Друга Світова Война

Прічіны войны преставлёвали резултаты версаіллескго договору, котры проглубили чутя понижіня в пораженых штатах, окремо в Нїмецьку, і велика господарьска кріза на переломі двадцятых і тридцятых років, котра прінціпалным способом ослабила велику часть штатів, чім уможнила рост націзму під веджінём Адолфа Гітлера і іншых тоталітарных режімів в цілій Европі.

Обще приїманым датумом початку войны в Европі є 1. септембер 1939, коли націстічне Нїмецько напало Польщу, нашто ся до конфлікту запоїла Франція, Велика Брітанія і штаты Коммонвеалтгу. За першый передчасный атак 2. світовой войны в Европі є браный тзв. Яблунковскый інцідент. В Азії є за початок войны брана японьска інвазія до Кітаї 7. юла 1937. Совєтьскый союз перше підписав з Нїмецьком пакт о неатакованю і уволнив тым простор про націстічну воєньску інвазію, але 22 юна 1941 быв пропаденый нїмецькым Вегрмахтом. Споєны штаты америцькы, котры уж скоре давали Споєнцям поміч были затягнуты до войны 7. децембра 1941 потім, што Японія ударила на їх морьску закладню в Перл Гарборі. Конець войны в Европі настав 8. мая 1945 капітулаціов Нїмецька. По америцькім пущіню атомовых бомб на міста Гирошима і Нагасаки капітуловала і Японія 2. септембра того самого року.