Dadra Og Nagar Haveli

Det er sett saman av Nagar Haveli, eit lite område mellom Maharashtra og Gujarat og Dadra, ein enklave i Gujarat. Dadra og Nagar Haveli var tidlegare eit eige forbundsterritorium med Silvassa som hovudstad. Det blei slått saman med Daman og Diu til eit nytt territorium den 26. januar 2020.

Dadra og Nagar Haveli
Land	India
Hovudstad	Silvassa
Areal	491 km²
Folketal	220 451
Folketettleik	449 / km²
Grunnlagd	11. august 1961
Språk	gujarati
Dadra og Nagar Haveli 20°16′N 73°01′E / 20.27°N 73.02°E / 20.27; 73.02
Wiki Commons: Dadra and Nagar Haveli district

Området er åslendt, og rundt 40 % av territoriet er skogdekt. Austdelen ligg nær Dei vestlege Ghatfjella, og kan nå høgder opptil 300 moh.

Damanganga er den einaste større elva i territoriet. Ho renn frå Maharashtra nordvestover til hamnebyen Daman.

Territoriet omfattar rundt 70 landsbyar. Dei fleste innfødde bur på landsbygda. Rundt 80 % av dei er rekna som urfolk (adivasiar). Det blir snakka fleire språk i området, mellom anna varli, dhodia og konkani. Gujarati og marathi er vanlege som andrespråk.

Jordbruk, ofte på oppbygde terrasar, er den viktigaste næringsvegen i territoriet. Ein dyrker særleg ris og korakan (ragi eller fingerhirse, Eleusine coracana). Andre viktige vekstar er kveite og sukkerrøyr.

Dadra og Nagar Haveli var lenge under radjputstyre. Nagar Haveli blei del av Marathariket, men begge områda kom under portugisisk herredøme i 1780-åra. Indisk-portugisiske nasjonalistar tok kontroll over først Dadra og så Nagar Haveli i juli/august 1954, og sette opp eit pro-indisk styre. Dei to områda blei gjort til eit felles unionsterritorium i India 11. august 1961.

• Offisiell nettstad (dnh.nic.in)
• About Dadra and Nagar Haveli, dnh.nic.in