Выбух В Галифаксу

децембер">6. децембра 1917.

Найвекшый выбух доядровой добы

Выбух в Галифаксу
Halifax Explosion
Хмара выбуху
Держава	Канада
Мѣсто	Галифакс, Нова Шкоция
Тип катастрофы	морска
Датум	6 December 1917
Час	9:04:35 AST
Страты
Загынулых	2 000 (потв. 1 950)
Раненых	около 9 000
Ненайденых	над 2000
Координаты	44°40′9″N 63°35′47″W / 44.66917°N 63.59639°W / 44.66917; -63.59639
Мапа мѣста выбуху
Выбух в Галифаксу на Викискладѣ

В узкой части акватории пристава до французского океанского парника Монблан, наладованого выбушнинами, наразив норвежскый океанскый парник Имо, котрый быв без ладунку. На палубѣ французской шифы имив ся огень, од котрого став ся выбух, найвекшый в истории доядровой добы. Сила выбуху была еквивалента примѣрно трем тысячам тон тротила. Около 2000 людей были забиты выбухом, одломками, згорѣли в огню пожара, а еще около 9000 были ранены.

Монблан быв наятый французсков владов на перевезѣня ладунку выбушнин з Ню Йорка до Бордо, Имо быв наятый белгийсков Комисиов про подпору, жебы доправив про ню ладунок з Ню Йорка, за котрым правѣ ишов. В Галифаксу были формованы морскы конвои, котры мали охрану, жебы могли безпечно перейти Атлантик.

Около 8:45 в резултатѣ непорозумѣня при взаемных маневрах Имо наразив носом до правого боку Монблана, на палубѣ котрого зачав ся пожар. Французска екипа не могла ся достати до гасичской апаратуры, и капитан, знаючи, якый наклад везе дав росказ неодкладно охабити парник. Екипа на двох захранных човнах успѣшно высадила ся на дортмундскый берег узины, гойкаючи по французскы варованя про норвежскы морякы, але они з того нич не розумѣли. Горящый Монблан тым часом односило ку галифаксскому берегу. На помоч му понагляли ся гасичскы приставны лодѣ, една з них пробовала гасити, але неуспѣшно. На берегах ся згромадили люде. Монблан донесло до мола число 6, и там огень перешмарив ся на берег. Тото вшитко держало около 20 минут.

В 9:04:35 AST Монблан выбухнув. Огняна куля подняла ся до вышкы 1,6 километра и вытворила грибовиту хмару. Сила выбуху вытворила приливну волну вышкы аж 18 м над значков высокой воды на галифакском березѣ. Норвежскый парник тов волнов быв поднятый и вынесеный на мѣлину при дортмундском березѣ, капитан загынув. Понеже стало ся то взимѣ, в розваленых домах горѣв огень, котрый причинив пожар по цѣлой околици. В радиусѣ 1,6 км не зостало едной хыжы, придатной на бываня.

Галифакс в року 1917 быв процвѣтаючый город, ту приходили и одходили войсковы едноткы, посыланы на фронт, война перетворила город на индустриалный центер з приливом роботникох и иншого обывательства. И тото вшитко закончило ся о даколько минут по девятой годинѣ 6. децембра. Од Монблана не зостало нич: выбух розметав 3000-тонну шифу и спустошив околицю на плосѣ 325 акры. В городѣ, котрый мав тогды 65 тысяч обывательох, были забиты нараз понад 1600, а ранены около 9000 людей. Тото было вецей як фронтовы утраты цѣлой провинции Нова Шкоция в Первой свѣтовой войнѣ. Материалны шкоды были шацованы на $35 000 000. В перерахунку на днешну вартость долара тота сума ровна $500 000 000. Веце як рок требало, жебы выглядати тай идентификовати вшиткых загынулых. Официална датабаза в архивѣ Новой Шкоции числить 1950 имен.

По многых експертизах и судовых процесах были наконець оба капитаны признаны винныма. Норвежскый за то заплатив животом, а французскый зостав под охранов свого уряду, котрый рѣшѣня канадского и англицкого суда не вызнав.

• Ruffman, Alan; Howell, Colin D., eds. (1994). Ground Zero: A Reassessment of the 1917 Explosion in Halifax Harbour. Nimbus Publishing. ISBN 978-1-55109-095-5. англ.
• Halifax Explosion Remembrance Book. англ.