Тифус

Розличують тифус платкастый, лат. typhus exanthematicus и черевный, enterotyphus, typhus abdominalis; епидемичный и ендемичный; зворотный, лат. typhus s. febris recurrens ай иншакы.

Платкастый тифус в минулости быв мѣтлов людства, окреме в часѣ турецкых войн, в часѣ Наполеоновскых войн выступав як епидемия в России, Ираку, в дакотрых нѣмецкых крайох, ендемично в Галичинѣ. Ку взнику хвороты приспѣвають тяжкы социалны и гигиеничны обстояня: худобность, голод, нечистота, переповнены бываня, тѣлесна слабость. Тото ся указуе быти причинов лютованя хвороты в часѣ войн, в темницях, на шифах.

Тото група подобных хворот, причиненых розличныма видами бактерии рикетсии, котры выпущають токсины в кровь. Бактерии ся переносять вушами, блохами и клѣщами. Инкубачна доба од инфекции до появы первых симптомох 8–12 днѣ; симптомы: силный боль головы, зима, тряска, боль в крижах и клубах — приходять наглѣ. На третий – четвертый день хвороты наступать делирий, а в том часѣ указують ся тыж червены вымѣткы (roseola) на торзѣ, шии, руках и ногах. Смертность при епидемиях сягать 30–50%.

Вылѣпшена гигиена майже зовсѣм одстранила тифус из Западного свѣта, але ся еще задержуе во многых державах, наперек вакцинам и пестицидам. Ендемичный тифус, котрый переносять блохы, што паразитують на грызунах, не такый страшный (смертность ниже 5%).

• Typhus, summary. Encyclopedia Britannica. 31 Mar. 2003. https://www.britannica.com/summary/typhus. [перевірено 2021-12-14]. англ.

• Tyf. Ottův slovník naučný.. Dvacátýpátý díl. Praha: J. Otto. 1906. Сс. 960–962. чеш.

• Тимченко А. Д. (1988). Краткий медико-биологический словарь. Киев: Выща школа. С. 293. ISBN 5-11-000102-2. русс.