堅盧治gin1 lou4 zi6(英文:Ken Loach,1936年6月17號—)係英國嘅獨立電影同電視導演、編劇,喺1962年出道。
堅盧治 | |
---|---|
姓名原文 | Ken Loach |
出生日 | 1936年6月17號 (87歲) |
出生地 | Nuneaton |
本名 | Kenneth Charles Loach |
國籍 | 英國 |
母語 | 英文 |
識嘅語言 | 英文 |
母校 | St Peter's College |
職業 | 電影導演、編劇、television director、導演 |
僱主 | 英國廣播公司 |
政黨 | 工黨 |
仔女 | Jim Loach |
[改維基數據] | |
堅盧治喺1936年6月17號喺英國華威郡嘅Nuneaton出世。佢19歲服役英國皇家空軍。佢之後入咗牛津大學讀法律,以第三級榮譽學位畢業。讀大學時,佢加入咗牛津大學實驗劇場學會,畢業後佢投身表演藝術。
堅盧治最初喺地方嘅劇團做演員,之後轉到英國廣播公司電視部做導演,拍電視節目《週三劇場》而成名,包括《十字路口》、《嘉芙回家》等出名嘅節目。
1960年代尾,佢開始拍電影,頭兩齣劇情長片係《慾海紅蓮》(1967)同《凱斯》(1969)。《凱斯》畀英國電影學會選入「20世紀100齣最佳英國電影」之一,排第七。
1970到1980年代,因為發行、審查等因由,堅盧治嘅電影唔係咁成功。佢喺1971受慈善機構Save the Children Fund拍攝紀錄片,但機構唔滿意內容涉及肯雅「茅茅起義」、批判殖民主義,一度想銷毀底片,直至2011年9月,影片先有機會公開放映。
1980年代,堅盧治將精力集中為電視台拍紀錄片。1980年代初,佢為英國第四頻道拍咗幾齣關於工會嘅紀錄片,如《領導的問題》,批評工會領袖,惹起工會領袖不滿,第四頻道最後抽起唔播。 1980年代中期,佢替London Weekend TV藝術節目The South Bank Show拍攝關於英美礦工歌謠,但節目最後被指內容政治觀點唔持平,唔適合藝術節目而被拒播放。紀錄片後來喺一個電影節贏得獎項,先有機會輾轉喺英國第四頻道播放。
1987年,堅盧治導演嘅一齣舞台劇"Perdition",原本安排喺倫敦Royal Court Theatre公演,但因為引起反猶太爭議,最後喺公演前夕劇團取消公演。 1980年代尾段,佢為生計拍咗唔少電視廣告,客戶包括麥當勞快餐店。
1989年,佢拍攝紀錄片《Time to go》,片中提出英軍需撤出北愛爾蘭。1990年,電影《秘密議程》故事以關心英國政府喺北愛爾蘭人權狀況嘅美國律師喺都柏林被殺事件開始,繼而揭露出七、八十年代英國高層政治運作的陰謀。影片矛頭直指英國當局對愛爾蘭共和軍實行格殺勿論政策漠視人權,以及美國秘密介入以保持英國保守黨執政地位。由於題材具爭議性,惹來英國國內猛烈抨擊,影片入圍康城影展,獲康城影展評審團獎,更畀保守黨國會議員指為「愛爾蘭共和軍(嘅電影)入圍康城」(an IRA entry at Cannes)。
之後,佢拍咗好幾齣電影,喺多個國際影展中屢獲殊榮,包括《踎地盤》(1991)、《土地與自由》(1995)等等。2006年電影《風吹麥動》,令堅盧治第一次贏得康城影展金棕櫚獎,不過亦惹來英國國內批評。2016年電影《我,不低頭》就令佢再次奪得康城影展金棕櫚獎。
佢喺1960年代初加入英國工黨,直至1990年代中期退黨。1960至1970年代,佢活躍於「社會主義勞工聯」(「勞工革命黨」前身)、「國際社會主義者」(社會主義勞工黨」前身)、國際馬克思主義者小組。
2004年,佢參與政黨「Respect-The Unity Coalition」,又代表佢哋參選2014年歐洲議會選舉。2007年,哩嗰組織分裂之後,佢轉投由George Galloway帶頭嘅分支「Respect Renewal」。後來,佢退出咗呢個組織。
2010年,佢成為6個為阿桑奇擔保嘅擔保人之一。阿桑奇走入厄瓜多爾駐倫敦大使館尋求政治庇護後,佢哋嘅保證金被充公。
2012年倫敦議會選舉,堅盧治支持「Trade Unionist and Socialist Coalition」。2013年,政黨「Left Unity」成立,堅盧治喺發起人之一。
2012年11月,佢拒絕都靈電影節獎項。佢嘅理由係主辦機構位處都靈嘅國家電影博物館外判清潔同保安工作。博物館喺工人抗議減人工後炒魷,期間涉及恫嚇、騷援員工,之後將工作外判。評論指堅盧治拒絕獎項係要展示同工人團結一致。
2015年,佢支持郝爾彬競逐工黨黨魁。2016年9月,佢發放由佢拍攝關於郝爾彬嘅紀錄片「In Conversation with Jeremy Corbyn」,當時正值工黨選舉黨魁。2017年,佢重新加入工黨,直至2021年夏天。
2019年秋天,堅盧治接受訪問時,批評工黨國會議員唔幫郝爾彬,而且大部份寧願要一個右傾嘅黨魁,又認為醫療、教育、貧窮、不平等、氣候變化,比英國脫歐更加重要。2019年11月,堅盧治喺國會大選中支持工黨。同年12月,喺一份文化人支持郝爾彬領導工黨嘅聲明上,佢喺聯署人之一。
2021年8月,堅盧治畀人逐出工黨。工黨指堅盧治加入組織「Labour Against the Witchhunt」堅盧治否認加入工黨唔容許嘅組織。
堅盧治回應自2008至2009年加沙地帶嘅以巴衝突所引發嘅反猶情況,認為以色列係引發呢一波反猶情緒嘅始作俑者。
2007年,堅盧治加入文藝界聯署促請San Francisco International LGBT Film Festival停收以色列領事館嘅贊助,係一百個聯署人之一。
2008年5月8號,佢又參加咗54名文藝界名人響《國際先驅論壇報》嘅聯署聲明,反對慶祝以色列60周年國慶,認為慶祝就好似係喺巴勒斯坦人嘅墳前跳舞一樣,毋視以色利對巴勒斯坦嘅壓迫。2009年5月,愛丁堡國際電影節喺同堅盧治「溝通」後,退回以色列大使館300英鎊嘅贊助。嗰筆贊助原本係用嚟贊助以色利電影人去愛丁堡國際電影節嘅交通費。電影節最後自行畀錢贊助以色列電影人交通費。面對有人指責堅盧治行為就似政治審查,佢反駁話自己冇職冇權,亦影響唔到電影節節目編排。佢之後出公開信,話以色列同埋佢嘅支持者經常將對佢哋嘅批評,標籤為「反猶太」或種族歧視,用呢種手段去貶損理性討論。佢重申電影人永遠喺愛丁堡受到歡迎,抵制只係針對以色列政府。
2009年6月,堅盧治等人將原本送交墨爾本國際電影節放映嘅作品《尋找簡東拿》撤映,抗議以色利大使館作為電影節嘅贊助人。電影節行政總裁Richard Moore形容呢個舉動猶如勒索。2009年9月,堅盧治喺英國衛報,呼籲支持「Palestine Campaign for the Academic and Cultural Boycott of Israel」。
劇情長片
電視節目
紀錄片
This article uses material from the Wikipedia 粵語 article 堅盧治, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). 呢度嘅所有文字係根據 CC BY-SA 4.0 牌照嘅條款發佈;可能會有附加嘅條款。 Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki 粵語 (DUHOCTRUNGQUOC.VN) is an independent company and has no affiliation with Wiki Foundation.