安-225「夢想」運輸機(烏克蘭文:Антонов Ан-225 «Мрія»;俄文:Антонов Ан-225 «Мрия»)係喺1980年代由蘇聯安東諾夫設計局設計嘅一種戰略運輸機。安-225個花名「Мрія」喺烏克蘭文裡邊有「夢想」同「靈感」嘅意思。
運輸機喺2022年俄羅斯入侵烏克蘭期間,被俄軍炸毀。
安-225運輸機最初係作為暴風雪號航天飛機嘅載機來設計嘅。由於開發時間短,安-225嘅設計係基於安東諾夫另一種成功嘅機型安-124進行嘅:安-225延長徂安-124嘅機身同機翼,同時將安-124嘅單一垂直尾翼改成位於水平尾翼末端嘅對稱式雙垂直尾翼,以避開暴風雪號航天飛機被安-225駝住飛行嗰陣產生嘅亂流;此外,Д-18Т高旁通比渦扇引擎亦都由四部增加到六部。
第一架安-225運輸機喺1988年11月30號出廠,12月21號成功進行第一次試飛。爾架亦都係唯一一架出到廠嘅安-225,民航註冊編號UR-82060。1989年5月12號,UR-82060第一次駝住暴風雪號航天飛機飛行。此外,第二架安-225嘅機體已經建造好徂,但係後來由於經費中斷而一直完成唔到。蘇聯解體,暴風雪計劃被俄羅斯腰斬徂之後,專門為暴風雪計劃而設計嘅安-225亦都似乎失去徂存在價值。由於烏克蘭經濟狀況不良,二號機嘅生產被迫腰斬,而UR-82060亦都被迫停飛,甚至連機上嘅好多零件都被人拆徂落來做安-124同安-70嘅備用零件。
1999年,安東諾夫集團嘅分公司安東諾夫航空開始徂一項新嘅貨運包機業務:用旗下嘅安-124為全球各地嘅客戶運送超大件貨物。當時,唯一一種籌載能力同安-124有得揮嘅飛機係C-5「銀河」運輸機,但係C-5運輸機係美國空軍專用嘅,因此安-124就成為徂民間客戶運送超大件貨物嘅唯一選擇。安-124貨運包機業務嘅成功,為安-225重出江湖打下徂相當硬淨嘅基礎。經過超過一年開升級強化同維修,2001年,UR-82060喺停飛徂足足八年之後再次升空,投入商業運營,專門運載連安-124都運載唔到嘅超大件貨物。安-225運輸機嘅最大載貨量達到253.82噸,最大單件載貨量189.98噸,係目前嘅世界紀錄。
喺2022年2月27日,烏克蘭國防工業集團證實,停喺戈斯托梅利的安-225「夢想」運輸機被俄軍炸毀。烏方將重建運輸機,預計花費超過30億美金;將全力謀求確保由侵略者賠償重建費用。[1]
This article uses material from the Wikipedia 粵語 article 安-225運輸機, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.