Venecii

Se om Venecijan provincijan i Venecijan agjan pälidn da meriport.

Venecii
Venezia

Lidnanznam	Flag
Valdkund	Italii
Eläjiden lugu (2014)	264,579 ristitud
Pind	415,9 km²
Pämez'	Luidži Bruniaro (2015—)
Telefonkod	+39−41
Aigvö	tal'vel UTC+1, kezal UTC+2

Vl 2014 läz 2,6 mln ristitud elädas lidnan aglomeracijas, järedad Padui- da Trevizo-lidnad mülüdas sihe mugažo.

Lidn om turizman sur' keskuz (20 mln turistad vl 2013), Venecijan karnavalan da Venecijan kinofestivalin vedandan sija. Lidnan da sen lahten arhitekturine nägu mülüb UNESCO:n kul'turjäl'gusiden nimikirjuteshe.

Lidnan aluz om pandud 6. voz'sadal meiden erad.

7. voz'sadaspäi 1797 vodhesai Venecii oli Venecijan Tazovaldkundan pälidnaks. Voz'sadoil 15.-16. Albanii, Ionižed sared, Krit da Kipr oliba tazovaldkundan paloikš.

Venecii om Marko Polon da Antonio Vival'din sündundan sija.

Venesuel-valdkundan nimituz om sündnu lidnan nimespäi.

Lidn sijadase Italijan pohjoižpäivnouzmas. Se vedase pidust' Venecijan lahten Adriatižen meren randištod, seižub 2,54 metrad valdmeren tazopindan päl keskkorktusel. 118 sart om lidnas. Saum vezid om lidnan pindan 61% (275,53 km²).

1970-nziš vozišpäi Venecijan ristitišt poleneb kaikenaigašti sügüz'ližiden sur'veziden tagut, sen paloin sar'hižes palas — lujemba kaiked.

Venecii-kommun jagase kudeks rajonaks ičeohjastusenke.

Avtobusad, tramvaid, vezitaksid da pened jogilaivad (ital. üks'lugu vaporetto) oma kundaližeks transportaks lidnan südäimes. Venehed (gondol:ad) oma olmas turistoiden täht.

Kebn metro (ital. Minimetrò) radab lidnas vspäi 2010 (1 jono, 857 m, 3 stancijad).

Marko Polon nimel nimitadud civiline rahvahidenkeskeine lendimport (VCE) sijadase 8 km pohjoižhe lidnan keskusespäi. Sišpäi tehtas reisid Evropan äjihe maihe, AÜV:oihe, Kanadha da Italijadme.

 

• Venecii-kommunan ohjastusen oficialine portal (comune.venezia.it). (ital.) (angl.)