Новинарь

Новинарѣ в сучасности мають поле и средства роботы не лем в новинках, але в масмедиях вообще: радио, телевизия, интернет.

Од XX. стороча робота новинаря одзначать ся векшов фаховостьов, котра была овплывнена четырьма факторами:

1. выросла организация новинарской роботы;
2. взникла шпециална едукация про новинарьох;
3. выдана литература о истории, проблемах, техниках масмедий;
4. выросло розумѣня социалной зодповѣдности новинаря.

В розличных державах и режимах новинаре мають розличну мѣру слободы слова, зачавши од «мягкой» цензуры и самоцензуры, аж до репресий з боку влады.

Вельо новинарскых организаций выдали правила и кодексы новинарской етикы, але наперек тому в сучасном свѣтѣ множать ся примѣры дезинформации, ширѣня неовѣреных або замѣрно фалшованых новин (fake news), што в значной мѣрѣ уможнено сучасныма техниками масмедий.

Од року 2015 Рада Европы наштартовала програму охраны новинарства и безпекы новинарьох. Подля ей штатистик за тот час найвеце нападох на новинарьох зафиковано в России и Турции. Суть факты забивства або щезнутя новинарьох, котры выступовали з критичныма информациями: в Словакии, Украинѣ, а подля Комитета Охраны Новинарьох в добѣ 1992-2018 были забиты 1304 новинарѣ.

• Journalism. The profession. //Encyclopaedia Britannica