Rabat

Se om valdkundan seičemenz' lidn eläjiden lugun mödhe. Om Rabat — Sale — Kenitr-agjan administrativižeks keskuseks mugažo, mülüb sihe prefekturaks.

Rabat
الرباط (Ar Ribat, arab.)
ⴻⵔⵔⴱⴰⵟ (Errbat, berber.)

Lidnanznam	Flag
Valdkund	Marok
Eläjiden lugu (2021)	645,500 ristitud
Pind	118,5 km²
Pämez'	Asma Rhlalu (sügüz'ku 2021—, Asmaa Rhlalou)
Telefonkod	+212−37
Aigvö	UTC+1

Nügüdläižen eländpunktan aluz om pandud Al'mohadad-dinastijan alusenpanijan Abd Al'-Mumin-sultanal vl 1146 kuti lidnuz tehmaha londoid Ispanijan lidnoihe. Vl 1170 mainitase Ribat-el'-Fath-nimenke «vägestusenkandai».

Keskaigan lidn oli merirazbainikoiden peitsijaks. Vl 1912 francižen administracijan Juber Liote-ohjandai sirdi Rabatha pälidnad Fesaspäi päzutamha berberoiden vasthalibundoišpäi.

Rabat šingotase pälidnan funkcijoil (valdkundaližed päaluzkundad, verhiden maiden sur'oigenduzkundad) i valdkundaližil holitišil, valdkundaližiden finansoiden keskuseks, kul'turan keskusil, sauvondal i cementan kompanijal. Tehnopolis koume nellikkilometrad pindal radab Sale-kaimdailidnas (korktoiden tehnologijoiden edheotandad).

Lidn sijadase Bu-Regreg-jogen estuarijan hural randal i Atlantižen valdmeren randištol, 0..160 m ü.m.t. korktusil. Matkad Marokon kaikiš järedambha Kasablank-lidnha-porthasai om 70 km suvipäivlaskmha valdmererandadme.

Klimat om Keskmeren, päivoikaz päiči tal'ves. Voden keskmäine lämuz om +17,7 C°, kezakun-sügüz'kun +20,8..+23,1 C°, tal'vkun-uhokun +12,3..+13,7 C°. Ekstremumad oma −3,2 C° (viluku) i +47,2 C° (heinku). Kezaaigan minimum om +8,2 C° (kezaku), tal'vaigan maksimum om +30..+31 C° (tal'vku-uhoku). Paneb sadegid 522 mm vodes, enamba kül'mkus-vilukus (81..94 mm kus), kuiv sezon oleskeleb kezakus-elokus (5 mm pordos). Voib panda halad i lunt üks'-kaks' kerdad erasel tal'vel. Kun keskmäine relätivine nepsuz vajehtase 77..83 % röunoiš voden aigan.

Rabatan prefektur jagase videks nimitadud ümbrikoks: Agdal' Rijad, El' Jusufii (El Youssoufia), Hassan, Suissi, Jakub El' Mansur. Pen' Tuarg-municipalitet (Touarga, 3932 eläjad vl 2014) mülüb sihe mugažo.

Edeline lidnan pämez' om Mohamed Sadiki (2015 — sügüz'ku 2021).

Vl 2014 lidnan eläjiden lugu oli 577 827 ristitud (agjan kahesandez) 117 km² pindal. Kaik 2,1 mln ristituid om ezilidnoidenke. Järedad ezilidnad oma Sale (Salé, arab. Sala) ani pohjoižpäivnouzmha (870 tuh. eläjid vl 2010, valdkundan nellänz' surtte lidn) i Kenitr 40 km pohjoižpäivnouzmha.

 

•  
  Hasanan minaret, vn 2004 nägu
•  
  Kasba Udai-lidnuz (2005)
•  
  Amuine Šell-lidnuz (2007)

• Lidnan da regionan turizman sait (visitrabat.com). (fr.) (angl.) (isp.) (arab.)
• Lidnan turizman sait (rabat-maroc.net). (fr.)