列文虎克

列文虎克喺荷蘭嘅德爾夫特出世。佢喺年幼嗰陣失去咗佢嘅親生父親，之後佢媽媽改嫁俾畫家Jacob Jansz Molijn。當佢繼父喺1648年去世嗰陣，列文虎克就去咗阿姆斯特丹做一個亞麻布商嘅學徒。佢喺20歲嗰陣返返德爾夫特，開始賣亞麻布商同雜貨。1654年佢同一個亞麻布商個女結婚，到佢太太1666年過身嗰陣，佢哋已經有五個細路，可惜祇得一個長大成人。列文虎克喺1671年再娶，佢第二任妻子喺1694年過身。

列文虎克喺經營亞麻布商嘅時候，想用放大鏡睇更細微嘅位，不過當時嘅放大鏡唔夠清楚。佢開始對製作鏡片有興趣，自學成才。佢用一條小玻璃棒，將中間部分放入熱火之中，然後將熱融嘅部分拉開，形成兩條細長嘅玻璃絲。再將其中一條絲重新插入火中，就可以製作出一個非常細小但高質量嘅玻璃鏡片。佢亦用磨砂法製作低倍率嘅鏡片。

列文虎克成功出製造出強大鏡片嘅方法，重將佢應用喺微觀世界嘅研究。佢將自己嘅研究成果介紹俾佢嘅朋友、著名嘅荷蘭醫生Reinier de Graaf。當倫敦嘅皇家學會（Royal Society）喺佢哋嘅期刊《皇家學會哲學學報》（Philosophical Transactions）度發表一位意大利鏡片製造商嘅突破性研究嗰陣，de Graaf就寫信俾期刊編輯Henry Oldenburg，大力讚揚列文虎克嘅放大鏡，話佢「遠超過我哋之前見過嘅」。作為回應，皇家學會將列文虎克嘅論文發表喺《學報》度，重叫佢造嘅新丁型放大鏡做顯微鏡。1680年，英國皇家學會接納咗列文虎克爾個非學術專家做會員。

列文虎克用自己造嘅鏡片組合成高倍放大鏡，觀察雨水、血液之類嘅嘢，發現有好多肉眼睇唔到嘅嘢－微生物。佢觀察同記錄顯微鏡下嘅世界，記錄微生物嘅生長過程，得出微生物係無處不在嘅結論，重發現咗微絲血管。顯微鏡嘅發明衍生咗微生物學，原生動物學（Protozoology）、醫學同生理學亦都大有得益。