سوالبارد کا بیجوں کا عالمی ذخیرہ

سوالبارد مملکت ناروے کا شمالی ترین علاقہ ہے جو چند جزائر پر مشتمل ہے۔ یہاں دنیا بھر سے لا کر 9 لاکھ 30 ہزار اقسام کے بیجوں کو ایک پہاڑ میں سرنگ کھود کر کولڈ اسٹوریج میں محفوظ رکھا گیا ہے۔ اگر دنیا میں تیسری یا چوتھی جنگ عظیم اور بھیانک تباہی کے بعد ساری نباتات ختم ہو جائے تو بچ جانے والے چند انسانوں کے لیے خوراک کے شدید مسائل ہو جائیں گے۔ ایسے موقع پر ان محفوظ شدہ بیجوں کی مدد سے دنیا کو دوبارہ بسانے میں مدد ملے گی۔ پبلک میڈیا میں اسے اکثر Doomsday Vault کہا جاتا ہے۔ Svalbard Global Seed Vault قطب شمالی سے صرف 1300 کلومیٹر یعنی 810 میل کے فاصلے پر واقع ہے۔ یہ بے انتہا سرد مقام ہے اور اور یہاں زلزلے آنے کے امکانات نہیں ہیں۔ سطح سمندر سے اس سرنگ کی اونچائی 430 فٹ ہے اور کسی سیلاب کے خطرے سے محفوظ ہے۔ بیجوں کو منفی 18 ڈگری سینٹی گریڈ پر رکھا جاتا ہے۔ اگر ریفریجریشن کا نظام عارضی طور پر خراب بھی ہو جائے تو ارد گرد جمی برف کی وجہ سے درجہ حرارت زیادہ بڑھنے نہیں پاتا۔ اس جگہ پہرہ داری کا انتہائی سخت نظام ہے۔ اگرچہ دنیا میں کئی اور بھی بیجوں کے ذخیرے ( seed banks ) ہیں مگر وہ نیوکلیئر جنگ جھیلنے کے قابل نہیں ہیں۔ نقادوں کا کہنا ہے کہ یہ ان زہریلے بیجوں کا ذخیرہ ہے جو جینیٹک انجینیئرنگ کی مدد سے بنائے گئے ہیں اور حیاتاتی ہتھیار کے طور پر استعمال کیے جا سکتے ہیں۔