捷列什科娃

喺加入蘇聯嘅太空計劃之前，捷列什科娃曾經做過紡織工廠工人，亦都玩過跳傘。佢之後加入咗蘇聯空軍，跟住先再加入埋個太空計劃。

喺1963年6月16號，佢自己坐住“東方六號”嘅飛船上太空，成為咗第一位上太空嘅女人。佢總共圍住地球行咗48次，用咗差唔多3日時間。除此之外，喺之後嗰60年，捷列什科娃都係史上最後生嘅女人上太空，一路到2023年先至畀18歲嘅 Anastatia Mayers 打破記錄。

自從上太空之後，佢成為咗太空計劃嘅教練。到1997年，佢以少將嘅地位由空軍退休。

喺政治方面，捷列什科娃一直都係蘇聯共產黨嘅黨員，由1974-1989年期間，做過蘇聯嘅議員。到蘇聯解體之後，佢冇咗份工，但係喺2008年就再贏咗州選舉，繼續做議員。到2011年，佢成為咗國家杜馬嘅成員，做返國家級嘅議員，一路到依家。

捷列什科娃參加嘅社交活動主要都係同保護俄國文化有關，包括推舉俄羅斯東正教。喺俄國嘅議會入面，佢同3位其他成員（Elena Mizulina、Irina Yarovaya 、同埋 Andrey Skoch）都屬於一個保護基督教價值觀嘅小組 。佢曾經支持過“認定東正教做俄國民族同文化嘅基礎”嘅議案。喺2022年2月，佢跟住佢嘅統一俄羅斯黨投票支持俄羅斯入侵烏克蘭，所以之後畀好多西方國家制裁。