Перемышль

 

Перемышль первый раз спомянутый в хрониках под роком 981, коли великый князь Киевскый Владимир І. забрав од Ляхох тот город въедно з иншыма.

До половкы 14. ст. перебывав переважно под юрисдикциев Галицко-Волынского княжества, хоть нераз переходив до рук мадярскых кральох, а по занику княжества (1340) переходить под владу польской коруны.

Городом магдебургского права став ся в року 1389 з милости краля Владислава ІІ. Ягелла.

По роздѣлѣ Польщи (1772) достав ся Австрии и од року 1874, яко пограничный город, быв перетвореный на перворядну военну крѣпость. В роках 1914-1915 мав великый вызнам в боях. Первый раз в року 1914 до 9. септембра росийске войско з великыма утратами безуспѣшно штурмовало и одышло. Другый раз 11. новембра 1914 облягли город и так 22. марца 1915, коли засобы оборонцьох ся вычерпали, генерал-поручик Кусманек дав розказ знищити муницию и здав город. Але уже 3. юна 1915 по паруденном штурмѣ город быв назад в руках австрийскых.

В роках 1939-1945 быв окупованый совѣтскым и нѣмецкым войском наперемѣну, але наконець вернутый.

Перемышль быв и зоставать вызнамным религийным и културным центром. Ту были выпечатаны многы книгы Александра Духновича. Днесь в городѣ представлены набоженства:

• католицке (римокатоликы и грекокатоликы);
• православне;
• протестантскы (евангелисты-методисты, адвентисты, баптисты и др.).

В Перемышлю ествуе дереварскый промысел (выроба пресованых плит), выроба механична и промысловой автоматикы, косметикы, полотен. З традичных и людовых ремесел — зливаня звонох и продукция пипок.

• Révai nagy lexikona. 1-21. köt. Révai Testvérek Irodalmi Intézet Részvénytársaság, Budapest. 1911–1935.
• Перемышль, город в Галичу // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.