被治者同意(英文:Consent of the governed)係一個政治哲學嘅概念,代表住一個政府理論上一定需要,先至能夠合法咁管治嘅同意。呢個概念一般同君權神授相對。呢個概念亦都係打擊殖民主義同埋支持人民主權嘅論點之一。世界人權宣言嘅第21條亦提到“人民嘅意志係政府權力嘅基礎”。
呢種同意要求每一位受管治嘅人都同意接受管治人,而只要有部分唔接受,就算只係少數,都係國家分離嘅理由。大部分嘅國家,包括所有民主制度嘅國家,都係用大多數同意嚟管治。
喺某啲情況,知道一個人嘅同意唔一定可行,例如喺一個假設嘅情況底下,又或者對於一啲已經唔喺世嘅人嘅同意,所以就唯有用假設性同意。好多時候都會嘗試想像一個人喺自然狀態之下會做嘅決定,特別如果係同接受某一個政府有關。當然,唔少學者都拒絕呢種做法,除咗因爲唔現實之外,亦都因爲未必合邏輯:一個人好少會同意,一個本身自己可以侵犯權利嘅政府,嚟管治個人自己去抵制其他人侵犯佢嘅權利。
根據宣傳學家 Edward Bernays,佢嘅書 The Engineering Consent (1955) 提及到公共關係嘅技巧,特別係政府點樣影響民意嘅取向。佢表明,“如果民意係能夠控制一個政府嘅運作,政府就一定唔能夠控制民意”。Edward Herman 同 Noam Chomsky 嘅書 Manufacturing Consent (1988) 亦提出咗類似嘅概念,聲稱喺美國嘅主流媒體同埋政府用佢哋報導時事嘅手法嚟“塑造民意”。
This article uses material from the Wikipedia 粵語 article 被治者同意, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.