第20屆東京都知事選舉

東京都知事舛添要一，因為被指挪用公帑，嚟畀家人度假費用同買藝術品等。面對都議會唔信任案，佢星期三（15號）提出辭職，下個禮拜二（21號）正式生效。朝野政黨都著手物色人選，參加都知事選舉。目前以在野民進黨代理黨魁，華裔嘅蓮舫呼聲最高。

日本東京都知事選舉展開，有廿一人報名參選，係近七十年來最多人參選嘅一次。

自民黨

執政自民黨方面，有傳前防衛大臣小池百合子、經濟再生大臣石原伸晃、總務事務次官櫻井俊等都有可能會參選。

到最後執政自民黨更出現分裂局面，黨內原本推舉前總務大臣增田寬也參選，但係同黨嘅前防衛大臣小池百合子，係攞唔到黨內支持同協調下堅決參選；令自民黨響1999年以來，第一次出現黨內選舉陣營分裂嘅局面，當時自民黨係推舉明石康參加東京都知事選舉，但係自民黨出身嘅石原慎太郎亦都報名參選，結果係由石原贏出；有自民黨幹部話，民意調查話增田同小池係勢均力敵。

增田寬也

增田寬也自1995年起做咗三屆、共十二年嘅岩手縣知事，卸任後獲委任做總務大臣。佢提出要收拾東京混亂政局同振興地方經濟，但係佢政績係咁被人批評，包括被指響擔任岩手縣知事期間，興建公共設施同工廠，但係後來進展唔掂，要大量借錢，令到縣內債務猛增。

小池百合子

至於63歲嘅小池百合子曾經做過防衛大臣，宜家係眾議員，佢報名參選之後就要辭去眾議員職務。

佢提出上任後成立調查委員會，調查前知事舛添要一同埋解散都議會，被外界批評對東京都情況一無所知；因為東京都已積壓咗大量問題，解散都議會再選舉太嘥時間。

在野黨

原本有傳係話由民進黨嘅蓮舫出戰；蓮舫四十八歲響東京都出世，老豆係移居日本嘅台灣人，蓮舫曾經做過電視台主播，知名度高，上兩屆參議院選舉，佢響東京選區攞到一百七十一萬高嘅選票，成功為當時嘅民主黨攞到兩個參議院議席。不過蓮舫未有直接回應係唔係參選東京都知事選舉，只係話會先爭取響下個月舉行嘅參議院選舉入面連任，各種選擇都會考慮。

但係民進黨同社民黨等四個政黨宜家共同推舉著名傳媒人鳥越俊太郎參選，而佢嘅政綱主打議題之一係全民癌症體檢。