ଚମ୍ପକେଶ୍ୱର ଶିବ ମନ୍ଦିର ପୁରୁଣା ଭୁବନେଶ୍ୱରର ଅମ୍ବିକା ସାହିରେ ସ୍ଥିତ ଏକ ଶିବ ମନ୍ଦିର । ଏହି ମନ୍ଦିରଟି ପର୍ଶୁରାମେଶ୍ୱର ମନ୍ଦିରର ପଶ୍ଚିମ ଦିଗରେ ୧୫୭ ମିଟର ଦୂରତାରେ ବିନ୍ଦୁସାଗର ଆଡ଼କୁ ଯାଉଥିବା କୋଟିତୀର୍ଥେଶ୍ୱର ମାର୍ଗର ଡାହାଣ ପଟରେ ଅବସ୍ଥିତ । ସ୍ଥାନୀୟ ବାସିନ୍ଦାଙ୍କ ବିଶ୍ୱାସ ରହିଛି ଯେ ଏହି ମନ୍ଦିରରେ ପୂଜିତ ଶିବଲିଙ୍ଗଟି ପାତାଳଫୁଟା ଅଟେ ଓ ଦେଉଳରେ ଚମ୍ପା ନାଗମାନେ କାହାରିକୁ ଦଂଶନ ନ କରି ବାସ କରନ୍ତି । ଏଥି ଲାଗି ଦିଅଁଙ୍କ ନାମ ଚମ୍ପକେଶ୍ୱର ହୋଇଛି ।
ଚମ୍ପକେଶ୍ୱର ଶିବ ମନ୍ଦିର | |
---|---|
Religion | |
ଅନୁବନ୍ଧଗୁଡ଼ିକ | ହିନ୍ଦୁ ଧର୍ମ |
Location | |
ସ୍ଥାନ | ଭୁବନେଶ୍ୱର |
State | ଓଡ଼ିଶା |
Country | ଭାରତ |
ଭୌଗଳିକ ଅବସ୍ଥିତି | 20°14′48″N 85°51′28″E / 20.24667°N 85.85778°E |
Architecture | |
Type | କଳିଙ୍ଗ ସ୍ଥାପତ୍ୟ କଳା |
ମନ୍ଦିରଟି ୧୩ଶ ଶତାବ୍ଦୀର ଅଟେ । ଗଙ୍ଗବଂଶର ରାଜତ୍ୱ କାଳରେ ଏହି ମନ୍ଦିରଟି ପ୍ରମୁଖ ଥିଲା । ମନ୍ଦିରରେ ଶିବରାତ୍ରି, ଜଳଶାୟୀ, ରୁଦ୍ରାଭିଷେକ, ସଂକ୍ରାନ୍ତି ଆଦି ପାଳନ କରାଯାଏ । ଏଠାରେ ବ୍ରତ, ବିଭାଘର, ହୋମ ଆଦି ଅନ୍ୟାନ୍ୟ ମଙ୍ଗଳକୃତ୍ୟ ମଧ୍ୟ ଅନୁଷ୍ଠିତ ହୁଏ । ମୁଖ୍ୟ ଦେଉଳ ଚାରିଆଡ଼େ ଲାଟେରାଇଟ ପ୍ରସ୍ତରରେ ନିର୍ମିତ ପାଚେରୀ ଅଛି । ଏହି ମନ୍ଦିରରେ ଦକ୍ଷିଣ ଦିଗରେ ବିଶ୍ୱନାଥ ମନ୍ଦିର, ପୂର୍ବ ଦିଗରେ କୋଟିତୀର୍ଥେଶ୍ୱର ପୋଖରୀ ଓ ଉତ୍ତର ଦିଗରେ ଘରଗୁଡ଼ିକ ଅଛି ।
ମନ୍ଦିରର ବିମାନ ଓ ଜଗମୋହନର ଦୈର୍ଘ୍ୟ ୧୧.୫ ମିଟର ଓ ପ୍ରସ୍ଥ ୬.୦୦ ମିଟର ଅଟେ । ଏହା ପଞ୍ଚରଥ ଶୈଳୀରେ ନିର୍ମିତ । ବିମାନ, ଜଗମୋହନ ଓ ଅନ୍ତରାଳର କ୍ଷେତ୍ରଫଳ ୪.୫୦, ୬.୦୦ ଓ ୦.୫୫ ବର୍ଗ ମିଟର । ବିମାନ ରେଖ ଶୈଳୀର ଥିବାବେଳେ ଜଗମୋହନଟି ଅପୀଢ଼ ଅଟେ । ମନ୍ଦିରଟି ପଞ୍ଚାଙ୍ଗବାଦ ଅଟେ । ଏହାର ପାଞ୍ଚଟି ଅଙ୍ଗ ହେଉଛି ପା'ଭାଗ, ତଳ ଜଙ୍ଘ, ବନ୍ଧନ, ଉପର ଜଙ୍ଗ ଓ ବାରଣ୍ଡା । ପାଭାଗରେ ଖୁର, କୁମ୍ଭ, ପାଟ, କାନି ଓ ବସନ୍ତ ଅଛି ।
ପଶ୍ଚିମ, ଉତ୍ତର ଓ ଦକ୍ଷିଣ ରାହାଗୁଡ଼ିକ ମାପରେ ସମାନ । ଏହାଙ୍କ ଉଚ୍ଚତା ୦.୮୫ ମି, ପ୍ରସ୍ଥ ୦.୪୭ ମି ଓ ଗଭୀରତା ୦.୩୪ ମି ଅଟେ । ତିନୋଟିଯାକ ପାର୍ଶ୍ୱଦେବତା ପୀଠରେ ଦେବତା ନାହାନ୍ତି ।
ମନ୍ଦିରରେ ଥିବା କଳାକୃତି ବିହୀନ ଦ୍ୱାରଗୁଡ଼ିକ ପରବର୍ତ୍ତୀ କାଳରେ ମିଶାଯାଇଛି । ନବଗ୍ରହ ବିଗ୍ରହ ନାହାନ୍ତି । ପାଭାଗରେ କୌଣସି କାରୁକାର୍ଯ୍ୟ ନାହିଁ । ଜଙ୍ଘ ଅଂଶରେ ସାମାନ୍ୟ କେତେକ କାରୁକାର୍ଯ୍ୟ ରହିଛି । ବାରଣ୍ଡା ମଧ୍ୟ କଳାକୃତି ବିହୀନ । ଗଣ୍ଡିର ତଳ ଅଂଶ ରାହା ପାଗରେ ତିନୋଟି କ୍ଷୁଦ୍ର ରେଖ ଦେଉଳ ରହିଛି । ଏହାଙ୍କ ମଧ୍ୟରୁ ମଝିରେ ଥିବା ଦେଉଳଟି ଅପେକ୍ଷାକୃତ ଉଚ୍ଚ । ଗଣ୍ଡି ଅଂଶ କ୍ଷୁଦ୍ର ରେଖ ଦେଉଳ ଓ ଭୂମି ଆମଳକୁ ଛାଡ଼ିଦେଲେ ଅତି ସାଧାରଣ ହୋଇଛି । କଣିକା ପାଗରେ ଚାରଗୋଟି ଭୂମି ଆମଳ ଅଛି । ଗଣ୍ଡିର ରାହା ପାଗର ଚାରିପଟେ ଉଦ୍ୟୋତ ସିଂହର ମୂର୍ତ୍ତି ଅଛି ।
ଲାଟେରାଇଟରେ ନିର୍ମିତ ଦେଉଳଟି ପୂର୍ବରୁ ପଞ୍ଚାୟତନ ଥିଲା ବୋଲି ପଶ୍ଚିମ ଦିଗରେ ଥିବା ଭଗ୍ନାବଶେଷରୁ ବାରିହେଉଛି । ଏହି ମଧ୍ୟରୁ ଗୋଟିଏ ପାର୍ଶ୍ୱଦେଉଳରେ ଚତୁର୍ଭୁଜ କାର୍ତ୍ତିକଙ୍କ ଠିଆ ଭଙ୍ଗୀରେ ପ୍ରତିମା ରହିଛି । ତଳ ବାମ ହସ୍ତ ଭାଙ୍ଗିଯାଇଥିବା ବେଳେ ଉପର ବାମ ହସ୍ତ ଗୋଟିଏ କୁକ୍କୁଟ ଉପରେ ଥୁଆହୋଇଛି । କୁକୁଡ଼ାଟିକୁ ଜଣେ କ୍ଷୁଦ୍ର ମହିଳା ଧରିଛନ୍ତି । ମନ୍ଦିର ସମ୍ମୁଖରେ ଏକ ପୁରୁଣା କୁଅଁ ଅଛି । ଏହା ୫.୨୫ ମିଟର ଗଭୀର ଅଟେ ।
This article uses material from the Wikipedia ଓଡ଼ିଆ article ଚମ୍ପକେଶ୍ୱର ଶିବ ମନ୍ଦିର, which is released under the Creative Commons Attribution-ShareAlike 3.0 license ("CC BY-SA 3.0"); additional terms may apply (view authors). ଦର୍ଶାଯାଇନଥିଲେ ସମସ୍ତ ବିଷୟବସ୍ତୁ CC BY-SA 4.0 ରେ ଉପଲବ୍ଧ । Images, videos and audio are available under their respective licenses.
®Wikipedia is a registered trademark of the Wiki Foundation, Inc. Wiki ଓଡ଼ିଆ (DUHOCTRUNGQUOC.VN) is an independent company and has no affiliation with Wiki Foundation.