武漢肺炎香港疫情

 除非特別寫明，否則本文所有時間都係以UTC+8時間為準。

去到2023年1月29號，累計確診個案已經有2,876,106單，其中有13,333人死亡。2023年1月30號起，衞生署衞生防護中心只會喺網上公布核酸檢測確診數字同醫生同醫院報告嘅死亡個案數字。

2019冠狀病毒病香港疫情可以分做五波爆發階段。2020年1月嘅第一波爆發同埋3月嘅第二波爆發入面，香港嘅確診個案大部份都有外遊記錄，亦有部份係群組爆發，大部份個案都可以追溯到源頭，歸納成唔同關聯群組，當中最出名同最多人嘅群組係「打邊爐家族」群組，有十一個直接傳染個案同4個二代傳染個案，另外有福慧精舍佛堂群組爆發、3月14號愉景灣舉行嘅雞尾酒會婚禮群組爆發、3月31號尖沙咀Red MR卡拉OK出現小群組爆發等。自4月19號之後，連續23日冇本地爆發嘅新個案，只係斷續有外地輸入個案，但喺5月12號開始連續兩日再有本地感染個案，之後一度只有零星感染個案。

到2020年7月，第三波疫情爆發，懷疑係因為豁免海員檢疫而引致，呢次規模比頭兩波大，加上有唔少個案都係源頭不明，意味出現咗社區爆發，當中比較出名嘅群組包括「慶回歸晚會群組」同「富臨生日宴群組」。政府響9月頭開始咗個「普及社區檢測計劃」，希望搵出社區嘅「隱性患者」，但社會對計劃有質疑聲音。

踏入11月，政府推出「安心出行」應用程式，希望可以紀錄確診者到訪地方，不過同時因為「跳舞群組」嘅出現而爆發第四波疫情。第四波疫情延續到2021年1月都未有顯著緩和，所以政府嗰時引入「封區檢測」機制，有權限制特定區域入面嘅人做強制檢測。同年2月底，香港政府正式展開「2019冠狀病毒病疫苗接種計劃」，安排先為高危人士打武漢肺炎疫苗，大半個2021年疫情大致緩和。

不過到2021年底，因為國泰航空嘅防疫漏洞，導致Omicron變種病毒流入社區，引發第五波疫情，當中比較出名嘅群組有「望月樓群組」、「國泰空姐母群組」（亦引發「洪為民生日派對事件」）、「倉鼠群組」（Delta變種病毒）同「葵涌邨大爆疫」，自2022年2月中旬開始疫情漸趨失控，連續多日都錄到數以千計嘅單日確診個案，同埋首次出現兒童死亡個案。由於疫情完全失控，驚動咗中央，中共總書記習近平下令特區政府要負起主體責任，將穩控疫情作為壓倒一切嘅任務，又委託主管港澳事務嘅中共政治局常委韓正向行政長官林鄭月娥轉達高度關注。

第五波疫情喺3月3號去到單日76,991宗確診個案嘅高峰，之後逐漸回落，4月14號開始單日確診少過一千宗，政府亦喺4月21號開始逐步解除防疫限制，不過單日確診維持三位數嘅水平超過一個月，而且又開始歸納出唔少群組感染個案，當中比較出名嘅群組包括「星月樓群組」。

對於由嚴重急性呼吸系統綜合症冠狀病毒2型引發嘅疾病，香港法定名稱為「嚴重新型傳染性病原體呼吸系統病」，而政府新聞公報早期稱為「新型冠狀病毒感染」，喺2020年2月19號開始改稱為「2019冠狀病毒病」。早期香港傳媒例如《明報》、《星島日報》、《蘋果日報》、《成報》、《香港經濟日報》、《頭條日報》、《立場新聞》、《am730》、《晴報》、《852郵報》 、《香港01》等稱呼為「武漢肺炎」；《熱血時報》、有線新聞、商業電台、香港電台、now新聞等稱呼為「新型肺炎」；無線電視、《東方日報》、《經濟通》、《大公報》稱呼為「新冠肺炎」。後期《明報》、《星島日報》、《香港經濟日報》、《頭條日報》、《am730》、《晴報》 、《香港01》稱呼為「新冠肺炎」。

《蘋果日報》曾經長期係仍然用「武漢肺炎」嘅香港傳統媒體，去到2021年4月，平等機會委員會點名強烈譴責《蘋果日報》用「污名化標籤」，結果《蘋果日報》跪低，盡量唔再用「武漢肺炎」。