Lambaz

? Lambaz
Lambaz
Tedoklassifikacii
Valdkund: Živatad Tip: Sel'gjäntkeižed (Chordata) Klass: Imetaiživatad (Mammalia) Heimkund: Šorpkabjaižed (Artiodactyla) Sugukund: Pall'azsar'vižed (Bovidae) Heim: Oinhad (Ovis) Erik: Lambaz
Latinankel'ne nimi
Ovis aries (Linnaeus, 1758)
Kuvad Vikiaitas ITIS 552475 NCBI 9940

Lambaz (latin.: Ovis aries) om kabjživat, mülütadas Pall'azsar'vižed-sugukundha (Bovidae).

Lambhan ižač om bošak, vai oinaz. Lambhanpoigaine om vodn (vodnaz, cikuine).

Vl 2013 kaik oli 1 172 mln lambhid mail'mas. Valdkundad järedanke lambazvodindanke: Kitai — 185 mln lambhid, Avstralii — 89 mln, Indii — 75 mln, Sudan — 52 mln, Iran — 50 mln, Nigerii — 39 mln, Sur' Britanii — 33 mln, Uz' Zelandii — 30 mln.

Om olmas enamba 200 lambhan sugud.

Živat om kodikoittud nügüdläižen Turkanman territorijas kahesa tuhad vozid tagaz.

Täuz'kaznuded ižačud oleldas 70..160 kg (rekord 247,2 kg), emäčud 45..100 kg. Ižačud oma sar'vekahad tobjimalaz, emäčuil voib olda penid sar'vid. Sägun korktuz om 55..100 sm, hibjan piduz — 60..110 sm. Kandand vedase viž kud. Elädas 10..12 vodhesai. Lambaz om märehživat, otab sötkeks heinäsižid kazmusid, ei navedi karktoid heinid.

Kävutadas villad karvaspäi, lihad, maidod (tehmaha brinzad), razvad i ket; ottas kaclendtegoihe model'organizmikš (oz., Dolli-lambhaine).

• Baši-baši, čke-čke — sanad kucumha lambhid.
• Keričimed — raudad lambhid keričemha.
• Kezi — lambaznahk.
• Lambazlävä — sauvuz lambhid pidamha.
• Lambaznik — lambhiden pidai.
• Tal'vill — keritud kevädel lambazvill.

Muštatišed

• Armaz kuti hahk lambaz verhas läväs.
• Sindai ei kerikoi, ka ala bäläida. (ku ei küzugoi, ka ole vaitti)

Ozoitez

• Iče Timoi karvakaz, kauhtanaine villakaz. (lambaz)