Luka Modrić: Futbollist kroat

Lukasi luan si mesfushor, por ai poashtu luan si sulmues apo mbrojtës. Ai është emëruar si Futbollisti Kroat i Vitit gjashtë herë, duke u barazuar me Davor Šuker, që fitoi shumë herë gjatë gjithë kohës.

Luka Modrić

Të dhënat vetjake
Emri i plotë	Luka Modrić
Datëlindja	9 shtator 1985
Vendlindja	Zara, RS Kroacia, RSF Jugosllavia
Gjatësia	1.72 m (5 ft 8 in)
Pozicioni	Mesfushor
Të dhënat e klubit
Klubi aktual	Real Madrid
Numri	10
Karriera me të rinjtë
1996–2001	Zadar
2002–2003	Dinamo Zagreb
Karriera me klube*
Vitet	Klubi	Ndeshje	(Golat)
2003–2008	Dinamo Zagreb	94	(27)
2003–2004	→ Zrinjski (huazim)	22	(8)
2004–2005	→ Inter Zaprešić (huazim)	18	(4)
2008–2012	Tottenham Hotspur	127	(13)
2012–	Real Madrid	162	(9)
Karriera ndërkombëtare
2006–	Kroacia	104	(12)
*Ndeshjet dhe golat me klubet llogariten vetëm për ligën vendase

Luka Modrić lindi në 9 shtator 1985 dhe u rrit në fshatin Modrići e cila është pjesë e Zaton Obrovački, një fshat i vendosur në shpatet jugore të malit Velebit, në veri të qytetit të Zadarit në Republikën Socialiste të Kroacisë, e cila ishte një republikë brenda Jugosllavisë.

Real Madrid

2012–2013: Sezoni debutues dhe vëndi si titullar

Më 27 gusht 2012, Real Madridi njoftoi se kishte arritur një marrëveshje me Tottenhamin për transferimin e Modrić për rreth 30 milion £. Ai bëri debutimin e tij me klubin vetëm dy ditë më vonë në ndeshje e kthimit të finales së Supercopa de España 2012 kundër Barcelonës në Stadiumin Santiago Bernabéu, duke zëvëndësuar gjermanin Mesut Özil në minutën e 83të. Reali fitoi ndeshjen, duke bërë që Modrić të fitonte trofeun e parë me klubin vetëm 36 orë pas kishte firmosur. Pavarësisht debutimit pozitiv, Modrić fillimisht e pati të vështirë të përshtatej në ekip nën drejtimin e trajnerit José Mourinho për shkak të stërvitjes së pakët gjatë fazës përgatitore, të cilën ai e kishte humbur për shkak të negociatave të gjata me klubin. Prezenca e mesfushorit veteran Xabi Alonso dhe Sami Khedirës në rolin e mesfushorit mbrojtës, si dhe Özil si mesfushor i avancuar bënë që Modrić të ishte më së shumti rezervë, duke u aktivizuar si zëvëndësues. Ai luajti jashtë pozicionit të tij në muajt e parë në klub. Modrić luajti ndeshjen e tij të parë në Ligën e Kampioneve më 18 shtator kundër Manchester Cityt në fazën e grupeve. Më 3 nëntor, Modrić regjistroi golin e parë me klubin duke shënuar në minutën e fundit të fitores 4–0 kundër Real Zaragozës. Dy javë më pas, ai asistoi golin e Karim Benzemas, e cila më pas u kreditua si autogol i Jon Aurtenetxe Borde, me një krosim nga 50 metra; ky ishte goli i parë i suksesit 5–1 kundër Athletic Bilbao. Ndeshja e tij më e mirë e sezonit ishte ajo e 4 dhjetorit kundër Ajaxit në fazën e grupeve të Ligës së Kampioneve, ku ai asistoi golat e Cristiano Ronaldos dhe José Callejón me krosime duke ndihmuar Realin të fitonte 4–1. Në fund të vitit ai u votua si blerja më e keqe e sezonit nga gazeta sportive spanjolle Marca.

Modrić filloi karrierën e tij ndërkombëtare duke luajtur me ekipet e moshave. Ai fillimisht u aktivizua me ekipin nën-15, duke vazhduar me rradhë me ekipet nën-17, nën-18, nën-19 dhe nën-21. Ai debutoi në mars 2001 me ekipin nën-15 të drejtuar nga Martin Novoselac. Pavarësisht talentit dhe pjekurisë psikologjike, Modrić nuk ishte titullar dhe lojtar i rëndësishëm deri sa arriti rritjen fizike, e cila nisi pas debutimit të tij me ekipin nën-18. Novoselac e konsideron atë një shëmbull për lojtarët e rinjë falë rritjes graduale, punës së vazhdueshme dhe përpjekjeve, si dhe talentit. Modrić bëri debutimin e tij me kombëtaren e parë më 1 mars 2006 në një ndeshje miqësore kundër Argjentinës, të cilën Kroacia e fitoi 3–2.

2006–2008: Kupa e Botës 2006 dhe Euro 2008

Modrić luajti dy ndeshje si zëvëndësues në finalet e FIFA Kupës së Botës 2006, respektivisht kundër Japonisë dhe Australisë. Me vendosjen e Slaven Bilić si trajneri i ri i ekipit kombëtar, Modrić doli në pah në skenën ndërkombëtare; ai shënoi golin e parë me Kroacinë më 12 gusht 2006 në miqësoren e fituar 2–0 kundër kampionëve të botës Italisë në Livorno.

Performancat e Modrić bënë që ai të fitonte vendin so titullar në formacion si dhe ishte një nga lojtarët më të dalluar të Kroacisë në fushatën e suksesshme kualifikuese të Euro 2008; Kroacia e mbylli grupin në vendin e parë me 29 pikë, duke arritur dy fitore ndaj Anglisë, e cila nuk mundi të kualifikohej. Për Modrić pritshmëritë ishin të mëdhaja, duke bërë që gjatë kualifikueseve ai të fitonte pseudonimin "Cruyffi kroat" nga mediat kroate. Në fazën e grupeve të Euro 2008, Modrić shënoi me penallti golin e parë të Kroacisë në fitoren 1–0 kundër Austrisë më 8 qershor; ai u bë lojtari më i ri që shënon gol në një Kampionat Evropian për Kroacinë (22 vjeç dhe 273 ditë). Kjo ishte penalltia e akorduar dhe e shënuar më e shpejtë në historinë e këtij kompeticioni (4 minuta). Modrić vazhdoi me paraqitjet mbreslënëse duke u shpallur lojtari më i mirë në fitoren 2–1 kundër favoritëve të Gjermanisë, e cila në fund do të arrinte edhe finalen. Në ndeshjen çerek-finale kundër Turqisë, Modrić shfrytëzoi gabimin e portierit turk Rüştü Reçber dhe krosoi për shokun e ekipit Ivan Klasnić, i cili shënoi një minutë para përfundimit të ndeshjes. Megjithatë, Turqia barazoi menjëhetë me anë të Semih Şentürk, duke e dërguar ndeshjen te gjuajtjet e penalltive. Te penalltitë, Modrić gaboi në tentativën e tij me Kroacinë që u eliminua me rezultatin 3–1. Pas përfundimit të kompeticionit, Modrić u përfshi në UEFA Ekipin e Turnamentit, duke u bërë kroati i dytë pas Davor Šuker që e arrin këtë gjë.

2008–2016: Rezultatet zhgënjyese

Modrić shënoi tre gola në kualifikueset e FIFA Kupës së Botës 2010, respektivisht kundër Kazakistanit, Andorrës dhe Ukrainës. Këto gola e bënë atë golashënuesin më të mirë të ekipit për këtë fushatë kualifikuese sëbashku me Ivica Olić, Ivan Rakitić dhe Eduardon. Ekipi nuk e siguroi kualifikimin pasi u rendit në vendin e tretë, një pikë larg Ukrainës së vendit të dytë. Modrić luajti në të gjitha ndeshjet në kualifikueset e UEFA Euro 2012, duke shënuar një gol kundër Izraelit. Ai luajti si titullar në të tre ndeshjet e fazës së grupeve kundër Republikës së Irlandës, Italisë dhe Spanjës, me Kroacinë e cila nuk e kaloi grupin. Ndeshja e tij më e mirë ishte ajo kundër Spanjës; një nga momentet më të dalluara në atë ndeshje ndodhi kur ai mori topin në mesfushë dhe kaloi të tre mesfushorët spanjollë dhe dhuroi një kros në stilin trivela nga e djathtas për Ivan Rakitić, gjuajtja e të cilit u prit nga Iker Casillas. Për shkak se Kroacia nuk e kaloi fazën e grupeve, Modrić nuk u përfshi në Ekipin e Turnamentit, edhe pse The Daily Telegraph e përfshiu në njëmbëdhjetëshen më të mirë deri në gjysëm-finale, si dhe loja e tij mori komplimente nga analistët.

Modrić dhe Kroacia u kualifikuan në FIFA Kupën e Botës 2014 pas raundit play-off. Ata u vendosën në grupin A me vendin organizator Brazilin, Meksikën dhe Kamerunin. Kroacia luajti në ndeshjen hapëse të turnamentit kundër Brazilit, duke u mposhtur 3–1, në një ndeshje ku Modrić pësoi një dëmtim të lehtë në këmbë. Në ndeshjen e dytë, Kroacia regjistroi një fitore 4–0 kundër Kamerunit, megjithatë ata nuk e kaluan grupin pasi u mposhtën në ndeshjen e fundit 3–1 nga Meksika. Kroacia e mbylli grupin në vendin e tretë pavarësisht pritshmërive të mëdha nga media dhe publiku kroat.

Më 9 shtator 2014, në ditëlindjen e tij të 29të, Modrić shënoi golin e parë me Kroacinë pas tre vitesh, në një fitore kundër Maltës në kualifikueset e UEFA Euro 2016. Ai më pas shënoi edhe një penallti kundër Azerbajxhanit. Më 3 mars 2015, Modrić luajti për herë të parë si kapiteni i Kroacisë në ndeshjen e kthimit kundër Azerbajxhanit, e cila u mbyll në barazim në transfertën e Bakut. Në finalet e turnamentit, Modrić shënoi golin e fitores për Kroacinë në ndeshjen hapëse të fazës së grupeve kundër Turqisë, duke mposhtur portierin kundërshtar me një gjuajtje në ajër nga 25 metra. Me këtë gol, Modrić u bë lojtari i parë kroat që shënon në dy edicione të ndryshme të Kampionatit Evropian, pas golit të shënuar kundër Austrisë në vitin 2008. Ai gjithashtu u shpall lojtari i ndeshjes. Pas kësaj, Modrić u detyrua të humbiste ndeshjen vendimtare ndaj Spanjës për shkak të një dëmtimi të vogël muskulor. Pavarësisht mungesës së tij, Kroacia fitoi ndeshjen dhe u rendit e para në grup, por u eliminua nga Portugalia me rezultatin 1–0 në raundin e 16-tave.

2016–2018: Topi i Artë i Kupës së Botës 2018

Modrić u emërua kapiteni i ri i Kroacisë për kualifikueset e FIFA Kupës së Botës 2018 pas tërheqjes së Darijo Srna. Kroacia e nisi fushatën kualifikuese mirë, por pas humbjeve minimale ndaj Islandës dhe Turqisë, si dhe barazimit ndaj Finlandës (ndeshje në të cilën Modrić regjistroi paraqitjen e tij të 100të me ekipin kombëtar), Kroacia rrezikoi seriozisht mundësitë për kualifikim. Kjo gjë bëri që Modrić të deklaronte publikisht mungesën e besimit te trajneri Ante Čačić. Shpejtë pas kësaj Čačić u shkarkua dhe u zëvendësua nga Zlatko Dalić, i cili mori detyrën para ndeshjes vendimtare kundër Ukrainës në transfertë, të cilën Kroacia e fitoi 2–0, duke siguruar një vënd në fazën play-off. Në këtë fazë, Modrić shënoi me penallti në fitoren 4–1 kundër Greqisë, duke ndihmuar Kroacinë të kualifikohej në finalet e turnamentit.

Kroacia u vendos në Grupin D sëbashku me Argjentinën, Islandën dhe Nigerinë. Gjatë turnamentit, Modrić, sëbashku me Ivan Rakitić dhe Mario Mandžukić, u etiketuan si Gjenerata e Artë e dytë e futbollit kroat. Modrić shënoi me penallti në fitoren e Kroacisë në ndeshjen hapëse dhe u shpall lojtari më i mirë. Në ndeshjen e dytë kundër Argjentinës, Modrić shënoi një gol të bukur me një gjuajtje nga 23 metra distancë, duke i dhënë Kroacisë fitoren 3–0 dhe duke u shpallur sërisht lojtari më i mirë. Ai u aktivizua edhe në ndeshjen e fundit kundër Islandës, të cilën Kroacia e fitoi gjithashtu, duke u shpallur si lojtari më i mirë i turnamentit për fazën e grupeve nga FourFourTwo, The Daily Telegraph dhe ESPN.

Në ndeshjen e raundit të 16-tave kundër Danimarkës, gjatë kohës që rezultati ishte i barabartë 1–1, Modrić krijoi një mundësi shënimi për Ante Rebić në pjesën e dytë të kohës shtesë, i cili në fund fitoi një penallti pasi u rrëzua nga lojtarët kundërshtar; Modrić ekzekutoi penalltinë por gjuajtja e tij u prit nga Kasper Schmeichel. Megjithatë, ai shënoi në gjuajtjet e penalltive ku Kroacia fitoi 3–2. Në ndeshjen e rradhës çerek-finale kundër vendit organizator Rusisë, Modrić asistoi golin e mbrojtësit Demagoj Vida në kohën shtesë, duke barazuar ndeshjen në 2–2; ai shënoi në gjuajtjet e penalltive duke ndihmuar Kroacinë të kualifikohej në gjysëm-finale si dhe u shpall lojtari më i mirë për herë të tretë në turnament. Kroacia arriti një fitore historike 2–1 kundër Anglisë në gjysëm-finale më 11 korrik, duke siguruar finalen e Kupës së Botës për herë të parë në histori. Dy ditë para finales media raportoi se Modrić ishte lojtari që kishte vrapuar më shumë kilometra si dhe ishte lojtari i tretë që kishte krijuar më shumë raste. Ai gjithashtu kishte bërë shumë driblime dhe pasime gjysëm fushën kundërshtare. Edhe pse Kroacia u mposht 4–2 nga Franca në finale më 15 korrik, Modrić u nderua me çmimin Topi i Artë si lojtari më i mirë i turnamentit, si dhe u përfshi në Ekipin e Turnamentit. Pas pritjes madhështore që ekipi mori në Zagreb, Modrić sëbashku me shokët e ekipit Danijel Subašić, Šime Vrsaljko dhe Dominik Livaković u pritën nga dhjetra mijëra tifozë në qytetin e tyre të lindjes Zadar.

2018–2022: Topi i Bronztë i Kupës së Botës 2022

Modrić luajti në të katërt ndeshjet e edicionit përurues të UEFA Ligës së Kombeve, me Kroacinë që e mbylli Grupin 4 të Ligës A në vendin e fundit pas humbjes historike 6–0 kundër Spanjës dhe asaj 2–1 kundër Anglisë në Wembley Stadium në nëntor 2018.

Modrić shënoi dy gola në fushatën kualifikuese të Euro 2020; një penallti në barazimin 1–1 kundër Azerbajxhanit dhe një gol falë një inkursioni personal në fitoren 3–0 kundër Hungarisë, me Kroacinë që u rendit në vendin e parë në grup dhe u kualifikua. Megjithatë, turnamenti u shty për vitin 2021 për shkak të Pandemisë së COVID-19. Më 24 mars 2021, Modrić luajti ndeshjen e tij të 134 me ekipin kombëtar në fitoren 1–0 kundër Sllovenisë në kualifikuet e FIFA Kupës së Botës 2022, duke barazuar anësorin Darijo Srna si lojtari me më shumë ndeshje të luajtura në historinë e kombëtares. Ai e theu rekordin tre ditë më vonë në fitoren 1–0 kundër Qipros në ndeshjen e rradhës kualifikuese.

Modrić është një mesfushor i talentuar me dhuni teknike. Pozicioni i tij i preferuar është në rolin e organizatorit, ku ai kontrollon ritmin e lojës nga mesfusha. Ai është lavdëruar nga futbollistë, analistë, trajnerë për pasimet e sakta dhe gjuajtjet nga distanca, të cilat ndonjëherë i kryen me teknikën Trivela (gjuajtje me pjesën e jashtme të këmbës), si dhe për aftësinë për të shmangur ndërhyrje nga mbrojtësit kundërshtar duke qënë nën presion.

Lukasi u martua me Vanja Bosnić në maj 2010 në kryeqytetin kroat Zagreb pas katër viteve lidhje. Djali i tyre, Ivano u lind më 6 qershor 2010. Vazja e tyre, Ema, lindi më 25 prill 2013. Vajza e tyre e dytë, Sofia, linei më 2 tetor 2017.

• Uebfaqja zyrtare
• Lukasi në Federatën e futbollit të Kroacisë (Kroacisht)