意大利體

但係喺設計同印刷，英文所講嘅意大利體其實並唔係指傾斜，而係指 ｢行氣｣（flow）^:56或者指 ｢有潦草嘅形式｣（cursive）^{:56, 273}，即係話正宗嘅意大利體（true italics）其實係規範化咗嘅潦草。所以現實上意大利體只要仲有行氣，可以唔傾斜，甚至向左傾斜^:48:57右註。

喺現代嘅電腦，可以將一般字體（甚至包括唐字）夾硬整斜去模擬斜體，可以話係假斜體。喺英文呢種假斜體叫做 sloped roman^:56，又或者 oblique 或者 slanted type（意思係 ｢斜體｣）^:57:13。

印刷用嘅意大利體初期並冇大楷，淨係有細楷，初期亦都唔會一段字無端端一兩個字係意大利體，一定係成段^:57，類似中文楷書嘅用法。喺一段文用意大利體表示着重某個字，係十六世紀嘅發明^:57。

初期嘅意大利體，對書法家係一種慳時間嘅工具，而對印刷商就係慳位^:15。但係現代用來做着重嘅印刷用意大利體通常都唔會慳位，亦都唔易睇^:57，因為唔易睇先會逼你睇到個字有唔同，但係咁亦都導致而今嘅無障礙指引好多時都誤以為凡係意大利體都唔易睇。