勒邦占士

2009－2013年佢喺五年內贏得4次NBA最有價值球員。2012年占士攞咗第三個NBA最有價值球員後，亦喺同年得到生涯嘅第一座NBA總冠軍同NBA總決賽MVP兼奧運金牌，達成單季大滿貫，追平咗米高佐敦喺1992年所創嘅紀錄。2013年再度率領邁亞美熱火獲得NBA總冠軍完成二連霸，佢連續兩年包辦咗季後賽同埋總決賽MVP，亦係自標羅素同米高佐敦之後，NBA歷史第三人。

2014年，勒邦占士重返卡夫蘭騎士。同喺邁亞美熱火嗰時一樣，佢連續四季都帶領騎士打入總決賽，都係對金州勇士，2016年嗰次係喺總決賽落後1-3劣勢下反勝，係NBA史上第一次，佢亦當選總決賽MVP。

2018年，勒邦占士轉投洛杉磯湖人。2018-19球季佢因為受傷患困擾入唔到季後賽，2019-20球季就帶領湖人攞到總冠軍兼當選總決賽MVP，成為NBA史上第一個代表三支NBA球隊攞到總決賽MVP嘅球員。

• 奈史密斯高中籃壇MVP：2003年
• 高中四年籃球生涯中總共得到2657分、892個籃板同523次助攻
• 連續三季獲得俄亥俄州「高中籃球先生」嘅榮譽（2000－01、2001－02、2002－03）
• 2000-01賽季成為史上第一位入選《今日美國》全美第一隊嘅高二生
• 連續三季入選《今日美國》全美第一隊（2000－01、2001－02、2002－03）
• 帶領聖文森-聖瑪麗高中籃球隊參加咗四個賽季嘅比賽，並奪得3次州冠軍（1999－00、2000－01、2002－03）
• 帶領聖文森-聖瑪麗高中籃球隊奪得全美冠軍（2002－03）
• 亦曾經參與美式足球運動，被選入全州第一隊，位置係外接員

2003-04年

勒邦占士喺2003年6月26號嘅NBA選秀會上以第一輪第一位俾卡夫蘭騎士選中，成為史上最年輕嘅選秀狀元（18歲178日）。

2003年10月29號，生涯嘅第一場比賽面對沙加緬度帝王，攞到25分、6籃板、9助攻同60%嘅投籃命中率（20射12中）。

2003年11月29號，面對孟非斯灰熊，攻入33分，成為NBA史上最年輕單場攞到30分嘅球員（18歲334日）。

2004年3月27號，對戰新澤西籃網，攞到41分，成為NBA史上最年輕單場攞到40分嘅球員（19歲88日）。

勒邦占士喺新秀賽季場均20.9分、5.5籃板、5.9助攻，係繼前辛辛那提皇家隊後衛奧斯卡·羅伯森同前芝加哥公牛隊後衛米高佐敦後，NBA史上第三位喺新秀球季就可以得到平均「20分、5籃板、5助攻」嘅球員。

呢個賽季騎士嘅成績係35勝47負，比起上季多贏咗18場比賽，但未能晉級季後賽。

2004-05年

2005年1月19號，對決波特蘭拓荒者，全場攻下27分、11籃板、10助攻，完成個人職業生涯嘅第一次「大三元」。

2005年2月20號，生涯首次入選為NBA明星賽東岸正選球員，交出13分、8籃板、6助攻，最後東岸明星隊以125-115擊敗西岸明星隊。

2005年3月20號，對多倫多速龍，攻下個人生涯單場最高嘅56分，成為NBA史上最年輕單場攞到50分嘅球員（20歲80日），紀錄喺2009年11月14嘅俾布蘭登·詹寧斯嘅20歲52日所改寫。

呢個賽季騎士最終取得42勝40負，雖然同東岸第八嘅新澤西籃網戰績相同，但騎士喺常規賽對籃網嘅成績係1勝3負，而未能晉級季後賽。

2005-06年

2006年2月19號，勒邦占士再次入選明星賽東岸正選，交出29分、6籃板、2助攻嘅表現，協助東岸明星隊以122-120擊敗西岸明星隊，賽後占士獲選為明星賽MVP，以21歲51日成為史上最年輕嘅明星賽最有價值球員。

2006年3月22號至4月8號，占士連續九場比賽得分喺35分以上，自1970年代起，只有米高佐敦同埋高比拜仁做得到。 占士喺本賽季平均攞到31.4分、7.0籃板、6.6助攻，成為NBA史上最年輕單季平均攞超過30分嘅球員（21歲107日）。同時，佢亦係史上第四位單季平均有30分、7籃板同埋6助攻以上嘅球員。

騎士呢季戰績50勝32負，以東岸第四種子晉級季後賽，亦係1998年以來首次晉級，首輪遇到華盛頓巫師。

2006年4月22號，占士喺生涯嘅第一場季後賽攞到32分、11籃板、11助攻嘅「大三元」，騎士亦以97-86擊敗對手，佢係繼莊尼·麥卡錫同魔術莊遜後，第三位喺生涯首場季後賽取得大三元嘅球員，最終騎士六場比賽將巫師淘汰。不過喺第二輪，騎士就俾底特律活塞淘汰出局。占士喺季後賽平均攞到30.8分、8.1籃板、5.8助攻。

2006-07年

2007年2月18日，勒邦占士連續第三年獲選為明星賽東岸正選前鋒，佢攞到28分、6個籃板同6次助攻，但最後東岸以132比153不敵西岸。

呢個賽季騎士以50勝32負嘅成績成為東岸第二種子晉級季後賽。首圈遇到嘅對手同上年一樣係華盛頓巫師，最終騎士直落四場贏咗。

第二圈遇到嘅對手係新澤西籃網，騎士隊第六場作客以88比72贏咗對手，總比數4-2淘汰新澤西籃網，亦係騎士自1992年以後首次晉級東岸決賽。

東岸決賽佢哋要面對底特律活塞，活塞已連續第四年至少打入東岸決賽，並曾經喺2004年攞過總冠軍。

騎士頭兩場作客都輸76比79，之後連贏四場晉級總決賽。勒邦占士喺第五場比賽表現出色，個人攞到48分、9籃板、7助攻，重包辦咗球隊最後30分中嘅29分，兩次加時之後以109比107擊敗咗活塞，再喺第六戰以98比82勝出，騎士得到隊史上嘅第一個東岸冠軍。

騎士嘅總決賽對手係聖安東尼奧馬刺，最後騎士直落四場輸咗。第一次打NBA總決賽嘅勒邦占士遭到馬刺嚴防，表現唔多理想，平均得到22.0分、7.0籃板、6.8助攻，同前三輪平均25.8分、8.3籃板、8.3助攻嘅表現有段落差。整個季後賽嘅平均係25.1分、8.1籃板、8.0助攻。勒邦占士亦成為第一位騎士嘅非後衛球員可以連續8場比賽單場至少有7次助攻。

• 老婆係高中校友 Savannah Brinson
• 大仔 LeBron James Jr.，2004年10月6號出世
• 細仔 Bryce Maximus James，2007年6月14號出世
• 女 Zhuri James，2014年10月22號出世

• 占士喺nba.com嘅現役球員資料（繁體中文 / 簡體中文 / 英文）

• 球員名單 （繁體中文）