成 13 或者 17 年先至破土而出嚟繁殖，令到美國東部有每 13 或者 17 年就一次大規模周期蟬求偶嘅奇景。值得留意嘅係，13 同 17 都係質數－淨係可以俾 1 同佢哋自己整除嘅數。而事實係，蟬好多時都係噉－「匿埋喺地底嘅時間」以年嚟計會係質數。

呢樣嘢當中查實有蹺妙：蟬嘅天敵入面好多都會週期性噉樣數量提升，即係每隔幾年就會大量噉出現；一個物種嘅蟬，佢同多數昆蟲唔同，要隔幾年先至可以出嚟繁殖一次，如果某一年佢繁殖嗰陣咁啱撞正嗰年係佢某個天敵數量提升嘅年份嘅話，噉對嗰個物種嘅蟬嚟講會係一個相當大嘅打擊，於是啲蟬就進化出一種特技－生命週期以年計要係質數。質數淨係可以俾 1 同佢哋自己整除，例如 12 就唔係一個質數，因為佢可以俾 2、3、4、6 等多個數整除。如果有種蟬佢每 12 年繁殖一次嘅話，噉佢繁殖親都會撞正每 2 年數量提升一次嘅天敵、每 3 年數量提升一次嘅天敵、每 4 年數量提升一次嘅天敵、同埋每 6 年數量提升一次嘅天敵，咁多天敵一齊獵食佢哋，恐怕會對呢個物種嘅蟬造成滅絕性嘅打擊。相比之下，如果隻蟬係每 13 年繁殖一次嘅，就可以好容易噉避開天敵數量提升嘅年份，更加幫到個物種生存同繁衍。將「12」同「13」換做是但一對非質數同質數，上述講嘅嘢都會成立。

 

 

斑蟬（Gaeana maculata）

 

蟪蛄嘅一種（Platypleura sp.）

 

日本暮蟬（Tanna japonensis）

 

卡氏十七年蟬（Magicicada cassini）

狹義上嘅蟬只係侷限於蟬科嘅昆蟲，廣義上嘅蟬就包嗮蟬總科所有嘅昆蟲。蟬總科一共有兩個科：蟬科同螽蟬科（Tettigarctidae）。除咗噉，唔只蟬總科嘅昆蟲，成個蟬下目嘅昆蟲都俾人冠上蟬呢個名，分類如下（可以睇埋蟬下目）：

• 蟬下目 Cicadomorpha
  • 蟬總科 Cicadoidea
    • 蟬科
    • 螽蟬科 Tettigractidae
  • 沫蟬總科（沫蟬）Cercopoidea
  • 角蟬總科（角蟬和葉蟬）Membracoidea
  • † 古蟬總科 Palaeontinoidea

• 蟬科

• 蟬亞科
• 蝟蟬族（Dundubiini），日本同臺灣嗌做「蜩蟬族」
  • 寒蟬屬（Meimuna）、長瓣蟬屬（Platylomia）、大蟬屬（Macrosemia）

• 蟪蛄族（Platypleurini）
  • 蟪蛄屬（Platypleura）、毛蟪蛄屬（Suisha）
• 爺蟬族（Polyneurini）
  • 爺蟬屬（Formotosena）

• 蝦夷蟬族（英文：Tibicenini）（Tibicenini） / 熊蟬族（英文：Cryptotympanini）（Cryptotympanini）
  • 蝦夷蟬屬（Tibicen）
  • 薄翅蟬屬（Chremistica）
  • 熊蟬屬（Cryptotympana）

• 小蟬族（Leptopsaltrini）
  • 姬春蟬屬（Euterpnosia）
  • 姬蟬屬（Purana）
  • 暮蟬屬（Tanna）
  • 幽蟬屬（Semia）
  • 暗蟬屬（Taiwanosemia）
  • 細蟬屬（Leptosemia）
  • 虎翅蟬屬（Formocicada）

• 草蟬族（Moganniini）
  • 草蟬屬（Mogannia）
  • 扶桑蟬屬（Nipponosemia）

• 蟬族 Cicadini

屬

蟬嘅叫聲好嘈，令到人類好容易就留意到佢哋，所以佢哋嘅形象喺人類文化當中間唔中就會出現，好似係：

• 蟬若蟲嘅殼－叫蟬蛻－係一種中藥。除咗噉，蟬嘅蛋、若蟲、同成蟲等受到某啲真菌等嘅微生物寄生嗰陣時會產生蟬花。蟬花喺藥性上類似冬蟲夏草。
• 唐話入面有句俗語叫金蟬脫殼，就係建基於蟬甩殼變成成蟲呢種習性嘅。
• 山東菜當中有一款出名餸菜－炸金蟬。
• 暮蟬悲鳴時（日文：ひぐらしのなく頃に）同第八日嘅蟬（日文：八日目の蟬）等多個日本大眾媒體產品有同蟬相關嘅主題。
• 用蟬叫嚟代表夏天係日本出嘅創作入面成日都用嘅橋段。