Антон Кашшай

фебруар">24. фебруар 1921, Дубриничѣ, Подкарпатска Русь, Чехословакия – † 31. децембер 1991, Ужгород, Закарпатска область, Украина— подкарпатскый малярь. Заслуженый умѣлець УССР (1960), Народный умѣлець УССР (1964).

Антон Кашшай
Чинность	Малярь
Уроджѣня	фебруара 24, 1921(1921-02-24)
Дубриничѣ, Подкарпатска Русь, Чехословакия
Упокоеня	децембра 31, 1991 (70 р.)
Ужгород, Закарпатска область, Украина
Учні	Ілько Іван Іванович
Награды
Заслуженый деятель умельства УССР
VIAF:399144782708880889981; GKG:/g/121t5v42;

Походив з родины лѣсника.

Од року 1929 родина бывать в Ужгородѣ. Хлопець мальовати научив ся уже дома, од отця. А в Ужгородской гимназии его дар увидѣв Йосиф Бокшай и взяв го ку собѣ в науку. Там ся спознав з Адалбертом Ерделиом и Федором Манайлом, котры таксамо стали ся его наставниками. В року 1939 по закончѣню гимназии хотѣв учити ся дале, але завадила война. Працовав в лѣсницкой дирекции, финанчным урядником, але не лишав мальованя.

По закончѣню войны и створѣню Закарпатской области быв ведучым оддѣла Закарпатского областного выконного комитета, од року 1946 — директор творчо-выробных майстерень Сполку малярьох УССР, член Сполку малярьох УССР. Од року 1947 лишив урядницку роботу, жебы цѣлком ся вѣновати малярству.

Антон Кашшай за 15 рокы быв глава Закарпатской организации Сполку малярьох Украины (1961–1976). Надзвычайно много робив про малярьох, подтримовав их в застачаню быванями, майстернями, малярскыма материалами, спомагав их материално и нигда не вымагав довг, посылав их образы на розличны выставкы, помогав выдавати каталогы, организовав одпочинок родинам малярьох, а малярям — пленеры дома и в заграничу. Быв повный радостной енергии и оптимизма, котрыма запальовав другых. Днесь его имя носить Сполок независимых закарпатскых малярьох. Погребеный на теметовѣ Калвария в Ужгородѣ.

Антон Кашшай — малярь-пейзажиста, майстер монументалных, епичных карпатскых панорам, представитель молодшой генерациии Подкарпатской школы малярства.

Первый великый успѣх и славу принюс малярю монументалный образ Зима в Карпатах (1952). Образ купила Третьяковска галерия в Москвѣ, а неодовго интерес достати образы маляря зачали указовати иншы музеи. В образах зоз того периода еще силны вплывы творчой манѣры его учителя Й. Бокшая.

В 1960–1970-х роках побывав во творчых дорогах в Италии, Норвегии, Японии. Поступно его малярска манѣра наберать широкости, легкости и вольности, а фарбы в его образах наповнюють ся свѣтлом. За вызнамны успѣхы и вклад до розвою закарпатской малярской школы достав званя Заслуженого умѣлця (1960) и Народного умѣлця (1964) Украины.

• Поп, Иван. Энциклопедия Подкарпатской Руси. — Ужгород: Изд-во В.Падяка, 2001. — 431 с. ISBN 966-7838-23-4 рус.
• Енциклопедія Закарпаття. Визначні особи ХХ століття. Закарпатський осередок НТШ. Під наук. ред. Довганича О.Д. — Ужгород: «Гражда», 2007 — 400 c. ISBN 978-966-8924-33-0 укр.
• Енциклопедія історії та культури карпатських русинів. Укладачі Маґочій П.Р., Поп І. — Ужгород: Вид-во В.Падяка, 2010. — 856 c.+ХХХІІ с. ISBN 978-966-387-044-1 укр.
• Біксей Л. І. (2012). Кашшай Антон Михайлович (по украинскы). Енциклопедія Сучасної України. http://esu.com.ua/search_articles.php?id=11497. [перевірено 2019-07-02]. 
• Кашшай Антон Михайлович (по украинскы) (ФОТО). Художня галерея KarpatArt.com. http://karpatart.com/artist/73/kashshayi-anton-mihayilovich.html. [перевірено 2019-07-02]. 
• Олена Кашшай. До 90-річчя з дня народження Антона Кашшая (по украинскы). Художня галерея KarpatArt.com. http://karpatart.com/news/20/910-rokiv-z-dnya-narodzhennya-antona-kashshaya.html. [перевірено 2019-07-02].